قىرعىزستان جوعارعى وقۋ ورنىنان 20 قازاقستاندىق ستۋدەنت شىعارىلادى

استانا. KAZINFORM - قىرعىزستاننىڭ ۇلتتىق قاۋىپسىزدىك كوميتەتى ارابايەۆ اتىنداعى ق م ۋ- دە 59 ستۋدەنتتىڭ تىركەۋدە تۇرعانىن، ءبىراق ءىس جۇزىندە ۋنيۆەرسيتەتتە وقىماعانىن انىقتادى، دەپ حابارلايدى كابار.

كوميتەتتىڭ باسپا ءسوز قىزمەتىنىڭ حابارلاۋىنشا، اتالعان وقۋ ورنىندا ءبىلىم بەرۋدەگى زاڭ بۇزۋ تۋرالى ناقتى اقپارات كەلىپ تۇسكەن. وقۋ ورنىنا رەسمي تۇردە قابىلدانعان ءبىرقاتار شەتەلدىك ستۋدەنت قىرعىز رەسپۋبليكاسىنان تىس جەردە ءىس جۇزىندە ەلدە جوق جانە وقۋ ۇدەرىسىنە قاتىسپاعانى انىقتالدى.

اتالعان فاكتى بويىنشا قىرعىز رەسپۋبليكاسى قىلمىستىق كودەكسىنىڭ 345-بابى، 1-بولىگى (قىزمەتتىك جالعاندىق) بويىنشا قىلمىستىق ءىس قوزعالعانى اتالىپ ءوتتى. كوميسسيالىق تەكسەرۋ جۇرگىزىلىپ، زاڭ بۇزىلعانى راستالدى.

سونداي-اق 59 شەتەلدىك ستۋدەنت وقۋدان شىعارۋ تۋرالى شەشىم قابىلدانعانى كورسەتىلگەن، ونىڭ ىشىندە:

30 ى وزبەكستان رەسپۋبليكاسىنىڭ ازاماتى،

20 سى قازاقستان رەسپۋبليكاسىنىڭ ازاماتى،

9 ى رەسەي فەدەراتسياسىنىڭ ازاماتى.

قازىرگى ۋاقىتتا قىرعىز رەسپۋبليكاسىنىڭ ۇلتتىق قاۋىپسىزدىك مەملەكەتتىك كوميتەتى انىقتالعان زاڭ بۇزۋعا قاتىسى بار ق م ۋ وقىتۋشىلارى مەن اكىمشىلىك قىزمەتكەرلەرى اراسىنان تۇلعالاردى انىقتاۋ بويىنشا جەدەل-ىزدەستىرۋ ءىس-شارالارىن جۇرگىزىپ جاتىر.