قىرعىزستان حالىقارالىق ينتەرنەت-ترافيككە مونوپوليا ەنگىزدى

فوتو: فوتو: Freepik

استانا. KAZINFORM - قىرعىزستان ەل اۋماعىنا حالىقارالىق ينتەرنەت-ترافيكتى جەتكىزۋگە جانە قامتاماسىز ەتۋگە، سونداي-اق ول ارقىلى حالىقارالىق ترانزيتتى وتكىزۋگە جىل سايىنعى مەملەكەتتىك مونوپوليانى ەنگىزدى، دەپ حابارلايدى DW اقپارات اگەنتتىگى.

ءتيىستى جارلىققا دۇيسەنبى، 28-شىلدەدە قىرعىزستان پرەزيدەنتى سادىر جاپاروۆ قول قويدى، بۇل تۋرالى ونىڭ رەسمي سايتىندا حابارلاندى.

مەملەكەتتىك مونوپوليانىڭ «سىناق رەجيمى» 2025 -جىلدىڭ 15-تامىزى مەن 2026 -جىلدىڭ 14-تامىزى ارالىعىندا ارەكەت ەتەدى.

ينتەرنەت-ترافيكتى جەتكىزۋ، قامتاماسىز ەتۋ جانە ترانزيتپەن قامتاماسىز ەتۋ «ەلكات» كومپانياسىنا جۇكتەلگەن، جەرگىلىكتى ب ا ق-تىڭ حابارلاۋىنشا، ول دا بىرنەشە اي بۇرىن مەملەكەت مەنشىگىنە وتكەن. بايلانىس جانە دەرەكتەردى تاراتۋ وپەراتورلارىنا ەكى ايدىڭ ىشىندە «ەلكاتقا» بارلىق اعىمداعى شارتتاردى جىبەرۋ تاپسىرىلدى.

قىرعىزستان پرەزيدەنتىنىڭ سايتىندا جاريالانعان مالىمدەمەدە بۇل شەشىمنىڭ «ءتيىمدى باسقارۋدى ۇيىمداستىرۋ» جانە «تۇراقتى تەحنولوگيالىق وزگەرىستەر» اياسىندا «سيفرلىق ترانسفورماتسيانى ودان ءارى جەتىلدىرۋ ءۇشىن جاعداي جاساۋ» ءۇشىن قابىلدانعانى ايتىلعان.

21 شىلدەدە قىرعىزستاندا ب ا ق پەن ينتەرنەتتە شىندىققا جاناسپايتىن نەمەسە جالعان اقپارات تاراتقانى ءۇشىن اكىمشىلىك جاۋاپكەرشىلىكتى قاراستىراتىن قۇقىقبۇزۋشىلىقتار تۋرالى كودەكسكە ەنگىزىلگەن تۇزەتۋلەر كۇشىنە ەندى. ولارعا سايكەس، جەكە تۇلعالارعا 20 مىڭ سوم (شامامەن 200 ەۋرو)، زاڭدى تۇلعالارعا 65 مىڭ سوم (شامامەن 640 ەۋرو) كولەمىندە ايىپپۇل بەلگىلەندى. قۇقىقبۇزۋشىلىقتار تۋرالى حاتتامالاردى ىشكى ىستەر ورگاندارى جاساپ، سوتتار قارايدى.