قىرعىزستان شەكاراسى ارقىلى 100 تاسباقانى زاڭسىز الىپ وتپەك بولعان
استانا. KAZINFORM - «دوستىق» باقىلاۋ-وتكىزۋ پۋنكتىندە قىرعىز- وزبەك شەكاراسىندا شەكاراشىلار اكۆاريۋمدىق تاسباقالاردىڭ ءىرى پارتياسىن زاڭسىز الىپ وتپەك بولعان ارەكەتتى توقتاتتى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.
قىرعىزستان ۇلتتىق قاۋىپسىزدىك كوميتەتىنىڭ شەكارا قىزمەتىنىڭ مالىمەتىنە سايكەس، پاسپورتتىق باقىلاۋدان ءوتۋ كەزىندە 34 جاستاعى قىرعىزستاندىق ريۋكزاگىندا پوليەتيلەن پاكەتتەرگە ورالعان 100 ءتىرى اكۆاريۋمدىق تاسباقانى الىپ وتپەك بولعان. اتالعان ازاماتتىڭ جانۋارلاردى شەكارادان وتكىزۋگە ارنالعان رۇقسات قۇجاتتارى بولماعان.
ونىڭ ايتۋىنشا، تاسباقالاردى بەلگىسىز ءبىر ادامنان الىپ، قىرعىزستاننان وزبەكستانعا وتكىزۋگە تاپسىرما العان.
قۇقىق بۇزۋشى مەن تاركىلەنگەن تاسباقالار ءتيىستى ورگاندارعا بەرىلىپ، ءارى قاراي تەرگەۋ مەن شارا قابىلداۋ ءۇشىن تاپسىرىلدى.
بۇعان دەيىن حابارلانعانداي، ەلدە ەكزوتيكالىق جەمىستەردىڭ كونترابانداسى ءۇشىن سالىق قىزمەتى مەن كولىك مينيسترلىگىنىڭ لاۋازىمدى تۇلعالارى ۇستالعان بولاتىن. بيىل قاڭتار ايىندا قىرعىزستان ارقىلى ا ق ش- تان رەسەيگە قارۋ كونترابانداسىن جەتكىزۋ ارناسى انىقتالعان ەدى.
ايتا كەتەلىك قىرعىزستان وزبەكستانمەن بايلانىستىراتىن جاڭا جولدار سالۋدى جوسپارلاپ وتىر.