قىرعىزستان ورتالىق سايلاۋ كوميسسياسىنىڭ رەسمي مالىمەتىنشە، ايمەن قاسەنوۆ 14-قازاندا پرەزيدەنتتىككە ۇمىتكەر رەتىندە قۇجاتتارىن وتكىزگەن.
ول سايلاۋعا قانداي دا ءبىر ساياسي پارتيانىڭ اتىنان ەمەس، ءوزىن-ءوزى ۇسىنۋ تارتىبىمەن قاتىسۋعا نيەتتى.
سايلاۋ كوميسسياسى پرەزيدەنتتىككە كانديداتتاردى ۇسىنۋ كەزەڭى 2026-جىلعى 13-قاراشاعا دەيىن جالعاساتىنىن حابارلادى.
ايتا كەتەيىك، قۇجات تاپسىرۋ كانديداتتىڭ رەسمي تىركەلگەنىن بىلدىرمەيدى. ول ءۇشىن زاڭنامادا بەلگىلەنگەن بارلىق راسىمنەن ءوتۋ قاجەت.
ايمەن قاسەنوۆ كىم؟
ايمەن قاسەنوۆ - قىرعىزستاننىڭ كاسىپكەرلىك جانە باسقارۋ سالالارىندا ەڭبەك ەتكەن ازاماتتارىنىڭ ءبىرى.
ول 1974-جىلعى 11-ساۋىردە بىشكەك قالاسىندا دۇنيەگە كەلگەن. جوعارى ءبىلىمى بار.
قاسەنوۆتىڭ بيزنەس سالاسىندا شامامەن 25 جىلدىق تاجىريبەسى بار.
ءار جىلدارى «گازپرومنەفت-قازاقستان» كومپانياسىنىڭ باس ديرەكتورى، رەسەي-قىرعىز دامۋ قورى باسقارماسىنىڭ مۇشەسى جانە بىشكەك قالاسى اكىمىنىڭ كەڭەسشىسى قىزمەتتەرىن اتقارعان.
بۇل ونىڭ پرەزيدەنت سايلاۋىنا العاش رەت قاتىسۋى ەمەس. ايمەن قاسەنوۆ 2021-جىلعى پرەزيدەنتتىك دودادا دا باق سىناعان. سول سايلاۋدا ول سايلاۋشىلار داۋىسىنىڭ ءبىر پايىزىنان ازىن جيناعان.
قىرعىزستاندا پرەزيدەنت سايلاۋى قاشان وتەدى؟
قىرعىزستان پرەزيدەنتىنىڭ كەزەكتى سايلاۋى 2027-جىلعى 27-قاڭتارعا بەلگىلەنگەن.
مۇنداي شەشىمدى ەل پارلامەنتى - جوگوركۋ كەنەش 2026-جىلعى 24-قىركۇيەكتە قابىلداعان.
ال پرەزيدەنتتىككە ۇمىتكەرلەردى ۇسىنۋ ءراسىمى 13-قاراشاعا دەيىن جالعاسادى.
سونىمەن قاتار 16-قازاندا قىرعىزستان ورتالىق سايلاۋ كوميسسياسى ايمەن قاسەنوۆتىڭ سايلاۋ ماسەلەلەرى جونىندەگى ۋاكىلەتتى وكىلى رەتىندە ۆيتالي مازىكيندى تىركەدى.
الداعى ۋاقىتتا پرەزيدەنتتىككە قاتىسۋعا نيەت بىلدىرگەن باسقا ازاماتتار دا ءتيىستى قۇجاتتارىن سايلاۋ كوميسسياسىنا تاپسىرا الادى.
ەسكە سالايىق، قىرعىزستاننىڭ قازىرگى پرەزيدەنتى - سادىر جاپاروۆ. ول بۇعان دەيىن كەلەسى پرەزيدەنت سايلاۋىنا قاتىسۋ نيەتى بار ەكەنىن مالىمدەگەن.