قىمىز ىشكەن ادام الكوتەستەردەن وتسە، ناتيجە قانداي بولادى
استانا. KAZINFORM - قىمىز-حالقىمىزدىڭ ۇلتتىق سۋسىنى. ونىڭ ادام اعزاسىنا پايداسى تۋرالى ءبىرقاتار زەرتتەۋ جۇرگىزىلگەن.
قىمىزدىڭ، اسىرەسە، ساۋمالدىڭ پايداسىنا ەشكىم دە شەك كەلتىرمەيدى. ءبىر قىزىعى، حالىق اراسىندا قىمىزدى كوپ ىشسە، ادام ماسايادى دەگەن پىكىر بار. راسىمەن قىمىزدىڭ قۇرامىندا الكوگول بار ما؟ قىمىزدى كوپ ىشكەن ادامدى الكوگول ىشكەن دەپ ساناۋعا بولا ما؟ وسى جانە وزگە دە ساۋالدارعا جاۋاپ ىزدەپ كورگەن ەدىك.
ەلىمىزدەگى قىمىز ءوندىرىسى
وتكەن جىلدىڭ 12-ايىندا قىمىز ءوندىرىسى ,6 ءوسىپ، 2463 تونناعا جەتتى. بۇل 2022 -جىلمەن سالىستىرعاندا 236 تونناعا ارتىق.
بيىل ەلىمىزدە 9 ايدىڭ ىشىندە 1240 توننا قىمىز ءوندىرىلدى. بىلتىرعى وسى ۋاقىتپەن (قاڭتار- قىركۇيەك) سالىستىرعاندا ءوندىرىس كولەمى ",9 عا ازايعان. بىلتىر 9 ايدىڭ ىشىندە 1608 توننا قىمىز ءوندىرىلدى.
قىمىزدىڭ قۇرامىندا الكوگول بار ما؟ - مامان پىكىرى
«قىمىز - قىشقىل ءدامدى سۋسىن. سوندىقتان ونىڭ قۇرامىندا ءسپيرتتىڭ ۇلەسى بار. ءبىراق، قىمىز ماسايتادى نەمەسە الكوگولدىك سۋسىن دەگەن پايىم عىلىمي تۇرعىدان ەش جەردە دالەلدەنبەگەن. ونىڭ ۇستىنە ادام قىمىزدى قانشا كولەمدە ىشسە دە، الكوتەستەر الكوگول دارەجەسىن كورسەتپەيدى. الكوتەستەر ادامنىڭ ىشىمدىكتى قانشا كولەمدە تۇتىنعانىن، ياعني ماسايۋ دەڭگەيىن تەكسەرەتىن قۇرال. ىشىمدىك ءىشتى دەگەن كۇدىكتى قۇرالعا ۇرلەيدى، ونىڭ دەمى ارقىلى ىشىمدىك ىشكەنى جانە قاي دەڭگەيدە ەكەنىن كورسەتەدى. ءبىراق، بۇل تەك الكوگول ونىمدەرىنە عانا قاتىستى»، - دەيدى استانا قالاسىنىڭ پسيحيكالىق دەنساۋلىق ساقتاۋ ورتالىعىنىڭ دارىگەرى، پسيحياتر- ناركولوگ انار تاستەمبەكوۆا.
ماماننىڭ ايتۋىنشا، كلينيكالىق پراكتيكادا قىمىزدان الكوگول دەڭگەيىن انىقتاعان جاعداي تىركەلمەگەن.
«قىمىز ىشكەن ادامدى ماس دەگەن كۇدىكپەن ءبىزدىڭ كلينيكاعا اكەلىپ، تەكسەرتكەن جاعداي بولعان ەمەس. ارىپتەستەرىمنەن ەستۋىمشە، كەيبىر وڭىرلەردە قىمىزدىڭ الكوگولدىك كورسەتكىشىنە ەكسپەريمەنت جاساعان، دەگەنمەن قورىتىندىسى تەرىس ناتيجە كورسەتكەن»، - دەيدى ول.
ودان بولەك، ماس ادامداردى انىقتايتىن ءتارتىپ ساقشىلارى بولعاندىقتان پوليتسيا دەپارتامەنتىنە جۇگىنىپ، قىمىزدان ماس بولعان ادامداردى ۇستاۋ فاكتىلەرى تۋرالى سۇراپ كوردىك. ەلوردا پوليتسياسىنىڭ مالىمدەۋىنشە، قىمىز ىشكەن ادامدى الكوگول تۇتىندى دەگەن كۇدىكپەن ۇستاۋ، قاماۋ فاكتىسى تىركەلمەگەن.
قىمىز تۋرالى يسلام نە دەيدى؟
«جالپى يسلام عۇلامالارى جىلقى سۇتىنە (ءبىراۋىزدان) حالال ۇكىمىن بەرگەن. حيدايا كىتابىندا جىلقى ءسۇتىن ءىشۋدىڭ وقاسى جوق دەلىنگەن. تازا تابيعي قىمىز سۋسىنى «الكوگولسىز سۋسىن» رەتىندە سانالادى. ال ونىڭ قۇرامىنداعى اشىعاننان تۋىنداعان ءسپيرتتىڭ مولشەرى از بولعاندىقتان جانە ادامدى ماس بولدىراتىن كورسەتكىشكە جەتپەيتىندىكتەن حانافي ءمازحابىنىڭ ەرەجە- قاعيداتى بويىنشا، حارام ۇكىم تۋدىرمايدى»، - دەگەن جاۋاپ الدىق قازاقستان مۇسىلماندارى ءدىني باسقارماسىنان.
سونداي- اق، ءدىني باسقارمادان سوڭعى ۋاقىتتا شەت ەلدەردەن كەلەتىن قىمىزدار تۋرالى سۇراقتار لەگىنىڭ كوبەيىپ كەتكەنى ايتىلدى. تۇتىنۋشىلاردىڭ ايتۋى بويىنشا باس اينالدىرىپ، ماسايتادى.
«بىرىنشىدەن، ول ونىمدەردى تازا قىمىز ساناتىنا جاتقىزۋعا بولمايدى. ونىڭ قۇرامىنا بيە ءسۇتى، سيىر ءسۇتى، بال، اشىتقىلار كىرەدى. قۇرامىنداعى بال اشىتۋ پروتسەسىن جەدەلدەتەدى. ەكىنشىدەن، ەگەر قىمىزدى ساقتاۋ تەمپەراتۋراسى بۇزىلسا، قۇرامىنداعى ءسپيرتتىڭ پايىزدىق مولشەرى كوبەيۋى ىقتيمال. ۇشىنشىدەن، سپيرت سىرتتان ادەيى قوسىلدى ما، جوق پا ول دا بەلگىسىز»، - دەپ ءتۇسىندىردى ق م د ب وكىلدەرى.
وسىلايشا ەگەر قىمىز اشىتىلماسا، ياعني اشىتقى قوسىلماسا ونى سۋسىن رەتىندە قولدانۋعا رۇقسات.
«قىمىزدى قوسپالار قوسىپ (بال، اشىتقىلار، قىشقىل ءسۇت باكتەريالارى) اشىتىپ، ادامدى ماس ەتەتىندەي دارەجەگە جەتكىزسە - ىشۋگە تىيىم سالىنادى. سوندىقتان دا قىمىزدىڭ تازا تابيعي ءتۇرىن قولدانعان ابزال»، - دەلىنگەن اقپاراتتا.
اۆتور
داۋلەت ىزتىلەۋ