قۇنى 1 ميلليون 400 مىڭ تەڭگەدەن باستالاتىن قۇرىلعى ديسپلەيىندە جارىقتار پايدا بولىپ، جولاقتار تۇسەتىنى جانە كەيبىر پيكسەلدەردىڭ ىستەن شىعاتىنى ايتىلعان. بۇل تۋرالى Daily Mail باسىلىمى حابارلادى.
الەۋمەتتىك جەلىلەردە ونداعان قولدانۋشى سمارتفوندارىنىڭ زاقىمدانعانىن كورسەتەتىن سۋرەتتەر جاريالاعان. جاريالانعان فوتولاردا قۇرىلعىنىڭ ورتاسىنداعى بۇكتەلەتىن تۇس بويىمەن ۇلكەن جارىق پايدا بولعانى، ەكراننىڭ شامامەن ۇشتەن ءبىر بولىگىندە سىزات نە سىنىق بايقالاتىنى جانە ديسپلەيدىڭ وڭ جاق بولىگىن كەسىپ وتەتىن ىستەمەيتىن پيكسەلدەر جولاعى كورىنەدى. قولدانۋشىلار اراسىندا بۇل جاعداي «Crackgate» دەگەن اتاۋمەن تارالا باستاعان.
سمارتفون يەلەرىنىڭ ايتۋىنشا، اقاۋ پايدا بولار الدىندا قۇرىلعى ادەتتەگىدەن قاتتىراق بۇكتەلە باستاعان. ودان كەيىن تىرس ەتكەن دىبىس ەستىلىپ، ەكراندا جارىق پايدا بولعان. كەيبىر ساتىپ الۋشىلاردىڭ تەلەفونى بىرنەشە ساعاتتىڭ ىشىندە ىستەن شىققان.
Reddit جەلىسىندەگى قولدانۋشىلاردىڭ ءبىرى سمارتفوندى ساتىپ العاننان كەيىن ءۇش ساعات وتپەي اقاۋ انىقتالعانىن جازعان. ونىڭ سوزىنشە، تەلەفوندى بار بولعانى 20 رەتكە جۋىق اشىپ-جاپقاننان كەيىن توسىن دىبىس ەستىلىپ، ەكران زاقىمدانعان. تاعى ءبىر قولدانۋشى قۇرىلعى ءتورتىنشى رەت اشىلعاننان كەيىن-اق ىستەن شىققانىن، ءتىپتى ونى باستاپقى باپتاۋدان وتكىزىپ ۇلگەرمەگەنىن ايتقان.
Apple ازىرگە ءۇنسىز
Apple ازىرگە اقاۋدىڭ ناقتى سەبەبىن تۇسىندىرگەن جوق ءارى ماسەلەنىڭ جاپپاي سيپات العانىن رەسمي تۇردە مويىنداماعان. ال قۇرىلعى يەلەرى ەكراننىڭ زاقىمدانۋىنا سمارتفوننىڭ بۇكتەلەتىن مەحانيزمىندەگى توپسا سەبەپ بولۋى مۇمكىن دەپ بولجايدى.
تەحنيكانى بولشەكتەپ، جوندەۋ مۇمكىندىكتەرىن زەرتتەيتىن iFixit توبى جاڭا مودەلدىڭ قۇرىلىمىن زەردەلەپ، ونىڭ بۇكتەلۋ مەحانيزمىنىڭ وتە كۇردەلى ەكەنىن اتاپ وتكەن. ماماندار پىكىرىنشە، مەحانيزمدەگى بولشەكتەردىڭ ءبىرى جوبالانعان تارتىپپەن قوزعالماۋى مۇمكىن. بۇعان قوسا ەكراندا جارىق پايدا بولاتىن تۇستان كابەلدىڭ ءبىر بولىگى وتەدى.
وڭتۇستىك كورەيالىق YouTube-بلوگەر CuriousHagi دە قۇرىلعىعا تاجىريبە جۇرگىزگەن. سمارتفوندى بولشەكتەۋ بارىسىندا ول توپسانىڭ ىشىندەگى شاعىن بولشەكتىڭ سىنعانىن جانە ونىڭ ديسپلەيگە زاقىم كەلتىرگەنىن انىقتاعان. سالدارىنان ەكراندا جارىق پايدا بولعان. اتالعان بولشەك مەحانيزمنىڭ جانىنداعى باسقا بولىكتەرگە قاراعاندا جۇقالاۋ ەكەنى بايقالعان. بۇل ونىڭ وسال تۇس بولۋى مۇمكىن دەگەن بولجامعا نەگىز بولعان.
جوندەۋ قۇنى قىمباتقا ءتۇسۋى مۇمكىن
Apple كومپانياسىنىڭ كەپىلدىك شارتتارىنا سايكەس، ەگەر توپسا قالىپتى پايدالانۋ كەزىندە ىستەن شىقسا جانە وعان جازاتايىم جاعداي نەمەسە قۇرىلعىنى دۇرىس پايدالانباۋ سەبەپ بولماسا، اقاۋ ءبىر جىل ىشىندە تەگىن جوندەلۋى ءتيىس.
ال كەپىلدىك مەرزىمى اياقتالعاننان كەيىن iPhone Duo سمارتفونىن جوندەۋ قۇنى 1500 دوللارعا دەيىن جەتۋى مۇمكىن.
جاڭا قۇرىلعىنى اۋىستىرۋ دا قيىنعا سوعۋى ىقتيمال
ەكرانعا قاتىستى شاعىمدار كوبەيگەن تۇستا iPhone Duo سمارتفونىنىڭ بارلىق ءتۇسى مەن جادى كولەمى بويىنشا نۇسقالارى Apple ينتەرنەت-دۇكەنىندە ساتىلىپ كەتكەن. كەلەسى جەتكىزىلىم 2027-جىلعى 22-قاڭتاردان كەيىن عانا بولادى دەپ كۇتىلۋدە. وسىعان بايلانىستى اقاۋى بار قۇرىلعىنى جاڭاسىنا اۋىستىرۋ ءبىراز ۋاقىت الۋى مۇمكىن.
Reddit قولدانۋشىلارىنىڭ حابارلاۋىنشا، ەكراندارى جارىلعان كەيبىر ساتىپ الۋشىلار Apple كومپانياسىنان اقشاسىن تولىق قايتارىپ العان. ولار ينتەرنەت-دۇكەن ارقىلى جاڭا قۇرىلعىعا تاپسىرىس بەرىپ، ۇزاق كۇتۋدىڭ ورنىنا تىكەلەي Apple Store دۇكەنىنە بارىپ، سمارتفوندى اۋىستىرۋدى سۇراعان.
ازىرگە كومپانيا اقاۋدىڭ سەبەبى مەن ونىڭ تارالۋ اۋقىمى تۋرالى رەسمي تۇسىنىكتەمە بەرگەن جوق. سوندىقتان جينالمالى iPhone Duo مودەلىندەگى ەكران اقاۋىنىڭ ناقتى سەبەبى قوسىمشا تەكسەرۋدى قاجەت ەتەدى.
el.kz