«قوڭىراۋعا ءمان بەرمەگەن»: ءورت ءسوندىرۋ قىزمەتى ءۇيى ورتەنگەن تۇرعىنعا 11 ميلليون تولەۋگە مىندەتتەلدى

قونايەۆ. KAZINFORM - الماتى وبلىسىندا ءورت سوندىرۋشىلەردىڭ باياۋ ارەكەتىنىڭ كەسىرىنەن اۋىل ازاماتىنىڭ ءۇيى ورتەنگەن. ەندى سوت شەشىمىمەن ءورت ءسوندىرۋ قىزمەتى ماتەريالدىق شىعىندى وتەۋگە مىندەتتەلدى.

الماتى وبلىسى سوتىنىڭ مالىمەتىنە سايكەس، 2023 -جىلدىڭ مامىر ايىندا ساعات 17:30 شاماسىندا الماتى وبلىسى، ەلتاي اۋىلىنىڭ تۇرعىنى ءورت ءسوندىرۋ بولىمىنە تەلەفون سوعىپ، ۇيىنە جاقىن اۋماقتا كەپكەن ءشوپتىڭ ورتەنىپ جاتقانى تۋرالى حابارلاعان.

ءورت سوندىرۋشىلەر قوڭىراۋعا ءمان بەرمەگەن. ءورت ورنىنا اكىمدىك وكىلى جەتىپ، جەرگىلىكتى تۇرعىندارمەن بىرگە قولدان جاسالعان قۇرالدارمەن ءورتتى سوندىرۋگە ارەكەتتەنگەن. ءورت ءسوندىرۋ قىزمەتى جالىندى سوندىرۋگە تەك 22:40- تا، وت تالاپ قويۋشىنىڭ ۇيىنە جەتكەن كەزدە عانا كىرىسكەن. سالدارىنان ءۇي ورتەنىپ، اۋىل تۇرعىنىنا 11,9 ميلليون تەڭگە ماتەريالدىق شىعىن كەلتىرىلگەن.

وسىعان بايلانىستى ازامات ەلتاي اۋىلدىق وكرۋگى اكىمى اپپاراتىنىڭ جانە ءورت ءسوندىرۋ قىزمەتىنىڭ ءورت كەزىندەگى ارەكەتسىزدىگىن زاڭسىز دەپ تانۋ جانە وسىعان بايلانىستى كەلتىرىلگەن ماتەريالدىق شىعىندى وتەۋدى تالاپ ەتىپ سوتقا جۇگىنگەن.

- ءورت ءسوندىرۋ قىزمەتىنىڭ ارەكەتسىزدىگىن زاڭسىز دەپ تانىپ، كەلتىرىلگەن ماتەريالدىق شىعىندى 11,9 ميلليون تەڭگەنى وتەۋگە مىندەتتەدى. ءورت ءسوندىرۋ قىزمەتى بۇل شەشىمگە شاعىم ءتۇسىردى. الماتى وبلىستىق سوتى ءىس ماتەريالدارىن زەردەلەي كەلە، ءبىرىنشى ساتىداعى سوتتىڭ شەشىمى زاڭدى جانە نەگىزدى دەگەن قورىتىندىعا كەلدى. ءىس بويىنشا ۇكىم وزگەرىسسىز قالدىرىلدى، - دەپ حابارلادى وبلىستىق سوتتان.

ەسكە سالايىق، بۇعان دەيىن الماتى وبلىسىندا تۇتىنۋشى قۇقىعىنىڭ بۇزىلۋى 68 پايىزعا وسكەنىن جازعانبىز.

اۆتور

دوسبول اتاجان