قويشىنىڭ قىزى الەمدىك ارۋلار بايقاۋىندا موڭعوليانىڭ نامىسىن قورعايدى

استانا. KAZINFORM - دۇنيەجۇزىلىك سۇلۋلار دوداسىندا موڭعوليا اتىنان قويشىنىڭ قىزى قاتىساتىن بولىپتى. «Miss Universe 2024» (الەم ارۋى 2024) بيىلعى 16-قاراشادا مەكسيكانىڭ استاناسى مەحيكودا، وسىمەن 76-رەت وتپەك. وعان موڭعوليا اتىنان «Miss Universe Mongolia» مارتەبەسىنە يە نومينزۋل زاندان قاتىسادى، دەپ حابارلايدى inbusiness.kz سايتىنىڭ ءتىلشىسى.

نومينزۋل موڭعوليانىڭ بۋلگان ايماعىنداعى موگود سومونىندا (اۋىلىندا) قويشىنىڭ وتباسىندا دۇنيەگە كەلگەن. سوندا ءوسىپ، بوي جەتكەن. بارلىق اۋىل بالاسى قۇرالپى بالالىق شاعى قوي باعىپ، اتقا ءمىنىپ، سيىر ساۋىپ، قوراداعى قارا جۇمىسپەن جانە ءۇي شارۋاشىلىعىمەن وتكەن.

الايدا، جەڭىمپاز رەتىندە الەمدىك «Miss Universe 2023» دوداسىنا قاتىسا المادى: حالىقارالىق بايقاۋ باستالعان كەزدە كامەلەت جاسقا تولماعان ەدى.

ءبىر جىل وتكەننەن كەيىن «Miss Universe Mongolia» ۇيىمىنىڭ سۇراۋىمەن 18 جاستان اسقان نومينزۋل زاندان 2024-جىلعى الەمدىك بايقاۋعا موڭعوليا اتىنان قاتىسۋشى رەتىندە بەكىتىلە الدى. وسىدان كەيىن ونىڭ تۇلعاسىنا بۇكىل حالىقارالىق قوعامداستىق نازار اۋداردى.

سونىڭ ىشىندە، ينتەرنەتتىڭ اعىلشىن جانە يسپان ءتىلدى سەگمەنتتەرى: «نە دەگەن سۇلۋلىق!»، «موڭعوليادا قويشىنىڭ قىزى وسىنداي بولسا...» دەپ شىعىس قىزىنا تامسانىپ، شىن ءتانتى بولۋدا. ءۇرىپ اۋىزعا سالعانداي كوركەم موڭعول مودەلى، سۇلۋلىق حانشايىمى نومينزۋل زانداننىڭ اتىنا نەبىر ەپيتەتتەر مەن ساقتاۋ-كومپليمەنتتەر توقتاۋسىز جاۋىپ جاتىر.

نومينزۋل زاندان تۋرالى 10 فاكتى:

ول - اۋىلدىڭ قىزى، موگود سومونىندا 2006-جىلى دۇنيەگە كەلگەن.

ول بۇگىندە موڭعول استاناسى ۇلانباتىردا تۇرادى.

ول ۇلانباتىرداعى موڭعوليا ۇلتتىق ۋنيۆەرسيتەتىنىڭ ستۋدەنتى.

ول - بولاشاق الەۋەتتى ەسەپشى: ۋنيۆەرسيتەتتەن بۋحگالتەرلىك ەسەپ بويىنشا باكالاۆر دارەجەسىن الىپ شىقپاق.

ونىڭ بويى - 5 فۋت 8 ديۋيم (بىزشە شامامەن 175 سانتيمەتر).

2022-جىلعى 11-قازاندا ۇلانباتىرداعى سۇلۋلار بايقاۋىندا ەڭ ۇزدىك توپ-مودەل اتاندى.

التىن بەسىگىنەن كىندىگى ۇزىلمەگەن قىز. اۋىلدان جەرىنبەي، تۋعان جەرىنە ءجيى بارىپ تۇرادى. مىسالى، 2022-جىلعى 4-شىلدەدە موگودتا قىدىرىپ جۇرگەنىن الەۋجەلىدە جاريالادى. 2023-جىلعى 26-شىلدەدە بۋلگان ايماعىنىڭ حيشيگ-ءوندور كەنتىندەگى تۋىستارىنا بارعانىن حابارلادى.

2023-جىلعى 11-تامىزدا اقپارات قۇرالدارى موڭعوليانىڭ ءتاجدى ارۋىنىڭ سيىر ساۋىپ وتىرعانىن سيۋجەت ەتتى. نومينزۋل ءۇشىن بۇل تاڭسىق ەمەس ەدى.

2023-جىلعى 10-قازاندا نومينزۋل ۇلانباتىرداعى «زايسان حيلل» سارايىندا وتكەن «الەم ارۋى موڭعوليا-2023» كونكۋرسىندا باق سىناپ، باسقا 16 سۇلۋ بيكەشپەن باسەكەلەستى. نومينزۋل الدىنا قارا سالماي، تيتۋلدى جەڭىپ الدى، باسىنا ءتاج كيدى.

2023 -جىلعى 19 قازاندا ونىڭ سول جىلعى «الەم ارۋى» جاھاندىق بايقاۋىنا قاتىسا المايتىنى بەلگىلى بولدى. «Miss Universe 2023» بايقاۋى بىلتىر سالۆادور ەلىنىڭ استاناسى سان-سالۆادوردا 18-قاراشادا وتكەن بولاتىن. وندا موڭعوليانى ەكىنشى ۆيتسە-ميسس، 23 جاسار نامۋۋنزۋل باتماگناي (باتماگناين نامۋۋنزۋل) الماستىردى.

ەسەسىنە، نومينزۋل زاندانعا دۇنيەجۇزىلىك كونكۋرستا بيىل «الەم ارۋى» اتانۋ مۇمكىندىگى بەرىلىپ وتىر. الەۋمەتتىك جەلىدە نومينزۋل تۋرالى جاھان جۇرتشىلىعى «next top model» ،«Crown her (ءتاج سونىكى!، "she’s the winner" (ول جەڭىمپاز) دەپ پىكىر جازۋدا.

ەگەر ول شىنىمەن دۇنيەجۇزىلىك بايقاۋدىڭ تاجىنە قول جەتكىزسە، ءوز ايماعىنىڭ تاريحىندا وسى اتاققا قول جەتكىزگەن تۇڭعىش بويجەتكەنگە اينالادى. جالپى، "الەم ارۋ" بايقاۋىندا شىعىس ارۋلارى ءجيى جەڭە بەرمەيدى. 1952 -جىلدان بەرى جىلدا وتەتىن بۇل جاھاندىق كونكۋرستا ازيا اتىنان 4 رەت فيليپپين، 3 رەت ءۇندىستان، 2 رەت جاپونيا، 1 رەت ليۆان ارۋى عانا جەڭىمپاز اتانعان ەكەن.

"مەن بۇل كونكۋرسقا ەكى باستى ماقساتپەن قاتىسىپ وتىرمىن. بىرىنشىدەن، ءوز ەلىمنىڭ اتىن الەمدىك ارەنادا قورعاپ، داڭقىن اسىرۋ، ەكىنشىدەن، تانىستارىمنىڭ شەڭبەرىن كەڭەيتىپ، كىل مىقتىلاردان ۇيرەنۋ"، - دەيدى نومينزۋل زاندان.

جالپى العاندا، موڭعوليا ءوز تاريحىندا سۇلۋلاردىڭ جاھاندىق الامانىنا وسىمەن ءۇشىنشى رەت قاتىسىپ وتىرعان كورىنەدى. العاش رەت 2018-جىلعى 17 قازاندا ەل استاناسى ۇلانباتىرداعى Corporate Hotel and Convention Centre كونتسەرتتىك زالىندا ۇيىمداستىرىلعان "الەم ارۋى موڭعوليا" ۇلتتىق بايقاۋىندا دولگيون دەلگەرجاۆ موڭعول تاريحىنداعى سۇلۋلار ءتاجىن كيگەن تۇڭعىش بويجەتكەنگە اينالدى.

2019 -جىلعى 20 قىركۇيەكتە UB Palace كونسەرتتىك زالىندا وتكەن ەكىنشى ۇلتتىق بايقاۋدا بۇل تيتۋلدى گۋنزايا بات- ەردەنە جەڭىپ الدى. كوۆيد پاندەمياسىنا بايلانىستى 2020، 2021 جانە 2022 -جىلدارى بايقاۋ وتكىزىلمەگەن.