بۇل - ءورت سوندىرۋشىلەر مەن قۇتقارۋشىلارعا ارنالعان زاماناۋي بازانى قۇرۋدىڭ ءبىرىنشى كەزەڭى. نىسان قازاقستان قۇتقارۋشىلارى قورىنىڭ قاراجاتى ەسەبىنەن تەز قۇراستىرىلاتىن كونسترۋكسيالاردان سالىنعان.
جاڭا ءورت ءسوندىرۋ ءبولىمى التى تەحنيكاعا ارنالعان جانە شامامەن 30 مىڭ ادام تۇراتىن سەگىز ەلدى مەكەندى قورعايدى.
كەشەن اۋماعىندا توتەنشە جاعدايلار كەزىندە قۇتقارۋ اۆياتسياسىن تارتۋعا ارنالعان تىكۇشاق الاڭى ورنالاسقان.
مۇندا سۋبۇرقاقتارى، كۇركەسى، باربەكيۋ الاڭى مەن جىلقى مۇسىندەرى بار دەمالىس ورىندارى جابدىقتالعان.
عيماراتتا كەزەكشى قاراۋىلدارعا ارنالعان بولمەلەر، وقۋ سىنىبى، اس ءۇي، جاتىن بولمەلەر جانە پسيحولوگيالىق جەڭىلدەۋ بولمەسى قاراستىرىلعان.
جەكە قۇرامنىڭ تاۋلىك بويى قىزمەت اتقارۋىنا، دايىندىق جۇرگىزۋىنە جانە دەمالۋىنا قاجەتتى جاعدايلار جاسالعان.
سالتاناتتى ءراسىم بارىسىندا ت ج م باسشىسى جاڭا دەپونىڭ جابدىقتالۋىمەن جانە ءورت سوندىرۋشىلەردىڭ قىزمەت ەتۋ جاعدايلارىمەن تانىستى. اشىلۋ ءراسىمى قۇتتىقتاۋلارمەن، ىزگى تىلەكتەرمەن جانە ۆەدومستۆولىق ناگرادالاردى تابىستاۋمەن جالعاستى.
نىساننىڭ قۇرىلىسىنا قوسقان ۇلەسى ءۇشىن جەرگىلىكتى اتقارۋشى ورگانداردىڭ وكىلدەرى، كاسىپكەرلەر، ت ج م قىزمەتكەرلەرى مەن اۋىل تۇرعىندارى ماراپاتتالدى.
جاڭا ءورت ءسوندىرۋ ءبولىمىنىڭ سيمۆوليكالىق كىلتىن مينيستر №33 ءورت ءسوندىرۋ ءبولىمىنىڭ باستىعى سۇلتان تاكيشيەۆكە تابىس ەتتى.
ءبىرىنشى كەزەڭ اياقتالىپ، جاڭا ءورت ءسوندىرۋ ءبولىمى ءوز مىندەتتەرىن ورىنداۋعا كىرىسەدى. الدا كۇندەلىكتى كەزەكشىلىك، جاتتىعۋلار مەن شاقىرتۋلارعا شىعۋ جۇمىستارى كۇتىپ تۇر. قوياندى جانە كورشىلەس اۋىلداردىڭ تۇرعىندارى ءۇشىن بۇل ءورت ءسوندىرۋ بولىمشەلەرىنىڭ جاقىن ورنالاسىپ، توتەنشە جاعدايلار كەزىندە كومەكتىڭ جىلدامىراق جەتەتىنىن بىلدىرەدى. دەپونىڭ اشىلۋى سەلينوگراد اۋدانىنداعى ورتكە قارسى قىزمەتتى دامىتۋدىڭ جاڭا كەزەڭىنە جول اشتى.
وسىعان دەيىن ەلىمىزدە 237 ەرىكتى ءورت ءسوندىرۋ بەكەتى سالىنعانىن جازعانبىز.