قويان-قولتىق ۇرىستان ايەلدەر اراسىنداعى الەم چەمپيونى اتانعان قازاق پوليتسەي

اتىراۋ. KAZINFORM - اتىراۋ وبلىسىنىڭ پوليتسياسىندا جۇمىس ىستەيتىن قىز-كەلىنشەكتەر از ەمەس. سونىڭ ءبىرى - قويان-قولتىق ۇرىستان ايەلدەر اراسىنداعى الەم چەمپيونى، پوليتسيا اعا لەيتەنانتى ديانا جۇماعازيەۆا. قازىر اتىراۋ قالاسىندا كامەلەتكە تولماعاندار ءىسى جونىندەگى ۋچاسكەلىك پوليتسيا ينسپەكتورى بولىپ جۇمىس ىستەيدى.

ءوزىنىڭ ايتۋىنشا، بالا كەزىنەن پوليتسيادا جۇمىس ىستەۋدى ماقسات ەتكەن. سول ماقساتپەن م. بوكەنبايەۆ اتىنداعى زاڭ ينستيتۋتىن بىتىرگەن. قۇقىق قورعاۋ ورگانىنداعى قىزمەتىن ۋچاسكەلىك پوليتسيا ينسپەكتورىنىڭ كومەكشىسىنەن باستاعان.

«ماعان بۇل ماماندىق نەسىمەن ۇنايدى؟ ويتكەنى، مەن بىرەۋگە كومەكتەسكەندى، كىشكەنتاي بالالاردى، بىرەۋدەن ءزابىر كورگەن جانداردى قورعاۋدى ۇناتاتىن ەدىم. بالا كەزىمنەن ادىلەتتى بولۋعا، ءار ءىستى جاۋاپكەرشىلىكپەن اتقارۋعا ۇيرەنگەنمىن. بۇل اسىرەسە، پوليتسيا قىزمەتكەرلەرىنە ءتان بولۋى كەرەك. قازىرگى قىزمەتىم جاسوسپىرىمدەر اراسىنداعى قىلمىستىڭ الدىن الۋمەن، اشۋمەن بايلانىستى بولعاندىقتان، وسى قاعيدالاردى ۇستانامىن»، - دەيدى ديانا جۇماعازيەۆا.

ونىڭ پىكىرىنشە، جاسوسپىرىمدەردىڭ ءبارى بىردەي ەمەس. وتباسىنداعى تاربيەگە، ارالاساتىن ورتاسىنا بايلانىستى ولاردىڭ مىنەزىندە وزگەرىستەر بولۋى مۇمكىن.

«جامان ادام بولمايدى عوي. اسىرەسە، جاس وسپىرىمدەردىڭ اراسىندا ءتۇرلى تەرىس ارەكەت جاساۋعا بەيىم تۇراتىنى كەزدەسەدى. ولاردىڭ مۇنداي ارەكەتكە بارۋ سەبەبىن زەرتتەۋ كەرەك. بالكىم، كەيبىرى بالالىق اۋەستىكپەن، ال، وزگەسى اتا-اناسىنا، دوستارىنا رەنجىگەننەن وسىنداي تەرىس قادام جاساۋى مۇمكىن. سول سەبەپتەن، جاس وسپىرىمدەرمەن اشىق سويلەسەمىن. ەشتەڭەنى جاسىرماۋدى سۇرايمىن. راس، كەيدە بىرەۋىمەن جىلى، وزگەسىمەن ازداپ قاتقىل سويلەسۋگە تۋرا كەلەدى. ويتكەنى، ءبىزدىڭ ماقساتىمىز - قۇقىق بۇزعان جاس ءوسپىرىمدى جازالاۋ ەمەس، ولاردى تەرىس جولعا تۇسۋدەن ساقتاندىرۋ، قىلمىسكەر اتانۋدان قورعاۋ. ەڭ باستىسى، جاس وسپىرىمدەردى قوعامعا پايدالى بولۋعا تاربيەلەۋ»، - دەيدى پوليتسيا اعا لەيتەنانتى.

ديانا جۇماعازيەۆا جۇمىسپەن عانا شەكتەلمەي، سپورتتىڭ كيكبوكسينگ جانە قويان-قولتىق ۇرىس تۇرىمەن شۇعىلدانادى. ول - جاستار اراسىنداعى قازاقستاننىڭ چەمپيونى، قويان-قولتىق ۇرىستان ايەلدەر اراسىنداعى الەم چەمپيونى.

«بالا كەزىمدە انام مەنى سۋرەت سالۋ، ءبي سەكىلدى ءتۇرلى ۇيىرمەگە اپاردى. ءبىراق، كوڭىلىم مۇنداي ۇيىرمەلەردى قالامادى. جەتى جاسىمدا تاەكۆوندومەن اينالىسۋعا بەل بۋدىم. ءۇش جىلدان كەيىن كيكبوكسينگكە اۋىستىم. ال، جوعارى وقۋ ورنىندا وقىعاندا قويان-قولتىق ۇرىستى مەڭگەرۋدى كوزدەدىم. فيزيكالىق تۇرعىدان مىقتى بولۋ ءۇشىن سپورتتىڭ جەكپە-جەك تۇرلەرىن تاڭدادىم»، - دەيدى ديانا جۇماعازيەۆا.

ەسكە سالا كەتەلىك، بۇدان بۇرىن بۇگىن اتىراۋلىق قىز-كەلىنشەكتەر قوعامدىق كولىكپەن تەگىن قاتىناپ جۇرگەنىن جازعان ەدىك.

 

اۆتور
جولداسبەك شوپەعۇل