قوي جۇنىنە كارتوپ ەككەن

  جىل سايىن ارناسى ءتۇسىپ كەلە جاتقان داريا سۋىنىڭ تاپشىلىعىن ەسىك الدىنا باۋ- باقشا ەگەتىن اۋىلداعىلار دا انىق سەزىنىپ وتىر.

ءبىراق ويلانسا ونىڭ دا امالى تابىلادى ەكەن. قارماقشى اۋدانى اقجار اۋىلىنىڭ تۇرعىنى قوي ءجۇنى مەن ساباندى ارالاستىرىپ، باقشا ەگىپ وتىر.

تالعات لەكەروۆ بۇل تىڭ كاسىپتى 3 جىل بۇرىن باستاپتى. اۋەلگىدە YouTube جەلىسىنەن قوي جۇنىنە كارتوپ ەگىپ، الاقانداي جەردەن ءتاپ- ءتاۋىر ءونىم الىپ وتىرعانداردى كورىپ، بۇل جاڭالىقتى وزىنشە جەتىلدىرۋدى ءجون كورەدى. جۇنگە سابان قوسىپ، كارتوپتان كەيىن ءسابىز ەگۋدى قولعا الىپتى.

- بيىل وعان كوڭ قوسىپ، ىزدەنىستى ۇلعايتا ءتۇستىم. سۋدى قولمەن سەبەزگىلەتىپ قويساڭىز جەتكىلىكتى، اراسى دىمقىل تارتىپ، ىلعال ساقتالىپ تۇرادى. وسىنداي ادىسپەن بيىل 300 كيلوداي كارتوپ جيناپ، تامىز ايىندا ءسابىز ەگىپ قويدىم. از كۇندە ونى دا جيناي باستايمىز. قىزاناق پەن قياردى دا وسى تاسىلمەن ەگىپ وتىرمىن. ءجۇن مەن سابان تەز ءشىرىپ، از كۇندە كادىمگى قارا توپىراققا اينالىپ شىعا كەلەدى، - دەيدى ول.

تالعاتتىڭ تاسىلىنە قىزىعاتىندار كوپ. اسىرەسە، جاستار جاعى ەسىگىنىڭ الدىن كوگەرتىپ، كەرەك كەزىندە اياداي اۋىلعا جاڭالىق اكەلگەن كەيىپكەرىمىزدەن كەڭەس سۇرايدى.

قىزىلورداعا بارعاندا قالا ىرگەسىندەگى سابالاق ساياجايىنان ماراكۋيا كوشەتىن ساتىپ اكەلگەن تالعات ونى دا ەگىپ كوردى. برازيليا توپىراعىندا ءونىپ، ازيانىڭ وڭتۇستىك- شىعىسىندا، وڭتۇستىك افريكادا، اۋستراليادا، سوناۋ گاۆاي ارالدارىندا وركەن جايعان ماراكۋياڭىز سىردىڭ جەرىن جاتىرقاعان جوق. «تەك ارالارىمىز توسىرقاپ، گۇلدەگەن كەزىندە دۇرىس توزاڭداماي قالدى»، دەيدى تالعات. ۇلكەندىگى تاۋىق جۇمىرتقاسىنداي جەمىس سالعان ەكزوتيكالىق اعاشتى الداعى ۋاقىتتا ەرەكشە ادىسپەن كۇتىمگە الماق.

قىزىلوردا

مۇرات جەتپىسبايەۆ

egemen.kz