قوسىمشا ءبىلىم بەرۋ ۇيىمدارىن اشۋ كەزىندە حابارلاما جاساۋ ءتارتىبى ەنگىزىلەدى

استانا. KAZINFORM - بۇگىن ءماجىلىستىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ءبىلىم بەرۋ جانە بالانىڭ قۇقىقتارىن قورعاۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن ءبىرىنشى وقىلىمدا ماقۇلداندى.

زاڭ جوباسىن قابىلداۋدىڭ ماقساتى -قازاقستان رەسپۋبليكاسىنىڭ مەكتەپكە دەيىنگى، ورتا، تەحنيكالىق جانە كاسىپتىك، ورتا بىلىمنەن كەيىنگى، قوسىمشا ءبىلىم بەرۋ جانە بالالاردىڭ قۇقىقتارىن قورعاۋ سالاسىنداعى زاڭناماسىن جەتىلدىرۋ، سونداي-اق قۇقىقتىق ولقىلىقتار مەن كولليزيالاردى رەتتەۋ.

«زاڭ جوباسى اياسىندا كەلەسى نوۆەللالار ۇسىنىلدى. اتاپ ايتقاندا، قوسىمشا ءبىلىم بەرۋ ۇيىمدارى ءۇشىن حابارلاما جاساۋ ءتارتىبى ەنگىزىلەدى. قازىرگى كەزدە ورتا جانە تەحنيكالىق كاسىپتىك ءبىلىم بەرۋ ليتسەنزيالانادى، مەكتەپكە دەيىنگى ءبىلىم بەرۋدە حابارلاما جاساۋ ءتارتىبى قولدانىلادى. الايدا، قوسىمشا ءبىلىم بەرۋ جۇيەسىندە ليتسەنزيالاۋ نەمەسە حابارلاما جاساۋ ءتارتىبى بۇگىنگى كۇنگە دەيىن قولدانىلماي كەلگەن. وسىعان وراي، قوسىمشا ءبىلىم بەرۋ قىزمەتتەرىن ۇسىنۋ ساپاسىن ارتتىرۋ، بالالاردىڭ قاۋىپسىزدىگىن باقىلاۋ ماقساتىندا زاڭ جوباسىندا قوسىمشا ءبىلىم بەرۋ ۇيىمدارىنا حابارلاما ەنگىزۋ ءتارتىبى ۇسىنىلادى»، - دەدى وقۋ- اعارتۋ ءمينيسترى عاني بەيسەمبايەۆ.

ونىڭ ايتۋىنشا، قوسىمشا ءبىلىم بەرۋ ۇيىمدارى رۇقسات قۇجاتتارىن ۇسىنا وتىرىپ، ءبىلىم بەرۋ سالاسىنداعى ساپانى قامتاماسىز ەتۋ جونىندەگى اۋماقتىق دەپارتامەنتتەردى ءوز قىزمەتىنىڭ باستالعانى نەمەسە توقتاتىلعانى تۋرالى حاباردار ەتۋگە مىندەتتى بولادى. اتالعان ۇسىنىم حالىقارالىق تاجىريبەدە كەڭىنەن قولدانىلادى (بەلارۋس، وزبەكستان)، ءتىپتى قوسىمشا ءبىلىم بەرۋ ۇيىمدارى ءۇشىن كەيبىر مەملەكەتتەردە ليتسەنزيالاۋ تالاپتارى كەزدەسەدى (ر ف، ۇلى بريتانيا، سينگاپۋر).

جەكەمەنشىك مەكتەپتەردە وقيتىن الەۋمەتتىك وسال وتباسىلاردان شىققان بالالارعا كومەك بەرىلەدى.

«جەكە مەكتەپتەردە وقيتىن الەۋمەتتىك وسال وتباسىلاردان شىققان بالالارعا مەملەكەتتىك ءبىلىم بەرۋ تاپسىرىسى اياسىندا الەۋمەتتىك كومەك كورسەتۋ ەسكەرىلگەن. قازىرگى كەزدە مەملەكەتتىك مەكتەپتەردە وقيتىن حالىقتىڭ الەۋمەتتىك وسال توپتارى (ح ءا و ت ) ساناتىنداعى 500 مىڭنان استام بالاعا جالپىعا مىندەتتى ءبىلىم بەرۋ شەڭبەرىندە تاماقتانۋمەن قامتاماسىز ەتۋ جانە كيىم، مەكتەپ كەرەك- جاراقتارىن ساتىپ الۋ تۇرىندە كومەك كورسەتىلەدى. الايدا، جەكەمەنشىك مەكتەپتەردە وقيتىن ح ءا و ت ساناتىنداعى 25 مىڭنان استام بالا الەۋمەتتىك كومەك الا الماۋدا. وسىعان وراي مەنشىك نىسانىنا قاراماستان ح ءا و ت ساناتىنداعى بارلىق بالالارعا تەڭ كومەك كورسەتۋ ماقساتىندا جەرگىلىكتى اتقارۋشى ورگانداردىڭ قۇزىرەتى كەڭەيتىلىپ جاتىر»، - دەدى ع. بەيسەمبايەۆ.

بۇدان بولەك، تەحنيكالىق جانە كاسىپتىك ءبىلىم بەرۋ ۇيىمدارىندا ونلاين وقىتۋ جانە اكادەميالىق ۇتقىرلىق ەنگىزىلەدى.

«قازىرگى كەزدە ەڭبەك نارىعىنىڭ تالاپتارىنا جاۋاپ بەرەتىن مامانداردى ساپالى دايارلاۋدى ىسكە اسىرۋ ءۇشىن كوللەدجدەر جۇيەسىنە ونلاين وقىتۋدى ەنگىزۋ ۇسىنىلدى. بۇل وزگەرىس وندىرىستەن قول ۇزبەي، كادرلاردى دايارلاۋ ماسەلەسىن شەشۋگە باعىتتالعان جانە ستۋدەنتتەرگە وقۋ مەن ەڭبەك قىزمەتىن ۇيلەستىرە وتىرىپ، جەكە باعدارلامالار بويىنشا وقۋعا مۇمكىندىك بەرۋ كوزدەلگەن»، - دەدى ع. بەيسەمبايەۆ.

ونلاين وقىتۋ فورماتىن ەنگىزۋدىڭ نەگىزگى ماقساتى - كوللەدجدەرگە سالا ساراپشىلارى مەن وزىق تەحنولوگيالاردى تارتا وتىرىپ، ءبىلىم بەرۋ باعدارلامالارىن يكەمدى بەيىمدەۋ، ال ستۋدەنتتەرگە جۇمىستى ۇزبەي-اق ناقتى جاعدايلاردا پراكتيكالىق داعدىلاردى قالىپتاستىرۋعا جاعداي جاساۋ.

«تەحنيكالىق جانە كاسىپتىك ءبىلىم بەرۋ جۇيەسىنە اكادەميالىق ۇتقىرلىقتى ەنگىزۋ ستۋدەنتتەرگە قازىرگى ۋاقىتتا ءارقاشان قول جەتكىزە بەرمەيتىن وزىق ينفراقۇرىلىمى، جابدىقتارى مەن رەسۋرستارى بار كوللەدجدەردە وقۋعا مۇمكىندىك بەرەدى. وسىنىڭ ارقاسىندا تولىق جابدىقتالماعان وقۋ ورىندارىنىڭ ستۋدەنتتەرى حالىقارالىق ستاندارتتار بويىنشا جابدىقتالعان كوللەدجدەر بازاسىندا ءبىلىم بەرۋ قىزمەتتەرىن الا الادى. ماتەريالدىق- تەحنيكالىق بازانى جاڭعىرتۋعا باعىتتالعان «جاس مامان» جوباسى 180 كوللەدجدە جابدىقتاردى جاڭارتۋعا جانە نەگىزگى باعىتتار بويىنشا 234 قۇزىرەتتىلىك ورتالىعىن قۇرۋعا مۇمكىندىك بەردى. مۇنداي ورتالىقتاردا ستۋدەنتتەر زاماناۋي سالالاردىڭ تالاپتارىنا سايكەس كەلەتىن وزىق زەرتحانالاردى، جوعارى ساپالى وقۋ ماتەريالدارىن جانە جابدىقتاردى پايدالانا الادى»، - دەدى مينيستر.

مۇنىمەن قوسا، بالانى قابىلدايتىن كاسىبي وتباسىلار ينستيتۋتى جۇمىسىن باستايدى.

«قيىن جاعدايعا تاپ بولعان بالالارعا سەنىم مەن جىلۋلىق اتموسفەراسىن قالىپتاستىرۋ، پسيحو-ەموتسيونالدى جاعدايىن ساقتاۋ، كۇيزەلىستەن قورعاۋ، قوعامدا تابىستى الەۋمەتتەندىرۋ ماقساتىندا وتباسىلىق ورنالاستىرۋدىڭ جاڭا نىسانىن ەنگىزۋ ۇسىنىلادى. بالانى قابىلدايتىن كاسىبي وتباسىلار ينستيتۋتىن ەنگىزۋ كەزىندە ءتيىستى جاڭا تاسىلدەر ازىرلەندى. بالالار انىقتالعاننان كەيىن، بالالالار ۇيىنە ەمەس، بىردەن وتباسىلارعا تابىستالادى. ءاربىر بالا اتا-انانىڭ نازارىمەن جانە قامقورلىعىمەن قامتىلۋى ءۇشىن ءبىر كاسىبي وتباسىندا بالالار سانى تەن اسپايدى. بالانى قابىلدايتىن كاسىبي وتباسى مارتەبەسىن الۋعا ۇمىتكەر وتباسىلار پسيحولوگيالىق دايارلىقتان وتەدى»، - دەدى عاني بەيسەمبايەۆ.

بالانى قابىلدايتىن كاسىبي وتباسىلار ينستيتۋتى جۇمىسىن باستايتىنى تۋرالى جازدىق.