قوستانايداعى جاتاقحاناعا احمەت بايتۇرسىنوۆقا ارناپ مۋرال سالىندى

قوستاناي. KAZINFORM - قوستانايداعى Allur ماشيناقۇرىلىسى كەشەنى جاتاقحاناسىنىڭ قابىرعاسىنا قازاقتىڭ ۇلى اعارتۋشىسى احمەت بايتۇرسىنوۆقا ارنالعان مۋرال سالىندى.

زاۋىتتىڭ باسپا ءسوز قىزمەتىنەن حابارلانعانداي، مۋرالدى سالۋداعى ماقسات - قازاقتىڭ ءبىرتۋار ۇلىنىڭ قازاق ءتىلى مەن مادەنيەتىن دامىتۋعا قوسقان ۇلەسىن پاش ەتۋ، ۇلتتىڭ جاندانۋى جولىندا قالدىرعان ءىزىن تانىتۋ، ەستە ساقتاۋ.

«ءبىز وسى ارقىلى احمەت بايتۇرسىنوۆتىڭ ەڭبەكتەرىن ەسكە الىپ، ونىڭ ۇلت بىرلىگىن قالىپتاستىرۋعا قوسقان ولشەۋسىز ۇلەسى ءۇشىن قۇرمەتىمىزدى بىلدىرگىمىز كەلدى. مۋرالعا ايگىلى عالىمنىڭ «ادامعا ەڭ قىمبات نارسە - جۇرت قامى، جۇرت ءىسى» دەگەن ءسوزى جازىلدى. ءبىز سۋرەتشىلەردەن اعارتۋشىنىڭ تەك بەينەسىن عانا سالىپ قويماي، ونىڭ رۋحىنىڭ بيىكتىگىن كورسەتۋگە دە كۇش سالۋدى سۇرادىق. بۇل ءوز كەزەگىنە مۋرالدىڭ ومىرشەڭ، اسەرلى بولۋىنا ىقپال ەتەدى»، - دەدى كاسىپورىن وكىلدەرى.

بۇل بەينە جەرگىلىكتى جاتاقحانانىڭ كوركىن كەلتىرىپ قانا قويماي ەستەلىك سيمۆولى، ماقتانىش پەن قۇرمەتتىڭ بەلگىسى بولادى. مۋرالدى قوستاناي قالاسى، پرومىشلەننايا كوشەسى 40/ا مەكەنجايىنان كورۋگە بولادى.