قوستانايدا پوليسيا قىزمەتكەرى قىزمەتتىك كولىكپەن ەسىرتكى تاسىمالداعان

استانا. KAZINFORM - قىلمىستىق ءىس قوستاناي وبلىسىنىڭ سوتىندا قارالدى. ەر ادامعا ەسىرتكى زاتتارىن تاراتقان جانە ساقتاعان دەگەن ايىپ تاعىلدى. ول قىزمەت بابىن پايدالانىپ، قىلمىس جاساعان.

قوستاناي پوليسياسىنىڭ ەسىرتكى قىلمىسىنا قارسى كۇرەس باسقارماسى باستىعىنىڭ ورىنباسارى پسيحوتروپتىق زاتتاردى ساتقانى ءۇشىن سوتتالدى. تەكسەرۋ بارىسىندا ونىڭ اۆتوكولىگىنەن اسا ءىرى كولەمدە ساتۋ ءۇشىن زاڭسىز ساقتالىپ، تاسىمالدانعان گاشيش پەن مەتكاتينون تابىلىپ، تاركىلەندى.

ول سونىمەن قاتار، قىسىم كورسەتۋ ارقىلى جازىقسىز ادامداردى وسى قىلمىسقا تارتقان. سوتتالۋشى ءوز كىناسىن مويىنداماي، قورعاۋشىلارىمەن بىرگە قىلمىستىڭ جوقتىعىن العا تارتىپ، اقتاۋدى تالاپ ەتتى. الايدا ونىڭ كىناسى جابىرلەنۋشىلەردىڭ، كۋالاردىڭ ايعاقتارىمەن، تەرگەۋ ارەكەتتەرىنىڭ حاتتامالارى مەن بەينەماتەريالدارىمەن، ساراپتامالىق قورىتىندىلارمەن جانە باسقا دا ءىس ماتەريالدارىمەن تولىق دالەلدەندى.

سوت وعان ءومىر بويىنا مەملەكەتتىك قىزمەتتە قىزمەت اتقارۋعا تىيىم سالا وتىرىپ، 15 جىلعا باس بوستاندىعىنان ايىردى، سونداي- اق «پوليتسيا كاپيتانى» ارنايى اتاعىنان ايىردى. ۇكىم ءالى زاڭدى كۇشىنە ەنگەن جوق.