قوستانايدا الكوگولمەن بايلانىستى قىلمىستار سانى ارتتى

قوستاناي. KAZINFORM - قوستانايدا الكوگولدىك ىشىمدىكتەردى تۇتىنۋعا بايلانىستى قىلمىستار سانى كوبەيىپ وتىر. 2025 -جىلدىڭ العاشقى بەس ايىندا مۇنداي قىلمىستار سانى وتكەن جىلدىڭ سايكەس كەزەڭىمەن سالىستىرعاندا %20,7 عا ارتقان.

وسىعان بايلانىستى جەرگىلىكتى پوليتسيا قىزمەتكەرلەرى ەرىكتىلەرمەن بىرلەسىپ تۇنگى رەيد جۇرگىزدى. ماقسات - 21 جاسقا تولماعان ازاماتتارعا الكوگول مەن تەمەكى ونىمدەرىن زاڭسىز ساتۋ ارەكەتتەرىن انىقتاۋ.

الەۋمەتتىك ەكسپەريمەنت بارىسىندا 19 جانە 20 جاستاعى ەرىكتىلەر دۇكەندەردە زاڭنىڭ ساقتالۋىن تەكسەردى. كوپتەگەن ساۋدا ورىندارىندا ساتۋشىلار زاڭ تالابىن ورىنداعان. الايدا قالانىڭ وڭتۇستىك بولىگىندە ورنالاسقان ءبىر دۇكەندە ولارعا سىرا مەن تەمەكى ساتىلعان. اتالعان قۇقىق بۇزۋشىلىق بويىنشا اكىمشىلىك جاۋاپقا تارتۋ ءۇشىن ماتەريالدار راسىمدەلدى.

جەرگىلىكتى پوليتسيا قىزمەتى باسقارماسىنىڭ اعا ينسپەكتورى ينديرا نۇريەۆانىڭ مالىمەتىنشە، جىل باسىنان بەرى 125 رەيد جۇرگىزىلىپ، 18 دۇكەن يەسى كامەلەتكە تولماعاندارعا الكوگول ساتقان ءۇشىن جاۋاپقا تارتىلعان. تاعى ءبىر ساتۋشى 21 جاسقا تولماعان ادامعا تەمەكى ءونىمىن ساتقان ءۇشىن جاۋاپقا تارتىلدى.