قوستاناي وبلىسىنداعى اۋىلدا ءسىبىر جاراسى انىقتالدى

استانا. KAZINFORM - قوستاناي وبلىسى دەنيسوۆ اۋدانى پريرەچنوە اۋىلىندا ءسىبىر جاراسى انىقتالۋىنا بايلانىستى كارانتين ەنگىزىلدى.

قوستاناي وبلىسىنىڭ ۆەتەريناريا باسقارماسىنىڭ حابارلاۋىنشا، 26-شىلدە كۇنى دەنيسوۆ اۋدانى، سۆەردلوۆ اۋىلدىق وكرۋگى پريرەچنوە اۋىلىنداعى جەرگىلىكتى كاسىپورىندا مال ءولىمى تىركەلگەنى تۋرالى حابارلاما كەلىپ تۇسكەن.

پاتولوگيالىق ماتەريال ىرىكتەلىپ، ءسىبىر جاراسىن تەكسەرۋ ءۇشىن وبلىستىق ۆەتەريناريالىق زەرتحاناعا جىبەرىلدى. 2024 -جىلعى 31-شىلدەدەگى تەكسەرۋ اكتىسىنە سايكەس، وبلىستىق ۆەتەريناريالىق زەرتحانا باكتەريولوگيالىق جانە پتر ادىسىمەن ءسىبىر جاراسىنا ءىرى قارا مالدان الىنعان پاتولوگيالىق ماتەريالىنىڭ ساراپتامالىق اكتىسى بەرىلدى.

— سۆەردلوۆ اۋىلدىق وكرۋگى اكىمىنىڭ 2-تامىزداعى قاۋلىسىمەن پريرەچنوە اۋىلىنىڭ اۋماعىندا كارانتين بەلگىلەندى. رەسپۋبليكالىق ەپيزووتياعا قارسى جاساقتىڭ قوستاناي فيليالى ينفەكتسيا وشاعىندا وقشاۋلاۋ جانە جويۋ شارالارىن جۇرگىزۋ جۇمىستارى باستالدى،- دەلىنگەن حابارلامادا.

ءسىبىر جاراسىمەن كۇرەسۋ ەرەجەسىنە سايكەس كارانتين جانۋارلاردىڭ سوڭعى ولىمىنەن، ياعني 15 كۇننەن كەيىن، سونداي- اق زارداپ شەككەن ايماقتا بارلىق ۆەتەريناريالىق ءىس- شارالار جۇرگىزىلگەننەن كەيىن جويىلادى.

سوڭعى بەس كۇندە ءىرى قارا مالدىڭ ءولىمى تىركەلگەن جوق، مالدىڭ جالپى جاعدايى قاناعاتتانارلىق، كلينيكالىق بەلگىلەرى بايقالعان جوق.