قوستاناي وبلىسىندا ۆەيپتەردى ءىرى مولشەردە ەلگە كىرگىزىپ، تاراتقان كۇدىكتىگە ۇكىم شىقتى

استانا. KAZINFORM - قوستاناي وبلىسىنىڭ اۋماعىنا ۆەيپتەردى، وعان ارنالعان حوش يىستەندىرگىشتەر مەن سۇيىقتىقتاردى زاڭسىز اكەلۋ فاكتىسى بويىنشا سوتقا دەيىنگى تەرگەپ-تەكسەرۋ اياقتالدى، دەپ حابارلايدى قارجىلىق مونيتورينگ اگەنتتىگى.

قوستاناي تۇرعىنى ءوزى قۇرعان تەلەگرام- ارناسى ارقىلى قازاقستان رەسپۋبليكاسىنىڭ اۋماعىنا ودان ءارى تاراتۋ ماقساتىندا ۆەيپتەردى زاڭسىز اكەلگەنى انىقتالدى.

ۆەيپتەر قازاقستانعا رەسەي فەدەراتسياسىنان اكەلىنىپ، ءارى قاراي كۋرەرلەر مەن پوچتا جونەلتىلىمدەرى ارقىلى بۇكىل ەل اۋماعىندا تاراتىلعان.

ەلەكتروندى تەمەكى ونىمدەرىن الۋعا وتىنىمدەر 100000 تەڭگەدەن باستالعان. ەلىمىزدە اينالىمىنا تىيىم سالىنعان ۆەيپتەردى وتكىزۋ فاكتىلەرىن جاسىرۋ ماقساتىندا تولەم شەتەل ازاماتىنىڭ بانك كارتاسىنا قابىلدانىپ وتىرعان.

كۇدىكتىنىڭ تۇرعىلىقتى جەرىن ءتىنتۋ بارىسىندا قۇنى 45 ميلليون تەڭگە شاماسىنداعى 7,5 مىڭعا جۋىق ۆەيپ تابىلىپ، تاركىلەندى.

سوت كىنالىگە پروباتسيالىق باقىلاۋدى بەلگىلەي وتىرىپ، 1 جىل باس بوستاندىعىن شەكتەۋ تۇرىندەگى جازا تاعايىندادى.

ايتا كەتەيىك، كۇنى كەشە الماتىداعى ساۋدا ۇيلەرىنىڭ بىرىنەن 5 مىڭ ۆەيپ تاركىلەنگەنىن جازعان ەدىك.

اۆتور
ەربول جانات