قوستاناي وبلىسىندا نەمىس تەحنولوگياسىمەن قۇرعاق ساۋمال وندىرىلەدى

استانا. قازاقپارات - قوستاناي وبلىسىنىڭ كامەنسكۋرالسك اۋىلىندا جىل بويى بيە ساۋىلىپ، قۇرعاق ساۋمال وندىرىلەدى، دەپ حابارلايدى 24kz.

كاسىپورىندا نەمىس تەحنولوگياسى قولدانىلادى. وتاندىق ءونىم ازىرگە ىشكى نارىقتا ساتىلىپ جاتىر. بولاشاقتا ۇلتتىق سۋسىننىڭ ۇنتاقتالعان ءتۇرىن ەكسپورتقا شىعارۋ جوسپارى بار. نەمىستەر جارتى عاسىر بۇرىن قىمىز ءوندىرىسىن جولعا قويىپ، الدەقاشان پاتەنتتەپ العان. ولار بيە ءسۇتىنىڭ قۇنارلىلىعىن جوعالتپاۋدىڭ بارلىق امالىن قاراستىرعان. قازىر سول تەحنولوگيا وسى فەرمادا قولدانىلادى. ساۋۋدان باستاپ دايىن ءونىم شىققانعا دەيىن ارالىق اۆتوماتتاندىرىلعان جۇيەمەن رەتتەلىپ وتىرادى.

ءوندىرىس بارىسىندا ساۋمالدىڭ قۇرامى، تەمپەراتۋراسى ۇنەمى باقىلاۋدا بولادى.

ەۆگەني شەربينين، تەحنولوگ:

- ءسۇت قۇبىرمەن 700 ليترلىك سالقىنداتقىش تانككە كەلىپ تۇسەدى. بۇل جەردە +4 گرادۋسقا دەيىن سالقىنداتىلادى. ودان كەيىن پاستەرلەۋ اپپاراتىندا وڭدەلەدى. تەمپەراتۋرانى باقىلاۋ ارقىلى بيە ءسۇتىنىڭ تابيعي قۇرامىن بارىنشا ساقتاۋعا تىرىسامىز. سوڭىندا سۇيىقتىقتىڭ ءبارى سۋبليماتورلىق كامەرالارعا جىبەرىلەدى. سەيفكە ۇقساس مىنا سۋبليماتورلىق كامەرالاردا ساۋمال مۇزداتىلىپ، قاتىرىلادى. سوسىن ءسال قىزدىرىلىپ، قۇرامىنداعى سۋ بۋعا اينالادى. پايدالى زاتتىڭ ءبارى ساقتالىپ قالادى. جانە قۇرعاق قالپىندا ەكى جىلعا دەيىن قۇنارلىلىعىن جوعالتپايدى.

ال ەندى انا سۇتىمەن تەڭەستىرىلەتىن ساۋمالدىڭ تالاي اۋرۋعا ەم ەكەندىگى بارشاعا ءمالىم. قازىر فەرمادا مىڭنان اسا كوشىم جىلقىسى بار. سونىڭ كۇنىنە 35-40 ساۋىلادى.

ەرمەك تالتىكەيەۆ، فەرما باسشىسى:

- بيىلدان باستاپ ءبىز قىسى-جازى بيە بايلايمىز. ازىرگە كۇنىنە 100-150 ليتر ءسۇت الامىز. بولاشاقتا بۇل كورسەتكىشتى ەكى ەسەگە كوتەرىپ، 300 ليترگە دەيىن ءسۇت ساۋساق دەگەن مەجەمىز بار. سوندا قۇرعاق ساۋمال ءوندىرىسىن جىلىنا 40 تونناعا جەتكىزەمىز. مۇنىڭ سىرتىندا وتاندىق فەرما گەرمانيا كومپانياسىمەن بىرلەسىپ، جىلقى سۇتىنەن كوسمەتولوگيا ونىمدەرىن جانە بالالار مەن سپورتشىلارعا ارنالعان تاعامدار شىعارۋدى جوسپارلاپ وتىر.

24.kz