قوستاناي وبلىسىندا ايەل ەكى بالاسىمەن ءيىس ءتيىپ كوز جۇمدى

قوستاناي وبلىسىنداعى اۋىلداردىڭ بىرىندە اناسى مەن ەكى بالاسى ءيىس ءتيىپ كوز جۇمدى. Kazinform بۇل تۋرالى توتەنشە جاعدايلار دەپارتامەنتىنە سىلتەمە جاساپ حابارلايدى.

«30- قازان كۇنى فەدوروۆ اۋدانى، قورجىنكول اۋىلدىق وكرۋگىنە قاراستى لەسنوە اۋىلىنداعى جەكەمەنشىك ۇيدە قاتتى وتىنمەن جاناتىن پەشتى قولدانۋ كەزىندە 48 جاستاعى ءۇي يەسى ىستان ۋلانىپ، اۋدان اۋرۋحاناسىنا جەتكىزىلدى. 39 جاستاعى ايەل، 10 جانە 15 جاستاعى بالالارى وقيعا ورنىندا كوز جۇمدى»، - دەلىنگەن باسپا ءسوز قىزمەتىنىڭ حابارلاماسىندا.

الدىن الا بولجام بويىنشا، ادام ولىمىنە پەشتىڭ سىرتقى بولىگىندەگى سىلانباعان ساڭىلاۋلار مەن شويىن تاقتاداعى جارىقتاردان ىستىڭ ۇيگە تارالۋى سەبەپ بولدى.

قوستاناي وبلىسىنىڭ توتەنشە جاعدايلار دەپارتامەنتى تۇرعىنداردان ءورت قاۋىپسىزدىگى ەرەجەلەرىن قاتاڭ ساقتاۋىن جانە قاۋىپ تونگەن جاعدايدا 112 نومىرىنە حابارلاسۋىن سۇرايدى.