ف ا و باس ديرەكتورى چيۋي دۋنيۋي قازاقستاندىق شارۋاعا قۇتتىقتاۋ حات جولداپ، ريمدەگى ۇيىمنىڭ باس كەڭسەسىندە وتەتىن ماراپاتتاۋ راسىمىنە شاقىرعان. سالتاناتتى شارا 2026 -جىلعى 12-16-قازان ارالىعىنداعى دۇنيەجۇزىلىك ازىق-تۇلىك اپتالىعى اياسىندا ۇيىمداستىرىلادى.
قۇتتىقتاۋ حاتىندا گۇلنارا قۋانىشبايەۆانىڭ كوشباسشىلىق قاسيەتى، ءوز ىسىنە ادالدىعى جانە اۋىلدىق اۋماقتاردى دامىتۋعا قوسقان ۇلەسى اتالىپ وتكەن.
ءسىز ءوز ەڭبەگىڭىزبەن ايەلدەردىڭ اۋىل شارۋاشىلىعى مەن ازىق-تۇلىك ءوندىرۋ جۇيەسىن قالاي وزگەرتەتىنىن، اۋىل تۇرعىندارىنىڭ تۇرمىسىن قالاي جاقسارتاتىنىن، تابيعي بايلىقتاردى قالاي قورعايتىنىن، جەرگىلىكتى قاۋىمداستىقتاردىڭ مۇمكىندىكتەرىن قالاي كەڭەيتەتىنىن جانە كەلەر ۇرپاققا جاڭا جول اشاتىنىن كورسەتتىڭىز، - دەلىنگەن شاقىرۋ حاتىندا.
«ف ا و-نىڭ 100 قاھارمان ايەلى» باستاماسى 2026 -جىلعى حالىقارالىق شارۋا ايەل جىلى اياسىندا ايەلدەردىڭ اۋىل شارۋاشىلىعى مەن ازىق-تۇلىك ءوندىرۋ جۇيەسىن وزگەرتۋگە، اۋىلدىق اۋماقتاردى دامىتۋعا قوسقان ۇلەسىن تانىتۋعا باعىتتالعان.
ەسەپشىلىكتەن باستالعان ەڭبەك جولى
ءبىلىمى بويىنشا ەكونوميست ءارى زاڭگەر گۇلنارا قۋانىشبايەۆا ەڭبەك جولىن كەڭشاردا ەسەپشى بولىپ باستاعان. كەيىن جەكە شارۋاشىلىق قۇرۋعا بەل بۋىپ، 2007 -جىلى شارۋا قوجالىعىن اشقان.
بۇگىندە شارۋاشىلىقتىڭ جەر كولەمى 3 مىڭ گەكتاردان اسادى. قوجالىق وڭىردەگى اۋىل شارۋاشىلىعى وندىرۋشىلەرىنە مال ازىعىن دايىندايدى. سونىمەن قاتار ءىرى قارا ءوسىرۋ، بورداقىلاۋ جانە سيىر ەتىن وندىرۋمەن اينالىسادى.
گۇلنارا قۋانىشبايەۆا مال ازىعى قورىن قالىپتاستىرۋعا ەرەكشە ءمان بەرەدى. ونىڭ پىكىرىنشە، مال شارۋاشىلىعىنىڭ تۇراقتى دامۋى ساپالى جەم-شوپكە، عىلىمي نەگىزدەلگەن تاسىلدەرگە جانە ۇزاقمەرزىمدى جوسپارلاۋعا بايلانىستى.
ول مامانداندىرىلعان مال ازىعى كورپوراتسياسىن قۇرىپ، جەم-ءشوپ دايىنداۋعا زاماناۋي عىلىمي ادىستەردى ەنگىزۋدى قولدايدى. شارۋانىڭ پايىمىنشا، بۇل مال شارۋاشىلىعىن نىعايتىپ، تۇرعىنداردى ساپالى وتاندىق ونىممەن قامتاماسىز ەتۋگە مۇمكىندىك بەرەدى.
ومىردەگى ۇستانىمىم - قانداي ىسكە كىرىسسەم دە، جاقسى ناتيجەگە جەتۋگە ۇمتىلۋ. ويتكەنى قيىندىق پەن سىناق قايراتتى جاندارعا بەرىلەدى، - دەيدى گۇلنارا ساعىمباي قىزى.
400 سيىرعا ارنالعان فەرما سالىنىپ جاتىر
قازىر شارۋاشىلىقتا ءسۇتتى مال شارۋاشىلىعىن دامىتۋعا ارنالعان جاڭا جوبا جۇزەگە اسىرىلىپ جاتىر.
ول 2025 -جىلى 400 سيىرعا ارنالعان ءسۇت فەرماسىن سالۋ ءۇشىن جەڭىلدەتىلگەن نەسيە الۋعا ءوتىنىم بەرگەن. جوبا 2026 -جىلى سولتۇستىك قازاقستان وبلىسىنىڭ وزىق تاجىريبەسىن تاراتۋ باعدارلاماسى اياسىندا قولداۋ تاپقان.
قۇرىلىس جۇمىستارى ساۋىردە باستالدى. ال قاراشا ايىندا شارۋاشىلىققا 400 باس قاشار اكەلۋ جوسپارلانعان. جاڭا فەرما قوجالىقتىڭ ءوندىرىس اۋقىمىن كەڭەيتىپ، ءسۇت ءوندىرۋ باعىتىن دامىتۋعا مۇمكىندىك بەرمەك.
گۇلنارا قۋانىشبايەۆانىڭ ەڭبەگى بۇعان دەيىن دە ەل كولەمىندە تانىلعان. ول 2021 -جىلى «قازاقستاننىڭ اۋىلدىق جەرلەرىندەگى ايەلدەردىڭ 100 تابىس تاريحى» جوباسىنا ەنگەن. ەندى قوستانايلىق شارۋانىڭ اۋىلدى دامىتۋعا جانە ازىق-تۇلىك قاۋىپسىزدىگىن نىعايتۋعا قوسقان ۇلەسى ف ا و باستاماسى اياسىندا حالىقارالىق دەڭگەيدە مويىندالىپ وتىر.