«قورقىت اتا» ارنايى ەكونوميكالىق ايماعى قۇرىلماق

استانا. KAZINFORM - ۇكىمەتتىڭ 2049 -جىلعى 31-جەلتوقسانعا دەيىنگى كەزەڭگە «قورقىت اتا» ارنايى ەكونوميكالىق ايماعىن قۇرۋ تۋرالى» قاۋلىسى اشىق ن ق ا پورتالىندا جاريالاندى.

قاۋلى پرەمەر-ءمينيسترى ولجاس بەكتەنوۆتىڭ قىزىلوردا وبلىسىنا جۇمىس ساپارى قورىتىندىسى بويىنشا بەرگەن تاپسىرمالارىن ورىنداۋ ماقساتىندا، سونىمەن قاتار ءوڭىردىڭ ەكونوميكالىق ءوسىمىن قامتاماسىز ەتۋ جانە ينۆەستيتسيا تارتۋ ءۇشىن ازىرلەنگەن.

ا ە ا اۋماعى 106 گەكتاردى قۇرايدى جانە قازاقستان رەسپۋبليكاسى اۋماعىنىڭ اجىراماس بولىگى سانالادى.

«قورقىت اتا» ارنايى ەكونوميكالىق ايماعىن قۇرۋدىڭ ماقساتى - الەمدىك ستاندارتتارعا سايكەس كەلەتىن زاماناۋي ونەركاسىپتىك- وندىرىستىك كەشەندەردى قۇرۋ ءۇشىن وتاندىق جانە شەتەلدىك ينۆەستورلاردى تارتۋ، ەكونوميكالىق جانە ۇيىمداستىرۋشىلىق جاعدايلاردى قالىپتاستىرۋ ارقىلى جەكە كاسىپكەرلىكتىڭ دامۋىن ىنتالاندىرۋ، ترانزيتتىك كولىكتىك- لوگيستيكالىق الەۋەتتىڭ جانە ساۋدا- لوگيستيكالىق بايلانىستاردىڭ ءوسۋىن ىنتالاندىرۋ، سونداي-اق تۋريستىك الەۋەتتى جوعارىلاتۋ مەن تيىمدىلىگى جوعارى، باسەكەگە قابىلەتتى تۋريستىك ينفراقۇرىلىمدى دامىتۋ. بۇل ءوز كەزەگىندە ءوڭىردىڭ ەكونوميكالىق وسۋىنە جانە ينفراقۇرىلىمىن جاقسارتۋعا ىقپال ەتەدى.

وسىدان ءبىر جىل بۇرىن ۇكىمەت باسشىسى ولجاس بەكتەنوۆ ارنايى ەكونوميكالىق ايماقتار ينستيتۋتى ءالى كۇنگە دەيىن ءتيىستى دەڭگەيدە دامىماي وتىرعانىن سىناعان.

ال، وزىق ەلدەردىڭ كوپشىلىگى ارنايى ەكونوميكالىق ايماقتاردى ينۆەستيتسيا تارتۋدىڭ ءتيىمدى قۇرالىنا اينالدىرعان.

«دۇنيەجۇزىلىك بانكتىڭ دەرەكتەرىنە سۇيەنسەك، تارتىمدىلىعى جاعىنان سالىق جانە كەدەندىك جەڭىلدىكتەر تەك ءۇشىنشى جانە ءتورتىنشى ورىنداردا تۇر. ال، ءبىرىنشى پوزيتسيادا قولايلى اكىمشىلەندىرۋ جانە قاجەتتى ينفراقۇرىلىممەن قامتاماسىز ەتۋ قۇرالدارى ورنالاسقان. ءبىزدىڭ ارنايى ەكونوميكالىق ايماقتاردى رەفورمالاۋ ارەكەتىمىز ولاردىڭ تيىمدىلىگىن ارتتىرا الماي كەلەدى. سونداي- اق ءبىز باسقارۋشى كومپانيالاردى قامتاماسىز ەتۋگە قوماقتى بيۋدجەت قاراجاتىن جۇمساپ وتىرمىز. ءبىراق ولاردىڭ تاراپىنان ينۆەستيتسيا تۇرىندە ءتيىستى قايتارىم جوق»، - دەگەن ەدى ولجاس بەكتەنوۆ.

اۆتور

مارلان جيەمباي