قازىرگى ۋاقىتتا وسى فاكتىلەر بويىنشا قىلمىستىق قۋدالاۋ ورگاندارى 37 ءىستى قاراستىرىپ جاتىر. بۇل تۋرالى مەملەكەت باسشىسىنىڭ تاپسىرماسىمەن قۇرىلعان ارنايى كوميسسيا مالىمدەدى.
104 اسكەري نىسان تەكسەرىلدى
كوميسسيا قورعانىس مينيسترلىگىنە قاراستى 104 نىساندى تەكسەرۋدەن وتكىزگەن. سونىمەن قاتار ۆەدومستۆونىڭ بيۋجەت قاراجاتىن پايدالانۋ تيىمدىلىگىنە اۋديت جۇرگىزۋ جۇمىستارى ءالى جالعاسىپ جاتىر.
تەكسەرۋ بارىسىندا اسكەري قىزمەتشىلەردىڭ قاۋىپسىزدىگى مەن قىزمەت وتكەرۋ جاعدايىنا ەرەكشە نازار اۋدارىلعان. سونداي-اق اسكەري بولىمدەردى ازىق-تۇلىكپەن جانە كيىم-كەشەكپەن قامتاماسىز ەتۋ ساپاسى، مەديتسينالىق كومەك كورسەتۋ دەڭگەيى مەن مەملەكەتتىك مۇلىكتىڭ ساقتالۋى زەردەلەنگەن.
كوميسسيا جۇمىسى كەزىندە انىقتالعان جەكەلەگەن قۇقىق بۇزۋشىلىق فاكتىلەرى بويىنشا سوتقا دەيىنگى تەرگەپ-تەكسەرۋ باستالعان.
37 قىلمىستىق ءىس تەرگەلىپ جاتىر
قازىرگى ۋاقىتتا قىلمىستىق قۋدالاۋ ورگاندارىنىڭ قاراۋىندا 37 ءىس بار. الايدا تەرگەۋ مۇددەسىنە بايلانىستى ولاردىڭ ءمان-جايى مەن وزگە دە مالىمەتتەر ازىرگە جاريالانبايدى.
كوميسسيا تەكسەرۋدى «زاڭ جانە ءتارتىپ» قاعيداتى نەگىزىندە جۇرگىزىپ جاتىر. ونىڭ باستى ماقساتى - قارۋلى كۇشتەردىڭ جاۋىنگەرلىك ازىرلىگىن ارتتىرۋعا كەدەرگى كەلتىرەتىن ماسەلەلەردى انىقتاپ، ولاردى شەشۋگە باعىتتالعان جۇيەلى شارالار ازىرلەۋ.
تەكسەرۋ قاراشا ايىندا اياقتالادى
كوميسسيا انىقتاعان ماسەلەلەر بويىنشا ازىرلەنەتىن ۇسىنىمدار اسكەري رەفورما جوسپارىن ىسكە اسىرۋ كەزىندە دە ەسكەرىلىپ جاتىر.
تەكسەرۋ قورىتىندىسى بويىنشا قارۋلى كۇشتەردىڭ جۇمىسىن جەتىلدىرۋگە، اسكەري ءتارتىپتى نىعايتۋعا جانە اسكەري قىزمەتشىلەرگە قولايلى جاعداي جاساۋعا باعىتتالعان شارالار ۇسىنىلماق.
مەملەكەت باسشىسى قۇرعان كوميسسيانىڭ جۇمىسى 2026-جىلعى قاراشادا اياقتالادى. ال بيۋجەت قاراجاتىنىڭ جۇمسالۋىنا جۇرگىزىلىپ جاتقان اۋديت پەن قىلمىستىق ىستەر بويىنشا تەرگەۋ ناتيجەلەرى الداعى ۋاقىتتا بەلگىلى بولۋى مۇمكىن.
ەسكە سالايىق، قايعىلى وقيعا وقۋ-جاۋىنگەرلىك مىندەتتى ورىنداۋ بارىسىندا اۋا رايىنىڭ كەنەتتەن كۇرت ناشارلاۋىنان بولىپ، سالدارىنان 17 اسكەري قىزمەتشىنى اشىق تەڭىزگە الىپ كەتكەن. ولاردىڭ ۇشەۋى قۇتقارىلىپ، 14 اسكەري قىزمەتشى قازا تاپتى.