«قورعاس-شىعىس قاقپاسى» ارنايى ەكونوميكالىق ايماعى قۇرىلدى

استانا. قازاقپارات - 2025-جىلعى 1-شىلدەدەگى ۇكىمەت قاۋلىسىمەن «قورعاس-شىعىس قاقپاسى» ارنايى ەكونوميكالىق ايماعى قۇرىلىپ، ەرەجەسى مەن نىسانالى كورسەتكىشتەرى بەكىتىلدى.

ارنايى ەكونوميكالىق ايماق جەتىسۋ وبلىسىندا ورنالاسقان. جالپى اۋدانى 5431,5 گەكتار جەر، ونىڭ ىشىندە پورتتىق ايماق (اۋە حابى) - 840 گەكتار جەر، لوگيستيكالىق ايماق - 483,4 گەكتار جانە يندۋستريالىق ايماق - 230,4 گەكتار جەردى الىپ جاتىر.

ارنايى ەكونوميكالىق ايماق زاماناۋي ءوندىرىستى جەدەل دامىتۋ، ينۆەستيتسيا تارتۋ، جاڭا تەحنولوگيانى ەنگىزۋ، ءتيىمدى كولىك-لوگيستيكالىق جانە يندۋستريالىق ورتالىق قۇرۋ، سونداي-اق شەكارا ماڭى ىنتىماقتاستىعىن دامىتۋ ماقساتىندا قۇرىلىپ وتىر.

نىسانالى كورسەتكىشتەرگە سايكەس، 2030-جىلعا قاراي ارنايى ەكونوميكالىق ايماققا تارتىلاتىن جالپى ينۆەستيتسيا كولەمى 522,7 ميلليارد تەڭگەگە، ال 2035-جىلعا قاراي 715,5 ميلليارد تەڭگەگە جەتۋى ءتيىس. شەتەلدىك ينۆەستيتسيا كولەمى 2030 -جىلعا قاراي 10,2 ميلليارد تەڭگەنى، 2035-جىلعا قاراي 15,5 ميلليارد تەڭگەگە جەتەدى دەپ جوسپارلانىپ وتىر.

2030-جىلعا قاراي ارنايى ەكونوميكالىق ايماقتىڭ قاتىسۋشىلارىنىڭ سانى 85 كومپانياعا، 2035-جىلى 95 كومپانياعا دەيىن جەتەدى دەپ كۇتىلىپ وتىر. سونداي-اق ارنايى ەكونوميكالىق ايماق اۋماعىندا 2030-جىلى 20,5 مىڭعا دەيىن، ال 2035-جىلى 22 مىڭعا دەيىن جۇمىس ورنى اشىلادى. وندىرىستەگى قازاقستاننىڭ ۇلەسى 2030-جىلى u عا دەيىن، ال 2035-جىلى � عا دەيىن ارتادى دەگەن جوسپار بار.

سونداي-اق قۇجاتتا ايماق اۋماعىنداعى قىزمەتتىڭ قۇقىقتىق رەجيمى، سالىق سالۋ، كەدەندىك رەتتەۋ ءتارتىبى مەن شارتتارى بەلگىلەنگەن.

ەسكە سالا كەتسەك، 2024-جىلى جەكەنىڭ قولىندا كەتكەن قورعاستىڭ تەرمينالى مەملەكەتكە قايتارىلدى.

ايتا كەتەيىك، 30-ماۋسىمدا مەملەكەت باسشىسى «قازاقستان رەسپۋبليكاسىنىڭ اۋماقتىق قورعانىسى تۋرالى» زاڭىنا قول قويدى.