قورعاستا شەكارالىق باقىلاۋدىڭ اۆتوماتتى جۇيەسى ەنگىزىلدى. سونىڭ ناتيجەسىندە ەندى ءاربىر ادام نەبارى ون سەكۋند ىشىندە قۇجاتىن راسىمدەپ، ەركىن ەكونوميكالىق ايماققا وتە الادى. «قورعاس» شەكارا ماڭى ىنتىماقتاستىعى حالىقارالىق ورتالىعىنا جىلىنا 1 ميلليوننان اسا ادام كەلەدى. قازىر ولار شەكارالىق باقىلاۋدىڭ اۆتوماتتى جانە ءداستۇرلى جۇيەسىن قاتار قولدانىپ جاتىر.
ماحاببات قاسيەتوۆا، پانفيلوۆ اۋدانىنىڭ تۇرعىنى:
- بۇرىن ءبىز ءوتۋ ءۇشىن كەزەكتە ساعاتتاپ تۇراتىنبىز. قازىر ەندى تەز 10-15 مينۋتتا ءوتىپ كەتەمىز. ءبارى جاقسى، حالىق ءۇشىن بارلىق جاعداي جاسالعان.
گۇلسىم ساعاتبەك قىزى، تۋريست:
- مەن قازىر ءۇرىمجى قالاسىنان كەلە جاتىرمىن. ەرتەڭ مەنىڭ تۋريستەرىم 90 ادام وسى جاقتان وتەدى. ءبىز 90 ادامدى كۇتپەيمىز. ءارى كەتسە جارتى ساعاتتا ۋاقىت الماي جىلدام ءوتىپ كەتەدى.
ەركىن ەكونوميكالىق ايماقتا نەگىزىنەن قوناق ۇيلەر مەن ساۋدا ورتالىقتارى جۇمىس ىستەيدى. ونداعى كاسىپكەرلەر سالىقتان بوساتىلعان. ءارى ولار تۇرمىستىق زاتتار مەن ازىق-تۇلىك جانە وزگە دە تاۋارلارىن ەكى ەلدىڭ نارىعىنا شىعارا الادى.
زۋلفيرا گازيزوۆا، كاسىپكەر:
- وسى جاققا جازدا قىتاي، قازاقستان جاقتان ادامدار كوپ كەلەدى. ءبىر كۇننىڭ ىشىندە 500-600 ادام كەلەدى.
لين فان، كاسىپكەر:
- ارنايى ەكونوميكالىق ايماقتىڭ اۋماعى جىل سايىن وزگەرىپ، ۇسىنىلاتىن تاۋارلار كوبەيىپ كەلەدى. وتانداستارىمىزعا قازاقستاندا وندىرىلگەن ونىمدەر ۇنايدى. اسىرەسە، بال مەن ءتاتتى تاعامدارعا سۇرانىس كوپ. حالىقتىڭ قولدانبالى ونەرگە دەگەن قىزىعۋشىلىعى دا جوعارى.
قورعاستان ءار ادامعا 25 كەلىگە دەيىنگى تاۋاردى باج سالىعىن تولەمەي الىپ وتۋىنە رۇقسات ەتىلگەن. جۇك جونەلتۋ پروتسەسى اۆتوماتتى جۇيە ارقىلى باقىلانادى. ودان بولەك، كورشى ەلدە شىعارىلعان جەڭىل كولىكتەر دە «قورعاس» ارقىلى تاسىمالدانىپ جاتىر.
سەيىلبەك سادىربايەۆ، «قورعاس» شى ح و باسقارما ءتوراعاسىنىڭ ورىنباسارى:
- كولىك قۇرالدارىنىڭ ءبىزدىڭ ورتالىعىمىز ارقىلى ءوتۋ پروتسەستەرى ءبىزدىڭ تۋريستەرگە، تۋريستەردىڭ ىڭعايلىلىعىنا، ءبىزدىڭ ورتالىقتا بولۋىنا ەشقانداي كەدەرگىسىن كەلتىرمەيدى. جانە تاۋار تاسىمالىنا ەشقانداي كەدەرگى بولمايدى.
فارحات يسايەۆ، وبلىستىق م ك د ءبولىم باسشىسى:
- قورعاس ش ى ح و كەدەن بەكەتىندە وسى ءتورت جىل بويى جۇرگىزىلگەن سيفرلاندىرۋ جۇمىستارىنىڭ ناتيجەسىندە بىزدە تۇسىمدەر سانى، سوماسى كوبەيىپ كەلەدى. مىسالى، ايتاتىن بولساق، 2023 -جىلى تولەمدەر سانى 606 ميلليون تەڭگەنى قۇراسا، 2026 -جىلدىڭ 9 ايىندا بۇل كورسەتكىش 5,6 ميلليارد تەڭگەنى قۇرادى.
قورعاستىڭ قازاقستانعا قاراستى بولىگىنە 2016 -جىلى ينفراقۇرىلىمدىق جەلىلەر تارتىلعان. سودان بەرى 10 ينۆەستيتسيالىق جوبا جۇزەگە استى.
ەرقانات قاجىمۇقان ۇلى، وبلىستىق كاسىپكەرلىك جانە ي ي د ب باسشىسىنىڭ ورىنباسارى:
- قازىرگى ۋاقىتتا بىزدە جوسپاردا 47 جوبانى ىسكە اسىرۋ بولىپ تابىلادى. ونىڭ 22-سى قازىرگى تاڭدا جۇمىس جاساپ جاتىر. قالعان جوبالار ءوزىنىڭ قۇرىلىس جۇمىستارىن جۇرگىزۋدە. جالپى ينۆەستيتسيا كولەمى 200 ميللياردتان تەڭگەدەن اسادى. جوسپارعا سايكەس ەركىن ەكونوميكالىق ايماقتا ساۋدا-ساتتىق جانە تۋريزم سالاسىن دامىتىپ، جەتى مىڭعا جۋىق جۇمىس ورنىن اشۋ كوزدەلىپ وتىر.