قورعانىس مينيسترلىگى: اسكەرگە كۇشتەپ اكەتۋ ارەكەتى بولسا، سوتقا جۇگىنۋ مۇمكىندىگى بار

استانا. KAZINFORM - قورعانىس ءمينيسترىنىڭ ءبىرىنشى ورىنباسارى سۇلتان قامالەتدينوۆ جاستاردى اسكەرگە كۇشتەپ اكەتۋ ءىس-قيمىلدارىنا پىكىر ايتتى.

- وكىنىشكە قاراي، مۇنداي فاكتىلەر بولدى. بۇعان جول بەرۋگە بولمايدى. سونىمەن بىرگە، ءبىزدىڭ ەلدە پرەزيدەنت «زاڭ پەن ءتارتىپ» تۇسىنىگىن ايقىندادى. قازاقستان رەسپۋبليكاسى كونستيتۋتسياسىنىڭ 36-بابىندا «ەرىكتى تۇردە» دەگەن ۇعىم جوق، وندا مەملەكەتتى قورعاۋ - ءاربىر ازاماتىنىڭ قاسيەتتى پارىزى جانە مىندەتى دەگەن ناقتى جازىلعان. وسى ورايدا اسكەرگە شاقىرىلعاندار وسىنى ورىنداۋعا مىندەتتى. ال ەگەر ورىنداماسا، زاڭ نورمالارى بۇل ازاماتقا قاتىستى بولۋى كەرەك، - دەدى سۇلتان قامالەتدينوۆ سەناتتىڭ جالپى وتىرىسىنان كەيىن تىلشىلەر سۇراعىنا جاۋاپ بەرە وتىرىپ.

سونداي-اق ءمينيستردىڭ ورىنباسارىنان اسكەرگە كۇشتەپ الىپ كەتەتىندەرگە قاتىستى قولدانىلىپ جاتقان شارالار تۋرالى سۇرالدى.

- بارلىق جۇرگىزىلگەن تەكسەرۋلەر بويىنشا، ەگەر ازامات ءوز قۇقىعى بۇزىلدى دەپ ەسەپتەسە، بىزدە قۇقىقتىق مەملەكەت - ونىڭ سوتقا جۇگىنۋگە قۇقىعى بار. مەن قورعانىس ءمينيسترىنىڭ ءبىرىنشى ورىنباسارى رەتىندە ءوز وكىلەتتىگىمدى جۇزەگە اسىرعان كەزەڭدە، مۇنداي جاعدايلار بولعان جوق، - دەدى ول.