قونايەۆتاعى ويىنحانالار بيۋدجەتكە قانشا سالىق تولەدى

قونايەۆ. KAZINFORM - قازىر قونايەۆ قالاسىندا بەس ويىنحانا مەن ءۇش ويىن اۆتومات زالى جۇمىس ىستەيدى.

قالالىق اكىمدىكتىڭ مالىمەتىنشە، ويىن بيزنەسىندە 2306 ادام جۇمىس ىستەيدى، ونىڭ 90 پايىزى - جەرگىلىكتى تۇرعىن.

«سالىق جانە بيۋدجەتكە تولەنەتىن باسقا دا مىندەتتى تولەمدەر تۋرالى» كودەكستىڭ 557-بابىنا سايكەس ويىنحانانىڭ كىرىس بولىگى سالىقتىق قۇپيا بولىپ تابىلادى. 2023 -جىلى ويىنحانالار مەن ويىن اۆتوماتتارى زالدارىنان تۇسكەن سالىق ءتۇسىمى 46486878310 بولسا، وسى جىلدىڭ 9 ايىندا 11953433400 تەڭگەگە جەتتى»، - دەپ جاۋاپ بەردى قالا اكىمىنىڭ ورىنباسارى تولەگەن كەنجەبەكوۆ Kazinform اگەنتتىگىنىڭ رەسمي ساۋالىنا.

سونداي-اق ول ويىنحانا مەن ويىن بيزنەسىنىڭ وزگە دە سۋبەكتىلەرىن باسقا ايماقتارعا كوشىرۋ نەمەسە جابۋ جوسپارلارى تۋرالى دا ايتتى. سپيكەردىڭ سوزىنشە، ق ر «ويىن بيزنەسى تۋرالى» زاڭىنا سايكەس، ويىن بيزنەسى نىساندارىنىڭ ورنالاسقان جەرى اقمولا وبلىسىنىڭ بۋراباي اۋدانى مەن الماتى وبلىسىنىڭ قاپشاعاي سۋ قويماسىنىڭ جاعالاۋى.

«ويىن بيزنەسى سۋبەكتىلەرىنىڭ ورنالاسقان جەرىن باسقا اكىمشىلىك-اۋماقتىق بىرلىككە بەرۋدى ۋاكىلەتتى ورگان ايقىندايدى»، - دەدى ول.

ايتۋىنشا، جەرگىلىكتى اتقارۋشى ورگانداردا ويىنعا تاۋەلدىلىكتەن زارداپ شەگەتىن ازاماتتاردىڭ ەسەبى جۇرگىزىلمەيدى. الايدا بۇل ماسەلەنىڭ الدىن الۋ شارالارى تۇراقتى تۇردە جۇرگىزىلىپ تۇرادى.

ەسكە سالايىق، بىلتىر الماتى وبلىسىنىڭ اكىمى مارات سۇلتانعازيەۆ ويىنحاناعا كىرۋ ءۇشىن قوماقتى قاراجات قاجەت ەكەنىن اتاپ وتكەن بولاتىن. مۇنان بولەك، بەلگىلى ءبىر تۇلعاعا قاتىستى ونىڭ تۋعان-تۋىستارى تاراپىنان نەمەسە قۇقىق قورعاۋ ورگاندارىنان ءوتىنىم تۇسكەن جاعدايدا ولار ويىنحاناعا كىرىگىزىلمەيدى.