قونايەۆتا كارىز قۇدىعىنا ءتۇسىپ كەتكەن جىلقى قۇتقارىلدى

قونايەۆ. KAZINFORM - قونايەۆتىڭ پاترۋلدىك پوليتسەيلەرى قيىن جاعدايعا تاپ بولعان جىلقىنى قۇتقارىپ، ناعىز باتىلدىق پەن كاسىبيلىك تانىتتى.

الماتى وبلىسى ورتالىعىنىڭ جەكە تۇرعىن ءۇي سەكتورلارىنىڭ ءبىرىن پاترۋلدەۋ كەزىندە «بۇركىت-253» پ پ ۆ پوليتسەيلەرى اشىق تۇرعان كارىز قۇدىعىنا قۇلاپ قالعان جىلقىنى بايقادى.

جاعدايدىڭ كۇردەلىلىگىن باعالاي وتىرىپ، پوليتسەيلەر جاقىن ماڭداعى پاترۋلدىك جاساقتى كومەككە شاقىردى.

قۇتقارۋ وپەراتسياسى وڭاي بولعان جوق: جانۋاردىڭ سالماعى مەن كولەمى جۇمىستى ايتارلىقتاي قيىنداتتى. الايدا، ەرنار وماروۆ پەن ايبەك تۇرسىنوۆتىڭ قۇرامىنداعى «بۇركىت-253» پ پ ۆ، سونداي-اق دارحان ەسىمحانوۆ پەن سەرىك وردابايەۆتىڭ قۇرامىنداعى «بۇركىت-261» پاترۋلدىك پوليتسيا ۆزۆود ءىس-قيمىلدارىنىڭ ارقاسىندا جىلقى امان-ەسەن قۇدىقتان شىعارىلدى. بارلىق جۇمىستار جانۋارعا زيان كەلتىرمەۋ ءۇشىن اسا مۇقيات ورىندالدى.

قۇتقارۋ وپەراتسياسى ناتيجەسى ءساتتى اياقتالىپ، جىلقى يەسىنە تابىستالدى، ءوز كەزەگىندە ول پوليتسەيلەرگە العىرلىعى جانە جەدەلدىگى ءۇشىن ريزاشىلىعىن ءبىلدىردى.

- ءبىز ءتارتىپتى ساقتاۋ ءۇشىن عانا ەمەس، مۇقتاج جاندارعا دا كومەك كورسەتۋ ءۇشىن قىزمەت ەتەمىز. وسىنداي ساتتەردە ءبىزدىڭ جۇمىسىمىز ادامداردى قورعاۋ عانا ەمەس، سونىمەن قاتار ءوزىن-ءوزى قورعاي المايتىندارعا كومەكتەسۋ ەكەنىن تۇسىنەمىز، - دەپ ءبولىستى ەرنار وماروۆ.

بۇل وقيعا پوليتسەيلەردىڭ ءارقاشان كۇردەلى جاعدايلارعا دايىن ەكەنىن جانە قيىندىقتاردان قورىقپايتىنىن دالەلدەدى. قۇتقارىلعان جىلقى كۇش-قۋاتتىڭ، باتىلدىق پەن مەيىرىمدىلىكتىڭ كەز كەلگەن ساتتە كومەككە كەلۋگە دايىن ەكەندىگىنىڭ نىشانىنا اينالدى.