قونايەۆ قالاسىنداعى ەسكى گاراجدار بۇزىلىپ، ورنىنا باسقا نىساندار سالىنادى

قونايەۆ. KAZINFORM - قونايەۆ قالاسىنىڭ باس جوسپارىنا سايكەس، قالاداعى 7 گاراج كووپەراتيۆى (گ ك) بۇزىلىپ، ورنىنا باسقا ماقساتتاعى نىساندار بوي كوتەرەدى. بۇل تۋرالى قونايەۆ اكىمدىگىنىڭ باسپا ءسوز قىزمەتى حابارلادى.

اكىمدىك مالىمەتىنە سايكەس، سۇرىلگەن گاراجداردىڭ ورنىنا اكىمشىلىك جانە قىزمەت كورسەتۋ نىساندارىن، تۇرعىن ءۇي كەشەندەرىن سالىپ، اۋاماقتى اباتتاندىرۋ كوزدەلىپ وتىر.

- اتالعان ماسەلەگە بايلانىستى تۇرعىندار اكىمدىكتەن گاراجداردى جەكە مەنشىككە وتكىزۋدى سۇراۋدا. ساۋلەت جانە قالا قۇرىلىسى ءبولىمى بۇل - مۇمكىن ەمەس ەكەنىن ايتادى. سەبەبى ءبىرىڭعاي مەملەكەتتىك جىلجىمايتىن مۇلىك كاداسترىنىڭ دەرەكتەرىنە سايكەس، مۇنداعى جەر ۋچاسكەلەرى قىسقا مەرزىمگە ۋاقىتشا پايدالانۋعا بەرىلگەن. قر ازاماتتىق كودەكسىنىڭ 209-بابى 4-تارماعى بويىنشا ورتاق مەنشىك ەكى نەمەسە بىرنەشە ادامنىڭ مەنشىگىنە مۇلىك تۇسكەن كەزدە پايدا بولادى، ونى ءوزىنىڭ ماقساتى وزگەرتىلمەيىنشە بولۋگە بولمايدى، - دەپ حابارلادى اكىمدىكتەن.

سونداي- اق قونايەۆ قالاسىنىڭ باسشىلىعى بۇل نىساندار مەملەكەت قاجەتتىلىگى ءۇشىن الىنعاندا نەمەسە ينۆەستورلارعا بەرىلگەندە ۇلەسكەرلەرگە وتەماقى تولەنەتىنىن حابارلادى.

- حالىق باس جوسپاردىڭ نە ءۇشىن قابىلدانعانىن ءتۇسىنۋى قاجەت. ءبىزدىڭ جوسپاردىڭ ورىندالۋ مەرزىمى 2050 -جىلعا دەيىن جوسپارلانعان. ونىڭ ىشىندە ەكونوميكانى دامىتۋ، حالىقتى جۇمىسپەن قامتۋ، اۆتوجولداردى كەڭەيتۋ جانە سالۋ، ينجەنەرلىك جەلىلەردى تارتۋ، اباتتاندىرۋ، الەۋمەتتىك، مادەني، اكىمشىلىك نىسانداردى سالۋ، تۇرعىن ۇيلەردى تۇرعىزۋ سەكىلدى ماڭىزدى سالالار قامتىلعان. ەرتە مە، كەش پە، گاراجدار بۇزىلىپ، ورنىنا باس قۇجاتقا سايكەس عيماراتتار سالىنادى. سوندىقتان تۇرعىنداردى زاڭ اياسىندا جۇمىس ىستەۋگە شاقىرامىز، - دەدى ساۋلەت جانە قالا قۇرىلىسى ءبولىمىنىڭ باسشىسى رۋسلان بوتامبايەۆ.

ايتا كەتكەن ءجون، بۇل ماسەلەگە بايلانىستى قونايەۆ قالاسى، №2 ش/ا، 44- ءۇي مەكەنجايىندا ورنالاسقان ساۋلەت جانە قالا قۇرىلىسى بولىمىنە جولىعۋعا بولادى.