قوناقتار جاپپاي ۋلانىپ قالعان پاۆلودارلىق مەيرامحانا يەسىنە ايىپپۇل سالىندى

پاۆلودار. KAZINFORM - پاۆلودار قالالىق اكىمشىلىك سوتىنىڭ قاۋلىسىمەن سانيتارلىق تالاپتاردى ساقتاماعان مەيرامحاناعا 275 مىڭ تەڭگە ايىپپۇل تاعايىندالدى.

پاۆلودار قالاسىنىڭ اكىمشىلىك قۇقىق بۇزۋشىلىقتار جونىندەگى مامانداندىرىلعان اۋدانارالىق سوتى سانيتارلىق تالاپتاردى ورەسكەل بۇزۋ دەرەگى بويىنشا اكىمشىلىك ءىستى قارادى.

سوتتا ايتىلعانداي، بيىلعى 8-ماۋسىمدا پاۆلودار قالالىق سانيتارلىق-ەپيدەميولوگيالىق باقىلاۋ باسقارماسىنا جەدەل جاردەم ستانتسياسىنان «B» مەيرامحاناسىندا بولعان ازاماتتاردا جەدەل باكتەريالىق ىشەك ينفەكتسياسى (ج ي ا) جاعدايلارى تىركەلگەنى تۋرالى حابارلاما كەلىپ تۇسكەن.

- سول كۇنى ەپيدەميولوگيالىق تەكسەرۋ باستالىپ، زەرتحانالىق سىنامالار الىندى. تەكسەرۋ بارىسىندا مەيرامحانانىڭ ءتيىستى رۇقساتتارسىز جۇمىس ىستەگەنى انىقتالدى. 9-ماۋسىمدا قىزمەتكە تىيىم سالۋ تۋرالى قاۋلى بەرىلگەنىنە قاراماستان، مەيرامحانا جۇمىسىن جالعاستىردى. سونىڭ سالدارىنان تاماقتان ۋلانۋ فاكتىلەرى قايتا تىركەلدى. تەك 9-ماۋسىم كۇنى ب ك ي دياگنوزىمەن 18 شۇعىل حابارلاما تىركەلدى، - دەلىنگەن ايىپتاۋ دەرەگىندە.

سوت وتىرىسىندا جەكە كاسىپكەر ءوز كىناسىن تولىق مويىنداپ، قۇقىقبۇزۋشىلىقتىڭ العاش رەت جانە ابايسىزدىقتان جاسالعانىن ءتۇسىندىرىپ، سوتتان جاۋاپتىلىقتى جەڭىلدەتەتىن ءمان- جاي رەتىندە ەسكەرۋدى سۇرادى.

سوت ق ر اكىمشىلىك قۇقىقبۇزۋشىلىق تۋرالى كودەكستىڭ 462-بابى 3-بولىگىن باسشىلىققا الىپ، جەكە كاسىپكەر ج. -نى كىنالى دەپ تانىدى. وعان اكىمشىلىك جازا رەتىندە 275240 تەڭگە ايىپپۇل جانە «B» مەيرامحاناسىنىڭ قىزمەتىن ءبىر اي مەرزىمگە توقتاتۋ جازاسىن تاعايىندادى.

قاۋلى زاڭدى كۇشىنە ەنگەن جوق.

ەسكە سالا كەتەيىك، پاۆلوداردا قىز ۇزاتۋ تويىنان كەيىن 33 ادام ۋلانعان.

كەيىن جۇرت جاپپاي ۋلانعان مەيرامحانا رۇقساتسىز جۇمىس ىستەگەنى بەلگىلى بولدى.