قولمەن جازۋ وقۋ داعدىلارىن جاقسارتادى - زەرتتەۋ

قولمەن جازۋ - بالالاردىڭ وقۋ داعدىلارىن دامىتۋدا پەرنەتاقتامەن تەرۋگە قاراعاندا الدەقايدا ءتيىمدى. بۇل تۋرالى Journal of Experimental Child Psychology جۋرنالىندا جاريالانعان جاڭا زەرتتەۋ كورسەتىپ وتىر.

زەرتتەۋ بارىسىندا 5 جاستاعى، وقۋدى ەندى باستايتىن بالالارعا تاجىريبە جۇرگىزىلگەن. ولار جازۋدى ەكى ءتۇرلى تاسىلمەن مەڭگەرگەن: ءبىر بولىگى ارىپتەردى قولمەن كوشىرىپ جازسا نەمەسە سىزباسىن سالسا، ەكىنشى توپ ءدال سول ماتەريالدى پەرنەتاقتا ارقىلى تەرگەن. ناتيجەسىندە قولمەن جازعان بالالار ارىپتەر مەن سوزدەردى تانۋ، ەستە ساقتاۋ، جانە وقۋ تاپسىرمالارىندا اناعۇرلىم جاقسى ناتيجە كورسەتكەن.

زەرتتەۋدى يسپانياداعى عالىمدار جۇرگىزگەن. ولار جازۋ تاسىلدەرىنىڭ - ياعني قولمەن جازۋ مەن تەرۋدىڭ - ەرتە كەزەڭدەگى وقۋ قابىلەتىنە قالاي اسەر ەتەتىنىن انىقتاۋدى ماقسات ەتكەن. سوڭعى جىلدارى ءبىلىم بەرۋ ۇدەرىسىندە ساندىق قۇرالداردىڭ ءجيى قولدانىلۋى ماماندار اراسىندا الاڭداۋشىلىق تۋدىرىپ وتىر: پەرنەتاقتاعا تاۋەلدىلىك بالالاردىڭ ءالىپبي مەن ءسوز قۇرىلىمىن مەڭگەرۋىنە كەدەرگى كەلتىرۋى مۇمكىن دەگەن پىكىر بار.

«بالالار قولمەن جازۋدى سيرەك قولدانا باستاعاندىقتان، ءبىز ونىڭ الىپبيلىك جانە ورفوگرافيالىق داعدىلارعا اسەرىن زەرتتەگىمىز كەلدى. ياعني ارىپتەردىڭ دىبىسپەن بايلانىسىن جانە ءسوز قۇرىلىمىن مەڭگەرۋ قابىلەتى جازۋ تاسىلىنە بايلانىستى قالاي داميتىنىن قاراستىردىق» ، - دەدى زەرتتەۋ اۆتورى، باسك ەلى ۋنيۆەرسيتەتىنىڭ وقىتۋشىسى جوانا اچا.

عالىمداردىڭ ايتۋىنشا، جازۋ - بۇل تەك اقپاراتتى بەرۋ قۇرالى عانا ەمەس، سونىمەن قاتار مي مەن موتوريكانىڭ ۇيلەسىمدى ارەكەتىنە نەگىزدەلگەن تانىمدىق پروتسەسس. سوندىقتان بالانىڭ قولمەن جازۋ ارقىلى العان تاجىريبەسى ونىڭ وقۋ قابىلەتىنە وڭ اسەر ەتەدى.