قوجا احمەت ياساۋي كەسەنەسىنىڭ اينالاسىندا قۇرىلىس شەكتەلەدى - زاڭ جوباسى

استانا. KAZINFORM - بۇل تۋرالى ماجىلىستە «تۇركىستان قالاسىنىڭ ەرەكشە مارتەبەسى تۋرالى» زاڭ جوباسى تانىستىرىلدى.

«زاڭ جوباسى مەملەكەت باسشىسىنىڭ 2022 -جىلى تۇركىستان وبلىسىنا ساپارىنىڭ قورىتىندىسى بويىنشا بەرگەن تاپسىرماسىنا جانە 2023 -جىلعى 10-ساۋىردەگى قارارىنا سايكەس ازىرلەندى. وسىلايشا، مەملەكەت باسشىسى تۇركىستان قالاسىنا رۋحاني جانە تاريحي ورتالىق رەتىندە ەرەكشە مارتەبە بەرۋدى تاپسىردى. بۇل قۇجاتتى ازىرلەۋگە تۇركىستان قالاسىن تۇركى مەملەكەتتەرى ۇيىمىمەن تۇركى الەمىنىڭ رۋحاني استاناسى رەتىندە تانۋى نەگىز بولدى. سونىمەن قاتار قالانىڭ تاريحي كەلبەتىن جانە ونىڭ اۋماعىندا ورنالاسقان تاريحي- مادەني مۇرا وبەكتىلەرىن ساقتاۋ اسا ماڭىزدى سانالادى. تۇركىستان قالاسىندا حالىق سانى تەز ءوسىپ كەلەدى، ياعني كەيىنگى 6 جىلدا حالىق سانى 60 مىڭعا ءوستى»، - دەدى ۇلتتىق ەكونوميكا ۆيتسە- ءمينيسترى باۋىرجان وماربەكوۆ.

ونىڭ ايتۋىنشا، زاڭ جوباسىن ازىرلەۋ بارىسىندا انگليا، يتاليا، وزبەكستان، ازەربايجان جانە باسقا دا مەملەكەتتەردىڭ تاريحي ەسكەرتكىشتەرىن ساقتاپ قالۋ بويىنشا تاجىريبەلەرى زەرتتەلدى. زاڭ جوباسى 4 تاراۋدان جانە 15 باپتان تۇرادى.

قۇجاتتىڭ ماقساتى مەن مىندەتى:

- قازاقستان رەسپۋبليكاسىنىڭ رۋحاني- مادەني جانە تاريحي ورتالىعى رەتىندە تۇركىستان قالاسىنىڭ قالىپتاسۋى، دامۋى جانە جۇمىس ىستەۋى ءۇشىن قۇقىقتىق شارتتار قۇرۋ، سونداي-اق جالپى مەملەكەتتىك ماڭىزدىلىعىن تانۋ؛

- قالانىڭ تاريحي- مادەني ماڭىزى بار، سونىڭ ىشىندە قوجا احمەت ياساۋي كەسەنەسىنىڭ بۇكىلالەمدىك مۇرا وبەكتىسىنىڭ قورعاۋ اۋماعىندا ورنالاسقان ەسكەرتكىشتەر مەن وبەكتىلەردى باسقارۋ مەن ساقتاۋدىڭ وڭتايلى جۇيەسىن قۇرۋ.

تاريحي-مادەني مۇرانى ساقتاۋ، قورعاۋ جانە رۋحاني وبەكتىلەردىڭ كيەلىلىگىن ساقتاۋ زاڭ جوباسىنىڭ نەگىزگى قاعيداتتارى سانالادى.

«زاڭ جوباسىنىڭ نەگىزگى نوۆەللالارىنا توقتالساق، تۇركىستان قالاسىنىڭ ارحەولوگيا ەسكەرتكىشتەرىنىڭ رەزەرۆاتىن قۇرۋ ەسكەرىلگەن. مۇنىمەن قوسا، ۇلتتىق قولونەر سالاسىنداعى شەبەرلەرىنىڭ شىعىنداردىڭ ءبىر بولىگىن بيۋدجەتتەن وتەۋ، قوجا احمەت ياساۋي كەسەنەسىنىڭ اينالاسىنداعى قۇرىلىستى شەكتەۋ، قۇرىلىستىڭ بوگدە ەلەمەنتتەرىنە جول بەرمەۋ جانە ونىڭ بىرەگەيلىگىن ساقتاۋ تەتىكتەرى قاراستىرىلعان»، - دەدى ۆيتسە- مينيستر.

اتاپ ايتقاندا، كەسەنەنىڭ قورعاۋ ايماعىنىڭ شەكاراسىنا ىرگەلەس جاتقان راديۋسى ءجۇز مەترلىك قاشىقتىقتا بيىكتىگى جەتى مەتردەن اساتىن، سونداي-اق اۋقىمى، ءتۇسى جانە قۇرىلىس ماتەريالدارى بويىنشا تاريحي ەسكەرتكىشتەرمەن سايكەس كەلمەيتىن وبەكتىلەر سالۋعا جول بەرىلمەيدى.

ونىڭ سوزىنە قاراعاندا، تاريحي-مادەني مۇرا وبەكتىلەرىن قورعاۋ جانە پايدالانۋ جونىندەگى ۋاكىلەتتى ورگانعا يۋنەسكو-مەن كەلىسىم بويىنشا قوجا احمەت ياساۋي كەسەنەسىنىڭ اۋماعىندا جاڭا قۇرىلىس جۇمىستارىن جوسپارلاۋ كەزىندە قالا قۇرىلىسى جوبالارى بويىنشا جاڭا قۇزىرەت بەرۋ ۇسىنىلدى. بۇدان بولەك، زاڭ جوباسىندا مەملەكەتتىك الەۋمەتتىك نىسانداردى سالۋ ءۇشىن جەكە قۇرىلىس سالۋشىلارعا ۋاقىتشا وتەۋسىز جەر پايدالانۋ قۇقىعىن الۋ جانە بەرۋ بويىنشا تۇركىستان قالاسى اكىمدىگىنە قۇزىرەت بەرۋ قاراستىرىلعان.