قوش بول، پاريج! كۇت ءبىزدى، لوس-اندجەلەس
استانا. KAZINFORM - الەم نازارىن اۋدارتقان پاريج وليمپياداسى اياقتالدى. ءتورت جىلدا ءبىر رەت وتەتىندىكتەن بولار، سپورت جانكۇيەرلەرى بىلاي تۇرسىن سپورتتان بەيحابار جانداردىڭ ءوزى تەلەديدارعا تەلمىرىپ، تاقىم قىستى. ءدۇبىرلى دودا قازاقستاندىقتاردى دا ءتۇرلى سەزىمگە بولەپ، جارقىن ەموتسيالار سىيلاعانى راس. وسى رەتتە، وليمپيادا ويىندارىن قورىتىندىلاپ، ەرەكشە ساتتەرگە توقتالعاندى ءجون كوردىك.
سەنا بويىنداعى ءسان-سالتانات
پاريج وليمپياداسىنىڭ اشىلۋ سالتاناتى جازعى وليمپيادا ويىندارى تاريحىندا تۇڭعىش رەت ستاديوندا ەمەس، تابيعات اياسىندا، ياعني سەنا وزەنىنىڭ بويىندا ءوتتى. وسىلايشا، فرانسۋزدار ءدۇبىرلى دودا باستالماي جاتىپ وليمپيادانىڭ ەرەكشەلىكتەرگە تولى بولاتىنىن ۇقتىردى.
ءاۋ باستا ۇيىمداستىرۋشىلار اشىلۋ سالتاناتىن وزەندە ۇيىمداستىرۋ - ستاديوندا وتكىزۋگە قاراعاندا اناعۇرلىم كۇردەلى ەكەنىن، دەسە دە كورەرمەنگە اسەرى مۇلدە بولەك بولاتىنىن ايتقان ەدى.
شىنىمەن دە، پاريج شاھارىن قاق جارىپ وتەتىن سەنا وزەنىنىڭ بويىندا ۇيىمداستىرىلعان سالتاناتتى اشىلۋ ءراسىمى كوپشىلىكتى ەرەكشە سەزىمگە بولەدى. 500 مىڭعا جۋىق كورەرمەن بىلاي تۇرسىن، تەلەديداردىڭ ار جاعىنداعى سپورت سۇيەر قاۋىم «بارەكەلدى!» دەسكەنى انىق.
سپورتشىلار شەرۋى ەرەكشە ءوتىپ، دەلەگاتسيالار سەنا وزەنىن قايىقپەن ءجۇزىپ ءوتتى. سپورتشىلاردى تاسىمالداۋ ءۇشىن 80 قايىق جۇمىلدىرىلعانىن اتاپ وتكەن ءجون.
العاشقى كۇن. العاشقى جۇلدە
پاريج وليمپياداسىندا 205 ەلدىڭ 10500 سپورتشىسى 32 سپورت تۇرىنەن 329 مەدال جيىنتىعىن ساراپقا سالدى. ولاردىڭ قاتارىندا رەسمي تۇردە 80 وتانداسىمىز بولدى. ارينە، وليمپيادا باستالماي جاتىپ رىباكينا مەن پۋتينسيەۆانىڭ دەنساۋلىعىنا بايلانىستى جارىسقا قاتىسۋدان باس تارتۋى وتانداستارىمىزدىڭ نارازىلىعىن تۋدىرعانى راس.
دەي تۇرعانمەن، قازاقستان قورجىنىنا وليمپيادانىڭ العاشقى كۇنى-اق ءۇش جۇلدە ءتۇسىپ، ەڭسەمىز كوتەرىلىپ قالدى.
نىسانا كوزدەۋدەن پاريج وليمپياداسىندا ەل قورجىنىنا العاشقى جۇلدە ءتۇستى. پنيەۆماتيكالىق ۆينتوۆكامەن 10 مەترگە نىسانا كوزدەۋدەن ارالاس كوماندالىق سىندا يسلام ساتپايەۆپەن الەكساندرا لە وليمپيادانىڭ قولا جۇلدەسىن جەڭىپ الدى.
العاش رەت وليمپيا ويىندارىنا قاتىسىپ تۇرعان يسلام ساتپايەۆ پەن الەكساندر لە جۇبى گەرمانيا قۇراماسىنان (اننا يانسەن، ماكسيميليان ۋلبريح) باسىم ءتۇستى.
ايتا كەتەيىك، قازاقستان قۇراماسى نىسانا كوزدەۋ سپورتىنان سوڭعى رەت 1996 -جىلى جۇلدە العان. ول كەزدە ەل قورجىنىنا سەرگەي بەليايەۆ - ەكى كۇمىس، ۆلاديمير ۆوحميانين ءبىر قولا سالدى. سودان بەرگى 28 جىلدا مەرگەندەرىمىز وليمپيادا جۇلدەسىن يەلەنگەن ەمەس.
سمەتوۆ - وليمپيادا ويىندارىنىڭ تولىق كاۆالەرى!
كۇتپەگەن قولاعا قول جەتكىزىپ، قۋانىشىمىز قوينىمىزعا سىيماي وتىرعاندا، دزيۋدوشى ەلدوس سمەتوۆ پاريج وليمپياداسىنىڭ چەمپيونى اتانىپ، بوركىمىزدى كوككە اتتىق. 60 كەلىگە دەيىنگى سالماقتا بەلدەسكەن وتانداسىمىز فينالدا لۋكا محەيدزەدەن (فرانسيا) باسىم ءتۇستى.
ايتا كەتەيىك، ەلدوس 2016 -جىلى ريو وليمپياداسىندا كۇمىسپەن كۇپتەلگەن بولاتىن. ال ءتورت جىلدان كەيىن توكيو وليمپياداسىندا قولاعا قول جەتكىزدى. ەندى، مىنە، پاريج وليمپياداسىنىڭ التىنىن الىپ، وليمپيادا ويىندارىنىڭ تولىق كاۆالەرى اتاندى.
پاريج وليمپياداسىنىڭ العاشقى كۇنىندە ەل قورجىنىنا تۇسكەن التىن جارىستاعى سوڭعى التىن بولاتىنىن كىم ويلاعان؟..
پاريجدەگى ولجا
پاريج وليمپياداسىندا قازاقستان قۇراماسى 1 التىن، 3 كۇمىس، 3 قولا مەدالعا قول جەتكىزدى. ناتيجەسىندە قازاقستان قۇراماسى جالپى ەسەپتە 43-ورىننان كورىندى.
جوعارىدا جازعانىمىزداي، التىن جۇلدەنى دزيۋدودان ەلدوس سمەتوۆ يەلەنسە، كۇمىس جۇلدەنى سپورتتىق گيمناستيكادان ناريمان قۇربانوۆ، گرەك-ريم كۇرەسىنەن دەمەۋ جادىرايەۆ (77 كەلى) جانە بوكستان نۇربەك ورالباي (80 كەلى) قورجىنعا سالدى.
قولا جۇلدەنى مەرگەندەر يسلام ساتپايەۆ پەن الەكساندرا لەمەن قاتار، دزيۋدودان عۇسمان قىرعىزبايەۆ (66 كەلى) جانە ايەلدەر بوكسىنان نازىم قىزايباي (51 كەلى) جەڭىپ الدى.
وزبەك - ءوز اعام، قىرعىز- قازاق ءبىر تۋعان
وليمپيادا بارىسىندا وتانداستارىمىز باۋىرلاس ەلدەردىڭ سپورتشىلارىنا دا جانكۇيەرلىك تانىتقانىن كوردىك. وزبەك، قىرعىز جانكۇيەرلەرى دە پاريج تورىندە «قازاقستان!» دەپ كوك تۋدى جەلبىرەتىپ، دەمەۋ كورسەتكەنى ءمالىم. وسى رەتتە، اتالعان ەكى ەل سپورتشىلارىنىڭ تاريحي جارقىن جەتىستىكتەرىن اتاپ ءوتۋدى ءجون كوردىك.
پاريج وليمپياداسىندا قىرعىزستان قۇراماسى 2 كۇمىس، 4 قولا مەدال ەنشىلەدى. اتاپ ايتساق، ايەلدەر كۇرەسىنەن مەيىرىم جۇمانازاروۆا مەن بوكسشى مۇناربەك سەيىتبەك ۇلى كۇمىس مەدال يەلەنسە، گرەك-ريم كۇرەسىنەن جولامان شارشەنبەكوۆ، اقجول ماحمۋدوۆ، ۋزۋر جۋزۋپبەكوۆ، ايەلدەر كۇرەسىنەن ايسۇلۋ تىنىبەكوۆا قولاعا قول جەتكىزدى.
ايتا كەتەيىك، قىرعىزدار ازىرگە وليمپيادا ويىندارىنان التىن مەدال الا الماي ءجۇر. 57 كەلى سالماقتا جۇدىرىقتاسقان
سەيىتبەك ۇلى تاريحقا وزگەرىس ەنگىزۋگە شاق قالعان ەدى. دەسە دە، ول قىرعىز تاريحىنا بوكستان العاشقى جۇلدە سىيلاعان سپورتشى رەتىندە تىركەلدى.
پاريج وليمپياداسىندا وزبەكستان قۇراماسى تاريحي جۇلدەلەرىنە قول جەتكىزدى.
ناقتىراق ايتساق، ولار پاريج تورىنەن 8 التىن، 2 كۇمىس، 3 قولا مەدال جەڭىپ الىپ، جالپى مەدالدار كەستەسىندە 13-ورىنعا تۇراقتادى. بۇل - وزبەكستان قۇراماسىنىڭ وليمپيادا ويىندارىنداعى ەڭ ۇزدىك تاريحي كورسەتكىشى.
وزبەكستان قۇراماسىنداعى 8 التىننىڭ بەسەۋىن بوكسشىلار جەڭىپ السا، قالعان ۇشەۋىن دزيۋدو، ەركىن كۇرەس جانە تاەكۆوندودان سىنعا تۇسكەن سپورتشىلار ەنشىلەدى.
التىندى بوكستان حاسانبوي دۋسماتوۆ، اسادحۋدجا مۋيدينحۋجايەۆ، لازيزبەك مۋللاجونوۆ، ابدۋماليك حالوكوۆ، جانە اسا اۋىر سالماقتا باحودير جالولوۆ جەڭىپ الدى.
وسىلايشا وزبەكستان بوكسشىلارى اراسىنان ەكى بىلعارى قولعاپ شەبەرى ەكى دۇركىن وليمپيادا چەمپيونى دەگەن اتاققا قول جەتكىزدى. جالولوۆ وسىعان دەيىن توكيو وليمپياداسىندا تاعى دا +92 كەلى سالماقتا توپ جارعان بولاتىن. ال دۋسماتوۆ 2016 -جىلى وتكەن ريو وليمپياداسىندا توپ جارعان ەدى.
ال دزيۋدودان ديەرا كەلديەروۆا چەمپيون اتانسا، ەركىن كۇرەستەن رازامبەك جامالوۆ باس جۇلدەنى قانجىعالادى. سونىمەن قاتار تاەكۆوندوشى ۋلۋگبەك راشيدوۆ چەمپيون اتاندى.
ديماشتىڭ داۋىسى ءھام بولگار قىزىنىڭ كۇمىسى
وليمپيادا ويىندارىندا بولگاريانىڭ كوركەم گيمناستيكا سپورتشىسى بوريانا كالەين ديماش قۇدايبەرگەننىڭ «SOS d’un terrien en détresse» كومپوزيتسياسىنا ونەر كورسەتتى.
ناتيجەسىندە ديماشتىڭ انىندە ونەر كورسەتكەن گيمناست پاريج وليمپياداسىنىڭ كۇمىس جۇلدەگەرى اتاندى.
ايتا كەتەيىك، ديماش ەسىمى الەمگە ءدال وسى ءان ارقىلى تانىلعان بولاتىن. ول 2017 -جىلى قىتايداعى «I’m a singer» جوباسىنا قاتىسىپ، «SOS d’un terrien en détresse» ءانىن فرانسۋز تىلىندە شىرقاعان ەدى.
پاريج وليمپياداسىندا ادەتتەگىدەي رەكوردتار، توسىن سىيلار، كۇتپەگەن وقيعالار تىركەلگەنى انىق. بۇل رەتتە، جانكۇيەرلەر ەسىندە قالعان ايشىقتى ساتتەرگە توقتالعاندى ءجون كوردىك.
كۋبالىق بالۋان - 5 دۇركىن وليمپيادا چەمپيونى!
41 جاستاعى كۋبالىق پالۋان ميحاين لوپەس نۋنەس پاريج تورىندە گرەك-ريم كۇرەسىنەن 130 كەلىگە دەيىنگى سالماقتا توپ جارىپ، سپورتتىق مانسابىندا 5 دۇركىن وليمپيادا چەمپيونى اتاندى. بۇعان دەيىن نۋنەس بەيجىڭ، لوندون، ريو جانە توكيو وليمپياداسىندا التىن مەدال تاققان ەدى.
پاريجدەگى فينالدان سوڭ كۋبالىق بالۋان مانسابىن اياقتايتىنىن ايتىپ، بوزكىلەمگە اياق-كيىمىن قالدىرىپ كەتتى.
مەن - ايەلمىن!
وليمپيادا بارىسىندا الەمدى ەلەڭ ەتكىزگەن تاعى ءبىر ماسەلە - گەندەرلىك داۋ. اتاپ ايتساق، ايەلدەر بوكسىندا 66 كەلى سالماقتا الجير نامىسىن قورعاعان يمان حەليفتى قارسىلاستارى «ترانسگەندەر» دەپ ايىپتاپ، ەركەكپەن جۇدىرىقتاسىپ جاتقانداي اسەردە ەكەنىن العا تارتقان بولاتىن.
دەسە دە، بوكسشىنىڭ اكەسى ونىڭ بالا كۇنگى سۋرەتتەرى مەن تۋۋ تۋرالى كۋالىگىنىڭ سۋرەتىن كورسەتىپ، قىزىنا قاتىستى داۋدىڭ نۇكتەسىن قويدى. وليمپيادا بويى جاعىمسىز پىكىرلەردى ەستىپ كەلگەن يمان حەليف اقىرى پاريج وليمپياداسىنىڭ چەمپيونى اتاندى.
ايتا كەتەيىك، 2023 -جىلى حالىقارالىق بوكس فەدەراتسياسى (IBA) حەليف پەن تايۆاننان لين يۋيتيندى ءۇندىستانداعى الەم چەمپيوناتىندا گەندەرلىك تەست ناتيجەسىنە بايلانىستى ديسكۆاليفيكاتسيالاعان بولاتىن. بۇل تەستتە ونىڭ ەر ادامنىڭ بويىندا بولاتىن تەستەستەروندارى كوپ ەكەنى انىقتالعان ەدى. ال 2024 -جىلى حالىقارالىق وليمپيادا كوميتەتى وعان ايەلدەر اراسىنداعى جارىستارعا قاتىسۋعا رۇقسات بەردى.
تۇرىك مەرگەنى ينتەرنەتتىڭ جۇلدىزىنا اينالدى
51 جاستاعى تۇرىك مەرگەنى - يۋسۋف ديكەچ وليمپيادادا كۇمىس جۇلدەگە قول جەتكىزگەننەن كەيىن الەمدىك ينتەرنەتتە جۇلدىزعا اينالدى. سپورتشىنىڭ ءمىنسىز ستيلى مەن جابدىقتى كيۋدەن باس تارتۋى ونى تانىمال ەتكەنىن اتاپ وتكەن ءجون.
وليمپيادا بارىسىندا جۇلدە العان وزگە ەلدىڭ سپورتشىلارى مەرگەننىڭ تۇرىسىن قايتالاپ، جەڭىسىن تويلاپ جاتتى.
ايتا كەتەيىك، يۋسۋف ديكەچ ZOOM ارقىلى Jibek Joly جۋرناليسى كۇنسايا قۇرمەتكە سۇحبات بەردى.
ءتۇيىن: مەدال كورسەتكىشى بويىنشا ا ق ش سپورتشىلارى قاتارىنان 4-مارتە جەڭىمپاز اتانعانىن اتاپ وتكەن ءجون. ح و ك رەسمي سايتىنىڭ اقپاراتىنا سۇيەنسەك، ا ق ش سپورتشىلارى قىتاي سپورتشىلارىن سوڭعى ساتتە عانا باسىپ وزعان.
اتاپ ايتساق، ا ق ش سپورتشىلارىنىڭ قورجىنىندا 40 التىن، 44 كۇمىس، 42 قولا بار. ال، ولاردىڭ باستى قارسىلاسى قىتاي حالىق رەسپۋبليكاسى 91 مەدالمەن (40، 27، 24) جازعى وليمپيادا ويىندارىن اياقتادى.
ارينە، قاي سپورتتى الساق تا، ەرەكشە وقيعالار تىركەلىپ جاتتى. حالقى از ەلدەر، سايكەسىنشە پاريجگە از سپورتشىمەن كەلگەن مەملەكەتتەر ءوز تاريحىندا العاشقى جۇلدەلەرىن الدى. ۇزدىكتەر كوش سوڭىندا قالسا، السىزدەر توپ جاردى. بۇل - سپورتتىڭ زاڭدىلىعى. «باپ شابا ما، باق شابا ما؟» دەپ وسىنداي ءدۇبىرلى دودالاردا ايتىلسا كەرەك.
ەندىگى جازعى وليمپيادا ويىندارى ا ق ش-تىڭ لوس-اندجەلەس قالاسىندا وتەدى. پاريجدە باعى جانباعاندار ا ق ش تورىندە جاسىنداي جارقىلدار. قازاقستان قۇراماسى دا قورجىنعا التىندى مول سالار. ۋاقىت - تورەشى.
اۆتور
ورالحان قوجانوۆ