قوعام قازىرگى زاڭداردى كەز كەلگەن ماسەلەنى شەشۋدىڭ كىلتى دەپ قابىلدايدى - ەرلان قوشانوۆ
استانا. KAZINFORM - ەلوردادا AMANAT پارتياسىنىڭ ءماسليحات دەپۋتاتتارىنىڭ فورۋمى باستالدى. ءىس-شاراعا مەملەكەت باسشىسى قاسىم-جومارت توقايەۆ قاتىسىپ جاتىر.
«سوڭعى جىلدارى ەلىمىزدە تۇبەگەيلى رەفورمالار قولعا الىندى. كونستيتۋتسيالىق وزگەرىستەر ناتيجەسىندە ساياسي ينستيتۋتتاردىڭ ۇيلەسىمدى جۇمىسى جولعا قويىلدى. بۇل رەفورمالار تۇيتكىلدى ماسەلەلەردى شەشۋگە، بايىپتى شەشىمدەردى قابىلداۋعا جول اشتى. زاڭ شىعارۋشى ورگاننىڭ قىزمەتى مەن مازمۇنى دا تولىقتاي وزگەردى. كوپپارتيالى پارلامەنت ءتۇرلى پىكىرلەردى توعىستىرعان قوعامنىڭ ۇنىنە اينالدى»، - دەدى ءماجىلىس سپيكەرى، «AMANAT» پارتياسىنىڭ ءتوراعاسى ەرلان قوشانوۆ فورۋمنىڭ اشىلۋىندا.
ونىڭ ايتۋىنشا، قازىرگى ۋاقىتتا كۇن تارتىبىندەگى كەز كەلگەن ماسەلە پارلامەنت قابىرعاسىندا اشىق تالقىلانىپ جاتىر.
«ازاماتتاردى الاڭداتقان ەڭ كوكەيكەستى ماسەلەلەر زاڭنامالىق دەڭگەيدە شەشىمىن تاۋىپ جاتىر. مىسالى، حالىقتىڭ نەسيە قارىزى، ايەلدەر مەن بالالارعا قاتىستى زورلىق-زومبىلىق، لۋدومانيا، ەسىرتكىگە تاۋەلدىلىك، ۆەيپتەر سياقتى كەسەلدەرگە زاڭمەن توسقاۋىل قويىلدى. قاسىم-جومارت كەمەل ۇلى، وسىنىڭ ءبارى - ءوزىڭىز ايتىپ جۇرگەن زاڭ ۇستەمدىگى مەن ءتارتىپ قاعيداسىنىڭ ءىس جۇزىندەگى كورىنىسى. بۇعان قوسا، ادىلدىككە سۋساپ وتىرعان حالىقتىڭ تالاپ-تىلەگى ورىندالىپ جاتىر. وڭ وزگەرىستەردى قوعام شىنايى سەزىنىپ وتىر. وسى ورايدا ءبىرقاتار ماڭىزدى زاڭ قابىلداندى. سونىڭ ناتيجەسىندە قولدى بولعان اكتيۆتەر، زاڭسىز شەتەل اسقان قاراجات قايتارىلۋدا. «ۇلتتىق قور - بالالارعا» جوباسىنىڭ جەمىسىن ءار بالا، ءار وتباسى كورە باستادى»، - دەدى ە. قوشانوۆ.
سونىمەن بىرگە، زاڭنامالىق جۇمىستاردىڭ جاڭا باعدارى قازاق پارلامەنتاريزمىنىڭ دامۋىنداعى ءبىر بەلەسكە اينالدى. زاڭ شىعارۋ ىسىندە پىكىر الۋاندىعى مەن يدەيالاردىڭ شىنايى باسەكەسىنە باسىمدىق بەرىلىپ وتىر.
«ءبىر سوزبەن ايتقاندا، قوعام قازىرگى زاڭداردى كەز كەلگەن ماسەلەنى شەشۋدىڭ كىلتى رەتىندە قابىلدايدى. مۇنىڭ ءبارى - مەملەكەت باسشىسى ۇسىنعان «مىقتى پرەزيدەنت - ىقپالدى پارلامەنت - ەسەپ بەرەتىن ۇكىمەت» فورمۋلاسىنىڭ ناقتى ناتيجەسى. وسى الگوريتم ايماقتىق دەڭگەيدە ءتيىمدى جۇمىس ىستەيتىن بولسا، قوردالانعان ماسەلەلەردىڭ كوبىن جەرگىلىكتى جەردىڭ وزىندە- اق شەشۋگە قول جەتكىزەمىز»، - دەدى پارتيا ءتوراعاسى.
ايتا كەتەيىك، فورۋمعا قاتىسۋشىلار قاتارىندا پارلامەنت سەناتى مەن ءماجىلىس ءتوراعالارى، پرەمەر-مينيستر، مەملەكەتتىك كەڭەسشى، پرەزيدەنت اكىمشىلىگىنىڭ باسشىلىعى، ۇكىمەت مۇشەلەرى، پارلامەنت جانە ءماسليحات دەپۋتاتتارى بار.