قۇتقارۋشىلار قازاقستاندا جوعالعان تىكۇشاقتىڭ بولشەكتەرىن تاپتى

استانا. KAZINFORM - ق ر توتەنشە جاعدايلار مينيسترلىگى وتار ەلدى مەكەنى اۋماعىندا بايلانىس ۇزىلگەن اۋە قورعانىس كۇشتەرىنىڭ تىكۇشاعىنا قاتىستى وقيعانىڭ ءمان-جايىن انىقتاۋ بويىنشا ىزدەستىرۋ-قۇتقارۋ جۇمىستارىن تاۋلىك بويى جالعاستىرۋدا.

توتەنشە جاعدايلار مينيسترلىگىنىڭ كوماندالىق ورتالىعىندا جۇرگىزىلگەن عارىشتىق مونيتورينگ بارىسىندا الماتى وبلىسىنداعى سوربۇلاق كولىنىڭ اكۆاتورياسىندا مايلى داقتىڭ بولۋى مۇمكىن ەكەندىگى انىقتالدى.

- ت ج م قۇتقارۋشىلار توبى شۇعىل تۇردە اتالعان ايماققا شىقتى. ىزدەۋ جۇمىستارى تۇنگى ۋاقىتتا دا جالعاستى. جۇمىس بارىسىندا قورعانىس مينيسترلىگىنە تيەسىلى بولۋى مۇمكىن اۋە كەمەسىنىڭ فراگمەنتتەرى تابىلدى، - دەلىنگەن اقپاراتتا.

وقيعا ورنىندا ت ج م قۇتقارۋشىلارى جۇمىس ىستەۋدە. ەحولوتتار، ۇشقىشسىز ۇشۋ اپپاراتتارى جانە سۋاستى دروندارى سياقتى ارنايى جابدىقتار پايدالانىلۋدا.

ىزدەستىرۋ- قۇتقارۋ جۇمىستارىنا جەكە قۇرامنان 200-گە جۋىق ادام، 40 بىرلىك تەحنيكا، 15 سۋ كولىگى، 4 كينولوگيالىق ەسەپتوپ جانە 2 ت ج م اۋە كەمەسى تارتىلعان.

ايتا كەتەيىك، بۇعان دەيىن وتار ماڭىندا تىكۇشاقتى ىزدەستىرۋ-قۇتقارۋ جۇمىستارى جۇرگىزىلىپ جاتقانى حابارلانعان.

اۆتور

داۋلەت ىزتىلەۋ