قۇس فابريكاسى، وسىمدىك مايى جانە جۇگەرى زاۋىتى: بيىل ىسكە قوسىلاتىن اگرو-جوبالار

استانا. KAZINFORM - بيىل ەل اۋماعىندا ءبىرقاتار اگروونەركاسىپ كەشەنى جوباسى ىسكە قوسىلادى. جوبالار تۋرالى تولىعىراق اۋىل شارۋاشىلىعى ۆيتسە-ءمينيسترى ەرمەك كەنجەحان ۇلى ايتىپ بەردى.

- بيىل اگروونەركاسىپ باعدارلامانى جالعاستىرۋ ءۇشىن 154 جوباعا 200 ميلليارد تەڭگە قاراستىرىلعان، ونىڭ ىشىندە 82 جوبانىڭ جوبالىق-سمەتالىق قۇجاتتاماسى مەن ساراپتاماسى دايىن. بيىل ءبىرقاتار ءىرى قازاقستاندىق جوبا ىسكە اسىرىلىپ جاتىر، - دەدى ەرمەك كەنجەحان ۇلى ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا.

بيىل ىسكە قوسىلاتىن جوبالار:

- تۇركىستان وبلىسىندا «قازكراحمال» ج ش س جىلىنا 150000 توننا كولەمىندە جۇگەرىنى تەرەڭ وڭدەۋ زاۋىتى ىسكە قوسىپ جاتىر. جوبانىڭ جالپى قۇنى - 35 ميلليارد تەڭگە؛

- شىعىس قازاقستان وبلىسىندا «ALTAI MAI» ج ش س جىلىنا 169000 توننا وسىمدىك مايىن وندىرەتىن ماي زاۋىتىن ىسكە قوسىپ جاتىر. جوبانىڭ قۇنى - 26,4 ميلليارد تەڭگە؛

- جامبىل وبلىسىندا «الەل اگرو» ا ق جىلىنا 25000 توننا ءونىم وندىرەتىن قۇس فابريكاسىن ىسكە قوسۋ جوسپارلانىپ وتىر. جوبانىڭ قۇنى - 13,8 ميلليارد تەڭگە؛

- اتىراۋ وبلىسىندا «ATYRAU CHICKEN» ج ش س جىلىنا 5000 توننا ءونىم بەرەتىن برويلەر قۇس فابريكاسىن ىسكە قوسۋ كۇتىلىپ وتىر. جوبانىڭ قۇنى - 9,9 ميلليارد تەڭگە؛

- اقتوبە وبلىسىندا «KazFeltec» ج ش س جىلىنا 2500 توننا شيكىزاتتى باستاپقى وڭدەپ، توقىما ەمەس ماتەريالدار وندىرەتىن زاۋىتتى ىسكە قوسۋ جوسپارلانعان. جوبانىڭ جالپى قۇنى - 5 ميلليارد تەڭگە.

بۇعان دەيىن حابارلاعانىمىزداي بيىل ءتورت ايدا اگروونەركاسىپ كەشەنىنە 213 ميلليارد تەڭگە ينۆەستيتسيا تارتىلدى.