قۇرىلىسى ءالى بىتپەگەن ۇيدەن پاتەر الار كەزدە نەنى ءبىلۋ كەرەك

استانا. KAZINFORM - «قازاقستان تۇرعىن ءۇي كومپانياسى» اكسيونەرلىك قوعامىنىڭ باسقارما ءتوراعاسى التاي كۇزدىبايەۆ ۇلەسكەر قۇرىلىسقا اقشا ساعان كەزدە الدانباۋ ءۇشىن نە ىستەۋ كەرەكتىگىن ايتتى.

«ءبىزدىڭ ازاماتتار قۇرىلىسى ءالى بىتپەگەن نىساننان پاتەر ساتىپ الاتىن كەزدە ەڭ اۋەلى ساتۋ بولىمىنەن نىساننىڭ قۇجاتتارىن تەكسەرۋ كەرەك. قۇرىلىسقا ۇلەسكەردىڭ اقشاسىن تارتۋعا رۇقسات بەرەتىن اكىمدىكتىڭ نەمەسە «قازاقستان تۇرعىن ءۇي كومپانياسى» اكسيونەرلىك قوعامىنىڭ كەپىلدىگى بولۋ كەرەك. وسى قۇجاتتار بويىنشا homeportal.kz رەسۋرسىنان اتالعان نىسان تۋرالى اقپاراتتاردى تەكسەرە الادى. ول رەسۋرستا سالىنىپ جاتقان نىساننىڭ ورنى، قاشان سالىنىپ بىتەتىنى، قولدانىسقا قاشان بەرىلەتىنى، نەشە پاتەرلىك ءۇي ەكەنى، تەحنيكالىق قاداعالاۋدى قانداي كومپانيا جۇرگىزەتىنى، قۇرىلىسقا قانداي كومپانيا جاۋاپتى ەكەنى تۋرالى مالىمەتتىڭ ءبارى بار. جىل اياعىنا دەيىن وسى پورتالدان ۇلەسكەرلەردى ونلاين قولداۋ ورتالىعىن اشامىز. بۇل مالىمەتتەر پورتالدا جوق بولسا، ول نىساننىڭ سالىنىپ بىتەتىنىنە مەملەكەت كەپىلدىك بەرگەن جوق دەگەن ءسوز. ال مەن اتاعان مالىمەتتىڭ ءبارى پورتالدا بولسا، ساتۋ بولىمىندە ساتۋ-ساتىپ الۋ كەلىسىمشارتىن جاساعاندا ءاربىر ءسوزدى مۇقيات وقىپ، ءمانىن ءتۇسىنۋ كەرەك. ۇلەسكەرلىك قاتىسۋدىڭ كەلىسىمشارتى ونەركاسىپ جانە قۇرىلىس ءمينيسترىنىڭ بۇيرىعىمەن بەكىتىلگەن تيپتىك ۇلگى بويىنشا جازىلادى. ءوزىڭىز قول قوياتىن كەلىسىمشارت سول تيپتىك فورماعا سايكەس كەلە مە، جوق پا دەگەندى قاراۋ كەرەك»، - دەيدى ول.

سونداي-اق، ۇلەسكەر اقشاسىن تارتۋعا رۇقساتى جوق نىساننان پاتەر ساتىپ العان ادامنىڭ قۇقىعىن ەرتەڭ ەشكىم قورعامايتىنىن ەسكەرتەدى.

«تاعى دا قايتالاپ ايتامىن، جوبالاۋ-سمەتالىق قۇجاتتارى مەن ۇلەسكەر اقشاسىن تارتۋ رۇقساتىن كورسەتپەگەن كومپانيادان اۋلاق بولعان دۇرىس. ونداي رۇقساتتى جەرگىلىكتى اكىمدىك نەمەسە قازاقستان تۇرعىن ءۇي كومپانياسى بەرەتىنىن ايتتىم. وسى ەكى قۇجاتتى سۇراۋ كەرەك. بۇل قۇجاتتار بولماسا، ەرتەڭ ساتىپ العان ءۇيىڭىز سالىنىپ بىتپەي قالسا، زاڭ دا، اكىمدىك تە سىزگە كومەكتەسە المايدى. قۇقىعىڭىز 100 پايىز بۇزىلادى. اكىمدىككە بارساڭىز قۇقىق قورعاۋ ورگاندارىنا سىلتەۋمەن شەكتەلەدى. ويتكەنى اكىمدىك كەپىلدىك بەرمەگەن نىسانعا اقشا سالعان بولىپ شىعاسىز»، - دەدى التاي كۇزدىبايەۆ.

اۆتور
ەسىمجان ناقتىباي