قۇرىلىسى بىتپەگەن ءۇيدىڭ قۇجاتتارىن قالاي تەكسەرۋ كەرەك - رەسمي نۇسقاۋلىق
استانا. KAZINFORM - قازاقستاندا كوپقاباتتى ءۇي سالىپ جاتقان 348 قۇرىلىس كومپانياسىنىڭ ۇلەسكەردىڭ اقشاسىن تارتۋعا رۇقساتى جوق. قازىر بۇل كومپانيالار ەل اۋماعىنداعى 394 نىساننىڭ قۇرىلىسىن جۇرگىزىپ جاتىر.
بۇل - وسى 394 ۇيدەن پاتەر تاڭداپ، الدىن الا اقشا سالعان ادامدار ەرتەڭ سازعا وتىرىپ قالۋى مۇمكىن دەگەن ءسوز. رەسپۋبليكا بويىنشا ەڭ كوپ رۇقساتسىز سالىنىپ جاتقان نىساندار: ماڭعىستاۋ وبلىسىندا (125 ءۇي)، الماتىدا (83 ءۇي)، اتىراۋ (37 ءۇي)، شىعىس قازاقستان (31 ءۇي) وبلىستارىندا، استانادا (26 ءۇي)، اقمولا وبلىسىندا (24 ءۇي).
Kazinform ءتىلشىسى «قازاقستان تۇرعىن ءۇي كومپانياسى» ماماندارىنىڭ كەڭەسى نەگىزىندە وقىرمانعا وسىنداي كۇماندى مامىلەگە ۇرىنباۋ ءۇشىن قالاي ارەكەت ەتۋ كەرەكتىگى جونىندە ماتەريال ۇسىنادى.
الەۋمەتتىك جەلىدە ءالى سالىنىپ بىتپەگەن ۇيلەردىڭ كوز جاۋىن الاتىن جارناماسى جەتەرلىك. بۇل اسىرەسە جيعان-تەرگەنى يپوتەكانىڭ باستاپقى جارناسىنا جەتپەيتىن، بورىش مەرزىمىن 10-15 جىلعا سوزعاننىڭ وزىندە اي سايىنعى تولەمى تابىسىنان اسىپ تۇسەتىن ادامدارعا ءتيىمدى جول بولىپ كورىنەدى. سەبەبى قۇرىلىسى ەندى باستالعان پاتەردىڭ باعاسى دايىن پاتەردىڭ باعاسىنان شامامەن 30 پايىزعا ارزان شىعادى. ارتىلعان از عانا اقشاسىن جىلجىمايتىن مۇلىككە ينۆەستيتسيالاعىسى كەلەتىندەر دە ۇلەستىك قۇرىلىسقا قاراجات قۇيىپ جاتادى. ىرگەتاس كەزىندە ارزان باعاعا «ساتىپ العان» پاتەر ەرتەڭ قۇرىلىس ءبىتىپ، قولدانىسقا بەرىلگەندە ونداعان پايىزعا قىمباتتاپ شىعا كەلەدى. سالىنعان ءۇيدىڭ ورنالاسقان جەرى نەعۇرلىم ەليتالى اۋداندا بولسا، كىرەتىن مارجا دا سوعۇرلىم كوبىرەك. الايدا، بۇل جەردە ەسكەرۋ قاجەت كوپتەگەن فاكتوردىڭ بار ەكەنىن بىلگەن ابزال.
سوڭى سوتقا دەيىن جەتكەن ۇلەسكەرلىك داۋلاردىڭ كوپتىگىنە قاراماستان، مۇنداي ونىمدەرگە سۇرانىستىڭ تۇسپەي تۇرعانىن وسىنداي موتيۆتەرمەن بايلانىستىرۋعا بولادى.
سوندىقتان بۇل جاعدايعا تۇسپەس ءۇشىن ءاربىر ۇلەسكەر ءوز قۇقىقتارىن ءبىلۋى قاجەت. ونىڭ ەڭ نەگىزگىسى - قۇرىلىسى سالىنىپ جاتقان نىسان بويىنشا ۇلەسكەردىڭ قاراجاتىن تارتۋعا جەرگىلىكتى اكىمدىكتەن العان رۇقساتى نەمەسە قازاقستان تۇرعىن ءۇي كومپانياسىنىڭ ءبىرىڭعاي وپەراتور رەتىندە بەرگەن كەپىلدىگى بولۋى قاجەت. قازىر بۇل اقپاراتتى تەكسەرۋ وتە وڭاي، سەبەبى ارنايى رۇقساتى بار نىسانداردىڭ ءتىزىمى مەن نىسان تۋرالى تولىق اقپارات اشىق تۇردە مىنا پورتالدا جاريالانىپ تۇر. بۇل ءتىزىمدى جەرگىلىكتى اكىمدىكتەر بەرىپ وتىرادى.
رەسۋرستى «قازاقستان تۇرعىن ءۇي كومپانياسى» اكسيونەرلىك قوعامى ازىرلەگەن. اتالمىش ۇيىمنىڭ مالىمەتى بويىنشا، ەل اۋماعىندا ۇلەسكەردىڭ قاراجاتىن تارۋعا رۇقساتى جانە ءبىرىڭعاي وپەراتوردىڭ كەپىلدىگى بار 892 نىسان تىركەلگەن. ونىڭ 703- ءى اياقتالعان، 189-سى ءالى سالىنىپ جاتىر. وسى سالىنىپ بىتپەگەن 189 ءۇيدىڭ 41-ىندە «قازاقستان تۇرعىن ءۇي كومپانياسى» ا ق كەپىلدىگى بار، 23-ىنە اكىمدىكتەردىڭ، ال 125-ىنە ەكىنشى دەڭگەيلى بانكتەردىڭ ارنايى رۇقساتى بەرىلگەن.
ال ۇلەسكەر قارجىسىن تارتۋعا ەشقانداي رۇقساتى جوق 394 نىسان سالىنىپ جاتقانىن ءسوز باسىندا ايتتىق. بۇل ۇيلەرگە ۇلەسكەر رەتىندە اقشا سالعاندار قۇرىلىس اياق استىنان توقتاپ، قولدانىسقا بەرىلمەي جاتسا، ماسەلەنى ازاماتتىق نەگىزدە، تەك سوت ارقىلى عانا شەشە الادى. ويتكەنى اكىمدىك تە، «ق ت ك» ا ق دا كەپىلدىك بەرمەگەن.
«جوبالاۋ-سمەتالىق قۇجاتتارى مەن ۇلەسكەر اقشاسىن تارتۋ رۇقساتىن كورسەتپەگەن كومپانيادان اۋلاق بولعان دۇرىس. ونداي رۇقساتتى جەرگىلىكتى اكىمدىك نەمەسە قازاقستان تۇرعىن ءۇي كومپانياسى بەرەتىنىن ايتتىم. وسى ەكى قۇجاتتى سۇراۋ كەرەك. بۇل قۇجاتتار بولماسا، ەرتەڭ ساتىپ العان ءۇيىڭىز سالىنىپ بىتپەي قالسا، زاڭ دا، اكىمدىك تە سىزگە كومەكتەسە المايدى. قۇقىعىڭىز 100 پايىز بۇزىلادى. اكىمدىككە بارساڭىز قۇقىق قورعاۋ ورگاندارىنا سىلتەۋمەن شەكتەلەدى. ويتكەنى اكىمدىك كەپىلدىك بەرمەگەن نىسانعا اقشا سالعان بولىپ شىعاسىز»، - دەيدى «ق ت ك» ا ق باسقارما ءتوراعاسى التاي كۇزدىبايەۆ.
سونىمەن Homeportal پورتالىندا مەملەكەت كەپىلدىك بەرگەن ۇلەسكەرلىك قۇرىلىستاردى ىزدەۋ ءۇشىن مىنا ارەكەتتەردى جاساۋ كەرەك:
1. پورتالعا كىرگەننەن كەيىن وڭ جاقتاعى جوعارعى بۇرىشتان قازاق نەمەسە ورىس ءتىلىن تاڭدايسىز.
2. بۇدان كەيىن «جەكە تۇلعالارعا» ارنالعان اقپاراتتار بازاسىن تاڭدايسىز.
3. «ۇلەستىك قۇرىلىس وبەكتىلەرى» باتىرماسىنا ءوتۋ كەرەك.
4. بۇل باتىرمانى باسقاندا ەكراندا قازاقستاننىڭ كارتاسى بار ينترەفەيس اشىلادى. ودان ءوزىڭىز قىزىعۋشىلىق تانىتقان تۇرعىن ءۇيدىڭ مالىمەتتەرىن تەكسەرۋ ءۇشىن تۇرعىن ءۇي كەشەنىنىڭ رەسمي اتاۋىن نەمەسە ونى سالىپ جاتقان كومپانيانىڭ بيزنەس سايكەستەندىرۋ ءنومىرىن (ب س ن) ءبىلۋىڭىز كەرەك. وسى ەكى مالىمەتتىڭ ءبىرىن ىزدەۋ جولىنا تەرىپ، «ىزدەۋ» پارمەنىن باسۋ قاجەت.
5. ەگەر ءسىز ىزدەپ وتىرعان تۇرعىن ءۇي كەشەنىنە اقشا سالۋشىلارعا جەرگىلىكتى اكىمدىك نەمەسە «قازاقستان تۇرعىن ءۇي كومپانياسى» اكسيونەرلىك قوعامى كەپىلدىك بەرگەن بولسا، اشىلعان پاراقشانىڭ استىڭعى بولىگىندە ءسىز ىزدەگەن نىساننىڭ اتاۋى شىعادى.
سول جەردەن «جوبانى قاراۋ» باتىرماسىنا كىرىپ، نىساندى سالىپ جاتقان مەردىگەر كومپانيانىڭ تولىق اتاۋى، قاشان قولدانىسقا بەرىلەتىنى، نەشە قاباتتى، نەشە پاتەرلى ءۇي ەكەنى ت. ب. مالىمەتتەر شىعادى.
بۇل - وسى تۇرعىن ۇيگە ۇلەسكەر رەتىندە اقشا سالىپ، قۇرىلىس بىتپەي قالعان كۇننىڭ وزىندە مەملەكەت ءسىزدىڭ قۇقىعىڭىزدى قورعايدى دەگەن ءسوز. ەگەر اكىمدىك كەپىلدىك بەرگەن بولسا، مەردىگەردى اۋىستىرىپ، قۇرىلىستى اياقتايدى دا، باستاپقى كەلىسىمشارتتا كورسەتىلگەن باعامەن سىزگە ساتادى. ال ءۇيدىڭ سالىنىپ بىتكەنىن كۇتكىڭىز كەلمەسە، ۇلەسكەرلىك كەلىسىمشارتتىڭ نورمالارى ىسكە قوسىلادى. قاراپايىمداپ ايتساق، كەپىل بەرۋشى اكىمدىك نەمەسە «ق ت ك» ا ق قۇرىلىسقا تارتقان باسقارۋشى كومپانيا نىساندى اياقتاپ، ءسىز باس تارتقان پاتەردى ساتىپ، سونىڭ اقشاسىنان ءسىزدىڭ الدىن الا تولەم رەتىندە اۋدارعان اقشاڭىزدى قايتارىپ بەرەدى.
6. ەگەر ءسىز ىزدەگەن نىسانعا اكىمدىك تە، «قازاقستان تۇرعىن ءۇي كومپانياسى» ا ق دا كەپىلدىك بەرمەگەن بولسا، ىزدەۋ پاراعىنىڭ اياق جاعىندا مىنانداي جازۋ شىعادى.
7. ءوزىڭىز ىزدەگەن ءۇيدى تەزىرەك تابۋ ءۇشىن ينفوگرافيكالىق كارتادان قاجەت ءوڭىردى تەرىپ تە ىزدەۋگە بولادى. كەرەك وبلىستىڭ ۇستىنە باسىپ، كەپىلدىك بەرىلگەن نىسانداردىڭ ءتىزىمىن كورىپ شىعۋعا بولادى.
8. العاشقى ىزدەۋ تاسىلىنەن ءسىز ىزدەگەن نىسان تابىلماسا، مەملەكەت كەپىلدىگى بەرىلمەگەنىنە كوز جەتكىزۋ ءۇشىن (كومپيۋتەردەن) «ۇلەستىك قۇرىلىس وبەكتىلەرى» باتىرماسىنا قايتا ءوتىپ، «رۇقساتسىز/كەپىلدىكسىز نىساندار» باتىرماسىنا ءوتۋ قاجەت.
باتىرما پاراقشاسىنان نە تۇرعىن ءۇي كەشەنىنىڭ اتاۋى ارقىلى، نە كارتاداعى ءوڭىردى باسۋ ارقىلى كەپىلدىك الماعان نىسانداردىڭ ءتىزىمىن تەكسەرە الاسىز.
تەلەفوننان ىزدەگەن جاعدايدا «نەگىزگى مەنيۋدىڭ» «رۇقساتسىز/كەپىلدىكسىز نىساندار» باتىرماسىنا ءوتۋ كەرەك.
ا)
ءا)
ب)
تاڭداعان تۇرعىن ءۇيدىڭ قۇرىلىسىنا ۇلەسكەر اقشاسىن تارتۋعا رۇقسات بەرىلگەنىنە كوز جەتكىزۋمەن جۇمىس بىتپەيدى. التاي كۇزدىبايەۆ ءۇي سالۋشى كومپانيامەن كەلىسىمشارتقا وتىرعان كەزدە اسا ساق بولۋ كەرەكتىگىن ايتادى. سونداي-اق، قۇرىلىس كومپانياسىنىڭ نەگىزگى دەگەن قۇجاتتارىمەن تانىسۋ قاجەت.
بولاشاق ۇلەسكەر كومپانيادان مىنا قۇجاتتاردى سۇراۋعا حاقىلى:
ءۇي سالۋعا ارنالعان جەردىڭ قۇجاتتارى؛
قۇرىلىسقا رۇقسات قۇجاتى؛
ۇلەسكەر اقشاسىن تارتۋعا بەرىلگەن رۇقسات نەمەسە ءبىرىڭعاي وپەراتوردىڭ كەپىلدىك كەلىسىمشارتى (ءبارى ءتۇپنۇسقا قۇجات تۇرىندە كورسەتىلۋى كەرەك).
بۇدان بولەك:
كاسىپورىننىڭ قازاقستان اۋماعىندا تىركەلگەنىن راستايتىن انىقتامانىڭ؛
نىساندى جوبالاۋ قۇجاتتارىنىڭ كوشىرمەسى.
كەلىسىمشارتقا قول قويماي تۇرىپ ونىڭ مازمۇنىنا ءمان بەرۋ ماڭىزدى. قول قويۋعا ۇسىنىلعان قۇجاتتىڭ «تۇرعىن ءۇي قۇرىلىسىنا ۇلەستىك قاتىسۋ تۋرالى كەلىسىمشارت» ەكەنىنە كوز جەتكىزۋ قاجەت. مۇنىڭ ورنىنا: «برونداۋ كەلىسىمشارتى»، «ينۆەستيتسيا جاساۋ كەلىسىمشارتى»، «رەزەرۆتەۋ كەلىسىمشارتى»، «تالاپ ەتۋ قۇقىعىن باسقاعا بەرۋ كەلىسىمشارتى» سياقتى قۇجاتتار ۇسىنسا، ونداي كومپانياعا جولاماعان ابزال.
كەلىسىمشارتقا ەكىجاقتى قول قويىلعاننان كەيىن ۋاكىلەتتى كومپانيا ونى «قازرەەستر» اقپاراتتىق جۇيەسى ارقىلى جەرگىلىكتى اكىمدىكتە تىركەۋگە مىندەتتى. جەرگىلىكتى اكىمدىك ونى تىركەگەن جاعدايدا تۇرعىن ءۇي قۇرىلىسىنا ۇلەستىك قاتىسۋ تۋرالى شارتتىڭ ەسەپتىك جازباسى تۋرالى ءۇزىندى بەرىلەدى. تەك وسى قۇجات قانا جاسالعان مامىلەنىڭ زاڭدى ەكەنىن راستايدى.
اۆتور
ەسىمجان ناقتىباي