جولداۋدىڭ باستى يدەياسى - ەلدىڭ ەكونوميكالىق، قارجىلىق جانە تەحنولوگيالىق مۇمكىندىكتەرىن ازاماتتاردىڭ ءال-اۋقاتىن ارتتىرۋعا باعىتتاۋ.
وسى يدەيانى ءتۇرلى ۇيىمدار اراسىندا ءتۇسىندىرۋ ماقساتىندا ءبىر توپ قوعام وكىلدەرى استانادا بىرنەشە مەكەمەدە كەزدەسۋ وتكىزدى.
ماڭىزدى قۇجاتتاعى ەكونوميكا، كاسىپكەرلىك جانە ينۆەستيتسيا، ىزگىلىك قاسيەتتەرىن دامىتۋ تاقىرىبىن تالداعان جۇمىس توبىنىڭ قۇرامىندا قۇرىلتاي دەپۋتاتى، فيلولوگيا عىلىمدارىنىڭ دوكتورى، پروفەسسور ديحان قامزابەك ۇلى، قازاقستان حالىق كەڭەسىنىڭ مۇشەسى، وسى كەڭەستىڭ وڭىرلىك دامۋ جانە جەرگىلىكتى ءوزىن-ءوزى باسقارۋ كوميتەتىنىڭ ءتوراعاسى تابيعات زەينۇلقابدەن، قازاقستان حالىق كەڭەسىنىڭ مۇشەسى، جازۋشى، دراماتۋرگ روزا مۇقانوۆا جانە ۇلتتىق ەكونوميكا ءبىرىنشى ۆيتسە-ءمينيسترى ازامات ءامرين بولدى. توپ وكىلدەرى «اتامەكەن» كاسىپكەرلەر پالاتاسىندا كاسىپكەرلەرمەن، نازاربايەۆ ۋنيۆەرسيتەتىندە ستۋدەنتتەرمەن جانە ەسىل اۋدانى اكىمدىگىندە مەملەكەتتىك قىزمەتكەرلەرمەن كەزدەسىپ، جولداۋدىڭ ماڭىزدى تۇستارىن تەرەڭنەن تالداپ ءتۇسىندىردى. سونداي-اق قاتىسۋشىلاردىڭ سۇراقتارىنا جاۋاپ بەردى.
سپيكەرلەر پرەزيدەنت ناقتى تاپسىرمالاردى، قارجى رەسۋرستارى مەن مەرزىمدى ايقىنداعانىن العا تارتىپ، ولاردى ىسكە اسىرۋ ءۇشىن ۇكىمەتتىڭ، قۇرىلتايدىڭ، ورتالىق جانە جەرگىلىكتى اتقارۋشى ورگانداردىڭ ۇيلەسىمدى جۇمىسىن كۇشەيتۋ قاجەتتىگىن جەتكىزدى.
- جولداۋدا ەلىمىزدىڭ دامۋى ءۇشىن ماڭىزدى ەكى باستى باعىت قاراستىرىلدى: «حالىقتىق قۇرىلىس» جانە حالىقتىق تسيفرلىق ەكونوميكا. ءبىرىنشىسى الەۋمەتتىك، كولىك، ەنەرگەتيكا جانە كوممۋنالدىق ينفراقۇرىلىمدى جاڭارتۋدى كوزدەيدى. ەكىنشىسى زاماناۋي تەحنولوگيالاردى كاسىپكەرلىكتى دامىتۋدىڭ، ەڭبەك ونىمدىلىگىن ارتتىرۋدىڭ جانە تابىس تابۋ مۇمكىندىكتەرىن كەڭەيتۋدىڭ قۇرالىنا اينالدىرۋعا ارنالعان. وسى رەتتە بۇگىنگى كەزدەسۋلەرگە قاتىسۋشىلار تاراپىنان وزەكتى سۇراقتار قويىلدى. دامۋدىڭ جاڭا كەزەڭى مەملەكەتتىك شەشىمدەردىڭ ساپاسى مەن ولاردى ورىنداۋ ءۇشىن جاۋاپكەرشىلىكتى ارتتىرۋدى تالاپ ەتەدى. بۇل - بارشامىزعا ورتاق جاۋاپكەرشىلىك، - دەدى ت. زەينۇلقابدەن.
سپيكەرلەر مەملەكەت باسشىسى ايتقانداي، قازاقستاننىڭ جاڭا تاريحي كەزەڭدە تۇرعانىن تاعى دا اتاپ ءوتتى. وسى رەتتە جالپىحالىقتىق قۇرىلىس جىلىنىڭ ماڭىزى - اۋىل مەن قالا ينفراقۇرىلىمىنىڭ اراسىنداعى الشاقتىقتى جويۋدا. سونداي-اق ولار ۇلتتىڭ ساپاسىن كوتەرۋ، سانانى جاڭعىرتۋ، مادەنيەتتىلىك، ادەپتىلىك جايىن دا قوزعادى. سونىڭ اياسىندا ەلىمىزدە «كىتاپ وقيتىن ۇلت» جوباسى جاپپاي قارقىن الىپ جاتقانىن تىلگە تيەك ەتتى.
- ۇلتتىق جانە الەم ادەبيەتىنىڭ وقىرماندارى كوبەيدى. بۇل قالامگەرلەردىڭ دە جاۋاپكەرشىلىگىن كۇشەيتتى. سەبەبى كەشەگى اۋىل وقىرماندارى بۇگىندە قالالىقتارعا اينالدى. قوعامداعى ىزەتتىلىك، ادەپ، ادالدىق، ەڭبەك ادامى تاقىرىپتارى دا - وزەكتى ماسەلە. جولداۋدا ءار سالا بويىنشا تاپسىرمالار بەرىلدى. اسىرەسە، قۇرىلىس سالاسىندا وسىعان دەيىن تۇرعىن ۇيلەردىڭ، سالىنعان ەمحانالاردىڭ، مادەني ورىنداردىڭ سىن كوتەرمەگەنى بەلگىلى. ەندى وسىعان حالىقتىق باقىلاۋ، ياعني قازاقستان حالىق كەڭەسى تاراپىنان قاتاڭ قاداعالاۋ بولادى. حالىق كەڭەسى Astana Hub-پەن بىرگە ۇلكەن مونيتورينگ جۇرگىزەدى. وسىلايشا بۇعان دەيىنگى كەلەڭسىزدىكتەر جويىلىپ، حالىققا ءتيىمدى، ەل مۇددەسىنە ساي كەلەتىن شارۋالار كوبەيەدى دەپ سەنەمىز، - دەدى ر. مۇقانوۆا.
ەكونوميكالىق دامۋ كونستيتۋتسيالىق قۇندىلىقتاردى، قوعامدىق كەلىسىمدى جانە جەكە جاۋاپكەرشىلىكتى نىعايتۋمەن قاتار ءجۇرۋى ءتيىس. زاڭدى قۇرمەتتەۋ، ادال ەڭبەك، ادىلدىك جانە جاسامپاز پاتريوتيزم ودان ارعى وزگەرىستەردىڭ قوعامدىق نەگىزىن قالىپتاستىرادى.
سيفرلى ەكونوميكا تاقىرىبىندا ءسوز سويلەگەن ا. ءامرين ستراتەگيالىق ماقسات - ەكونوميكاسى تۇراقتى جانە ءومىر ءسۇرۋ ساپاسى جوعارى دەڭگەيدەگى ادىلەتتى، كۇشتى، تازا، وزىق قازاقستاندى قۇرۋ ەكەنىن جەتكىزدى. كەزدەسۋلەردە ەڭ كوپ سۇراق وسى سپيكەرگە كاسىپكەرلىك، ەكونوميكا تاقىرىبىندا قويىلدى.