قۇرىلىس قالدىقتارىن قوقىس جاشىگىنە تاستاۋعا بولا ما

زاڭگەردىڭ ايتۋىنشا، قۇرىلىس قالدىقتارى تۇرمىستىق قوقىستان بولەك ساناتقا جاتادى.

— بەتون، كافەل، سىلاق سياقتى قۇرىلىس قالدىقتارى قوقىس كونتەينەرلەرىنىڭ تەز تولۋىنا، قوقىس تاسىمالدايتىن تەحنيكانىڭ بۇزىلۋىنا جانە سانيتارلىق تالاپتاردىڭ ساقتالماۋىنا سەبەپ بولادى. سوندىقتان زاڭنامادا تۇرمىستىق جانە قۇرىلىس قالدىقتارى جەكە قاراستىرىلادى، — دەدى باقتيار كارىم.

ونىڭ سوزىنشە، جوندەۋ جۇمىستارىنان كەيىن شىققان قوقىستاردى ازاماتتار ارنايى كومپانيا ارقىلى نەمەسە پوليگونعا جەكە كولىگىمەن اپارۋعا بولادى.

— ەڭ باستىسى قوقىستاردىڭ پوليگونعا جەتكىزىلگەنىن راستايتىن قۇجات نەمەسە تۇبىرتەك بولۋ كەرەك. ال تۇرعىن ءۇيدىڭ قوقىس كونتەينەرلەرىنىڭ جانىندا قۇرىلىس قوقىستارىن ۋاقىتشا ساقتاۋعا بولمايدى. تەك تۇرعىن ءۇي اكىمشىلىگى ارنايى ورىن ءبولىپ، جەكە كونتەينەر قويعان جاعدايدا عانا قىسقا مەرزىمگە رۇقسات ەتىلەدى، — دەدى زاڭگەر.

باقتيار كارىم مۇنداي قۇقىقبۇزۋشىلىق ءۇشىن بىرنەشە اكىمشىلىك باپ قولدانىلۋى مۇمكىن ەكەنىن اتاپ ءوتتى.

— مۇنداي جاعدايدا اكىمشىلىك قۇقىقبۇزۋشىلىق تۋرالى كودەكستىڭ 505-بابى، 344-بابى جانە 434-2-بابى قولدانىلۋى مۇمكىن. ەگەر ءدال وسىنداي قۇقىقبۇزۋشىلىق ءبىر جىل ىشىندە قايتالانسا، ايىپپۇل مولشەرى ەكى ەسە ارتادى، — دەدى ول.