قۇرىلىس مينيسترلىگى: پاتەر باعاسى وسپەسە، تۇسپەيدى

استانا. KAZINFORM - ونەركاسىپ جانە قۇرىلىس مينيسترلىگى قۇرىلىس جانە تۇرعىن ءۇي-كوممۋنالدىق شارۋاشىلىق ىستەرى كوميتەتىنىڭ ءتوراعاسى باقىتجان جۇنىسبەكوۆ پاتەر باعاسى تۋرالى بولجامىن ايتتى.

«كەيىنگى 10 ايدا رەسپۋبليكا بويىنشا پاتەر باعاسى بىرىنشە پايىز ءتۇستى. بۇل نەمەن بايلانىستى دەپ ويلايسىز؟ استانادا دا، وڭىرلەردە دە باسپانا ۇلكەن اۋقىممەن سالىنىپ جاتقانىن ەسكەرسەك، باعا ءارى قاراي دا تۇسە بەرە مە؟» - دەپ سۇرادى جۋرناليست ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.

كوميتەت باسشىسى پاتەر باعاسى وسپەسە، تۇسپەيتىنىن ايتتى.

«بۇل جەردە پاتەر باعاسىنىڭ كۇرت تۇسكەنى بايقالماعانىنا سەندىرە الامىن. ويتكەنى ينفلياتسيا باسپانا باعاسىنا قالاي دا اسەر ەتەدى. 2024 -جىلدىڭ العاشقى جارتىسىنداعى قورىتىندى بويىنشا قولدانىسقا بەرىلىپ جاتقان باسپانا اۋدانىنىڭ ءوسۋ تەندەنسياسى بار. قۇرىلىس شىعىندارىنىڭ ورتاشا ستاتيستيكاسى دا 2-3 پايىز كولەمىندە ءوستى. دەي تۇرعانمەن، جاسالعان مامىلەلەر سانى تومەندەگەن. ءبىز پاتەر قۇنىنىڭ ءتۇسۋىن ءدال وسى مامىلەلەردىڭ ازايۋىمەن بايلانىستىرامىز. جالپى پاتەر باعاسىنىڭ كۇرت ءوسۋىن نەمەسە كۇرت ءتۇسۋىن كۇتىپ وتىرعان جوقپىز. بىرتىندەپ وسە بەرەدى دەگەن بولجام بار»، - دەدى باقىتجان جۇنىسبەكوۆ.

اۆتور

ەسىمجان ناقتىباي