قۇرىلىس كودەكسىنىڭ جوباسى زاڭعا ساي ازىرلەنگەن - ولجاس بەكتەنوۆ باقىتجان بازاربەككە جاۋاپ بەردى

استانا. KAZINFORM - پرەمەر-مينيستر ولجاس بەكتەنوۆ ءماجىلىس دەپۋتاتى باقىتجان بازاربەكتىڭ قۇرىلىس كودەكسىنىڭ جوباسىن ازىرلەۋ كەزىندە زاڭسىزدىقتارعا جول بەرىلگەنى تۋرالى ساۋالىنا جاۋاپ بەردى.

«قارجى مينيسترلىگى قوسىمشا جۇمىس جۇرگىزىپ ونەركاسىپ جانە قۇرىلىس مينيسترلىگى بيۋدجەت كودەكسىنىڭ تالاپتارىن ساقتاعانىن انىقتادى. بۇل كودەكستىڭ جوباسىن ازىرلەۋ زاڭدى تۇردە 2023 -جىلعى مەملەكەتتىك تاپسىرما تىزىمىنە ەنگىزىلگەن. ونەركاسىپ جانە قۇرىلىس مينيسترلىگى مەن «قاز ق س ع ز ي» ا ق اراسىنداعى ءوزارا مىندەتتەمەلەر ورىندالدى. ونى زاڭسىز دەپ تانۋعا قانداي دا ءبىر نەگىز جوق»، - دەلىنگەن ۇكىمەت باسشىسىنىڭ جاۋابىندا.

جاۋاپتا قۇجاتتى ازىرلەۋگە بولىنگەن 363 ميلليون تەڭگەدەن استام قاراجاتتىڭ قالاي جۇمسالعانى تۋرالى ءبىرشاما مالىمەت بەرىلگەن.

ولجاس بەكتەنوۆتىڭ مالىمەتىنە سۇيەنسەك، «قاز ق س ع ز ي» ا ق-عا باعىتتالعان 363,4 ميلليون تەڭگە كودەكس جوباسىن ازىرلەگەن قىزمەتكەرلەردىڭ قالاماقىسىنا، عيماراتتى جالعا اۋ شىعىندارىنا، حالىقارالىق تاجىريبەلەردى زەرتتەۋ ءۇشىن جاسالعان ءىسساپارلارعا، ايماقتارعا جاسالعان ساپارلارعا، كودەكس جوباسىن تالقىلاۋ جيىندارىن ۇيىمداستىرۋعا جۇمسالعان.

«وسىنى ەسكەرسەك، بيۋدجەتتەن بولىنگەن قاراجات نىسانالى ماقساتىنا ساي باعىتتالدى»، - دەپ جازادى پرەمەر-مينيستر.

ەسكە سالساق، دەپۋتات باقىتجان بازاربەك ونەركاسىپ جانە قۇرىلىس مينيسترلىگى قۇرىلىس كودەكسىنىڭ جوباسىن ازىرلەۋ كەزىندە بۇركەمەلەنگەن زاڭ بۇزۋ فاكتىسىنە جول بەرگەنىن ايتىپ ءجۇر.

اۆتور
ەسىمجان ناقتىباي