قۇرىلىس كودەكسى جوباسىنىڭ اينالاسىندا قانداي سىن مەن شاعىم بار
الماتى. KAZINFORM - ءبىر جىلعا جۋىق ۋاقىت بۇرىن ماجىلىسكە كىرگىزىلگەن قۇرىلىس كودەكسىنىڭ جوباسى قوعامدا ءالى دە قىزۋ تالقىلانىپ جاتىر. وسى ورايدا Kazinform ءتىلشىسى زاڭ جوباسىن ازىرلەگەن قازاق قۇرىلىس جانە ساۋلەت عىلىمي- زەرتتەۋ جانە جوبالاۋ ينستيتۋتىنا ساۋال جولداپ، ساراپشىلار مەن دەپۋتاتتار تاراپىنان ايتىلعان سىنعا جاۋاپ الدى.
قازق س ع ز ج ي مالىمەتىنە سايكەس، قۇرىلىس كودەكسىنىڭ جوباسىن ازىرلەۋ پروتسەسى 2022 -جىلى قىركۇيەكتە باستالىپ، 2023 -جىلدىڭ جەلتوقسان ايىنا دەيىن جالعاسقان. ال جۇمىس توبىنىڭ قۇرامىنا قۇرىلىستاعى نورمالاۋ ورتالىعىنىڭ 130-دان استام مامانى جۇمىلدىرىلعان.
ءسويتىپ كودەكس جوباسى بيىل اقپان ايىندا ءماجىلىس دەپۋتاتتارىنىڭ نازارىنا ۇسىنىلدى.
بۇل جيىن بارىسىندا ءماجىلىس دەپۋتاتى باقىتجان بازاربەك اتالعان قۇجاتتاعى نورمالاردى سىنعا الدى. ول جاڭا قۇرىلىس كودەكسىنىڭ جوباسىندا بارلىق ۇسىنىس ەسكەرىلمەگەنىن، شىن مانىندە ونداعى نورمالار بۇرىنعى زاڭنامادان كوشىرىلگەنىن ايتتى.
اتالعان سىن بويىنشا Kazinform ساۋالىندا بەرگەن جاۋابىندا ينستيتۋت وكىلى جاڭا زاڭ جوباسىندا ءبولىم، تاراۋ جانە باپتار سانى كوبەيگەنىن اتاپ ءوتتى.
- قازىرگى قولدانىستاعى «قازاقستانداعى ساۋلەت، قالا قۇرىلىسى جانە قۇرىلىس قىزمەتى تۋرالى» قازاقستان رەسپۋبليكاسىنىڭ زاڭى 3 بولىمنەن، 13 تاراۋدان جانە 103 باپتان قۇرالعان بولسا، پارلامەنت ماجىلىسىندە قارالىپ جاتقان قۇرىلىس كودەكسىنىڭ جوباسى 8 بولىمنەن، 34 تاراۋدان جانە 205 باپتان تۇرادى، - دەيدى قاز ق س ع ز ج ي جوبالاۋ ءبولىمىنىڭ باسشىسى نۇرداۋلەت ەگىزەكوۆ.
سونداي-اق ونىڭ ايتۋىنشا، شەتەلدىك تاجىريبە ەسكەرىلە وتىرىپ، كودەكس جوباسىندا قۇرىلىستى رەتتەۋدىڭ مىناداي جاڭا نىساندارى كوزدەلگەن:
قۇرىلىس سالاسىنداعى جوبانى باسقارۋ (قۇرىلىس كەلىسىمشارتتارىنىڭ نىساندارىن قولدانۋ)؛
ەرەكشە رەتتەۋ؛
اباتتاندىرۋ شارالارى؛
قۇرىلىس سالاسىنىڭ ينجەنەرلەرىن سەرتيفيكاتتاۋ؛
سەيسميكالىق ايماقتارداعى قۇرىلىس جانە ساۋلەت- قۇرىلىس ديزاينىنىڭ ەرەكشەلىكتەرى؛
قۇرىلىس وبەكتىلەرىن پايدالانۋ؛
كۇردەلى قۇرىلىس وبەكتىلەرىن بۇزۋ جانە اياقتالماعان قۇرىلىس وبەكتىلەرىن اياقتالماعان كۇردەلى قۇرىلىس وبەكتىلەرىنە جاتقىزۋ؛
سيفرلاندىرۋ جانە اقپاراتتىق قامتاماسىز ەتۋ؛
ساۋلەت، قالا قۇرىلىسى جانە قۇرىلىس سالاسىنداعى عىلىمي قىزمەت؛
ساۋلەت، قالا قۇرىلىسى جانە قۇرىلىس قىزمەتىندەگى ءوزىن-ءوزى رەتتەۋ جانە ت. ب.
ايتا كەتكەن ءجون، جاڭا قۇرىلىس كودەكسىن قوعام بەلسەندىلەرى مەن دەپۋتاتتاردان بولەك قازاقستان قۇرىلىسشىلار وداعىنىڭ وكىلدەرى دە سىنعا العان بولاتىن.
ءتىپتى وسى جىلدىڭ 6-ماۋسىمىندا وداق قۇرىلىس كودەكسىن ونەركاسىپ جانە قۇرىلىس مينيسترلىگىنە پىسىقتاۋعا قايتارۋ تۋرالى پەتيتسيا دا جاريالادى.
قۇرىلىسشىلار وداعى جاڭا زاڭ جوباسىنداعى مىنا ماسەلەلەردى نەگىزگى كەمشىلىك رەتىندە كورسەتىپ وتىر:
- اۋماقتىق جوسپارلاۋ، قالا قۇرىلىسىن ايماقتارعا ءبولۋ جانە اۋماقتاردى جوسپارلاۋ نەگىزىندە اۋماقتىڭ كەشەندى جانە تۇراقتى دامۋىن قامتاماسىز ەتۋگە بايلانىستى قالا قۇرىلىسى قىزمەتىنىڭ مىندەتتەرى مەن قاعيداتتارىنىڭ جوقتىعى؛
- قالالارداعى «نۇكتەلىك قۇرىلىس» جانە ەلدى مەكەندەردىڭ جوسپارلى قۇرىلىسىن رەتتەۋ جۇيەسىن قۇرۋ ماسەلەلەرى شەشىلمەگەن؛
- جاڭا زاڭ قالا قۇرىلىسىن جۇرگىزۋ كەزىندە ەكولوگيالىق، ەكونوميكالىق، الەۋمەتتىك جانە وزگە دە فاكتورلاردىڭ تەڭدەي ەسەبىن قامتاماسىز ەتپەيدى؛
- كولىك، الەۋمەتتىك، ينجەنەرلىك قۇرىلىمدى جوبالاۋ قاعيداتتارى، تاريحي مۇرانى، جاسىل جەلەكتى، ەكولوگيالىق جانە سەيسميكالىق قاۋىپسىزدىكتى ساقتاۋ باسىمدىقتارى جوق؛
- ءبىرقاتار نورماتيۆتەر قۇرىلىس جوبالارىن ساراپتاۋ نارىعىندا مەملەكەتتىڭ مونوپوليستكە اينالۋىنا ىقپال ەتەدى؛
- سيفرلاندىرۋ، ءوزىن-ءوزى رەتتەيتىن ۇيىمدار، تەحنيكالىق تاپسىرىس بەرۋشى جانە ت. ب. بويىنشا ماڭىزدى ماسەلەلەر بار.
- قازاقستان قۇرىلىسشىلار وداعى قۇرىلىس كودەكسى ۋاكىلەتتى ورگان - ونەركاسىپ جانە قۇرىلىس مينيسترلىگىنە پىسىقتاۋعا جىبەرگەنىن دۇرىس كورەدى، ويتكەنى بۇعان بارلىق نەگىز بار. كودەكستىڭ جوباسى پرەزيدەنتتىڭ تاپسىرماسىنا اتاۋىنان باستاپ قۇرىلىس سالاسىن مونوپولياسىزداندىرۋ شارتتارىنا دەيىن سايكەس كەلمەيدى. وداق كودەكستى جەتىلدىرۋگە بۇكىل قولداۋ-كومەگىن كورسەتۋگە دايىن. جاڭا قۇرىلىس كودەكسى ساۋلەت جانە قالا قۇرىلىسى سالاسىندا پروگرەسسيۆتى جانە جۇيەلىك تەتىكتەردى بەلگىلەۋگە، قۇرىلىس پروتسەسىنىڭ بۇكىل كەزەڭدەرىن ونلاين رەجيمدە باقىلاۋعا مۇمكىندىك بەرەتىن زاڭنامالىق دەڭگەيدە اقپاراتتىق جۇيەنى ەنگىزۋگە باعىتتالۋعا ءتيىس، - دەپ حابارلادى قۇرىلىسشىلار وداعىنان.
قاز ق س ع ز ي مالىمەتىنشە، كودەكس جوباسىن قايتا جاساۋ ماسەلەسى قازىرگى ۋاقىتتا قاراستىرىلىپ جاتقان جوق.
- قازىر ينستيتۋت پەن ونەركاسىپ جانە قۇرىلىس مينيسترلىگىنىڭ وكىلدەرى ءماجىلىس دەپۋتاتتارىمەن بىرلەسىپ، جۇمىس توبىنىڭ اياسىندا كودەكس جوباسىن ودان ءارى پىسىقتاۋ جۇمىستارىمەن بەلسەندى اينالىسىپ جاتىر. كودەكس جوباسىن قايتا جاساۋ ماسەلەسى قاراستىرىلىپ جاتقان جوق، - دەيدى قاز ق س ع ز ج ي جوبالاۋ ءبولىمىنىڭ باسشىسى نۇرداۋلەت ەگىزەكوۆ.
سونداي-اق، ينستيتۋت وكىلى «كودەكستە حالىقتىڭ ەمەس، قۇرىلىس كومپانيالارىنىڭ مۇددەسى ەرەكشە قورعالعان» دەگەن سىنعا جاۋاپ بەردى. ونىڭ ايتۋىنشا، زاڭ جوباسى حالىقتىڭ دا، مەملەكەتتىڭ دە جانە بيزنەس وكىلدەرىنىڭ دە مۇددەسىن قورعاۋعا باعىتتالعان.
- كودەكستى قابىلداۋ ارقىلى ساۋلەت، قالا قۇرىلىسى جانە قۇرىلىس سالاسىن دامىتۋ جانە ونى ساپالى جاڭا دەڭگەيگە شىعارۋ ءۇشىن ءتۇيىندى ماڭىزى بار ماسەلەلەردىڭ وتە اۋقىمدى تىزبەسىن رەتكە كەلتىرۋ، جەتىلدىرۋ جانە رەتتەۋ كوزدەلەدى. سايىپ كەلگەندە، بۇل فاكت حالىقتىڭ دا، مەملەكەتتىڭ دە جانە بيزنەس وكىلدەرىنىڭ دە مۇددەلەرىن قورعاۋعا ىقپال ەتەدى. مىسالى، قۇرىلىس كودەكسى جوباسىنىڭ جاڭا رەداكسياسىندا قۇرىلىس سالاسىنداعى رۇقسات بەرۋ جۇيەسىن اۆتوماتتاندىرۋ جانە جوبالاردى باسقارۋمەن اينالىساتىن ۇيىمداردى اككرەديتتەۋ جونىندەگى وكىلەتتىكتەردى جەرگىلىكتى اتقارۋشى ورگاننان ورتالىق ۋاكىلەتتى ورگانعا بەرۋ قاراستىرىلادى، - دەدى ول.
ەسكە سالايىق، وتكەن اپتادا ونەركاسىپ جانە قۇرىلىس ءمينيسترى قانات شارلاپايەۆ قۇرىلىس كودەكسىنە قاتىستى داۋعا پىكىر بىلدىرگەن بولاتىن.
ونىڭ ايتۋىنشا، قارجى مينيسترلىگى جۇرگىزگەن اۋديت اياسىندا زاڭ بۇزۋ فاكتىسى انىقتالعان جوق، تەك پروتسەدۋرالىق سايكەسسىزدىكتەر بولعان.
سونداي-اق، بۇعان دەيىن پرەمەر-مينيستر ولجاس بەكتەنوۆ ءماجىلىس دەپۋتاتى باقىتجان بازاربەكتىڭ قۇرىلىس كودەكسىنىڭ جوباسىن ازىرلەۋ كەزىندە زاڭسىزدىقتارعا جول بەرىلگەنى تۋرالى ساۋالىنا جاۋاپ بەرگەن ەدى.
اۆتور
دوسبول اتاجان