ونىڭ ايتۋىنشا، كونستيتۋتسيالىق زاڭ جوباسىنداعى مانداتتان ايىرۋ ءتارتىبى نەگىزىنەن قولدانىستاعى زاڭناما تەتىكتەرىنە ۇقساس.
- بۇل پارتيالىق سايلاۋ بولعاندىقتان، ەگەر دەپۋتات پارتيانىڭ ۇسىنىستارىنا قۇلاق اسپاسا، پارتيانىڭ بەدەلىن تۇسىرسە جانە باسقا دا جاعدايلار بولسا، بۇل (مانداتتان ايىرۋ) پروتسەستى پارتيانىڭ ءوزى باستاۋى مۇمكىن. سونىمەن قاتار، مەملەكەتتىك ينستيتۋتتار ارالاسقاندا، ءتيىستى شارا قولدانىلۋى مۇمكىن. قىلمىس جاساسا، پارامەن ۇستالسا، وندا ءتيىستى ءتارتىپ قاراستىرىلعان، - دەدى ا. سارىم پارلامەنت پالاتالارىنىڭ بىرلەسكەن وتىرىسىنان كەيىن تىلشىلەر سۇراعىنا جاۋاپ بەرە وتىرىپ.
بۇدان بولەك ول سايلاۋشىلار ءتيىستى وتىنىشتەر ارقىلى قۇرىلتاي دەپۋتاتتارىنا سەنىمسىزدىك بىلدىرە الاتىنىن اتاپ ءوتتى. الايدا، مۇنداي جاعدايدا سوڭعى شەشىمدى پارتيا قابىلدايدى.
- ەگەر پارتيا شىنىمەن دە بۇل دەپۋتاتتىڭ جۇمىسىن ءتيىمدى دەپ ساناسا، ونىڭ ەشقانداي زاڭداردى بۇزباعانىن نەمەسە ءوزىنىڭ جەكە ساياسي ماقساتتارىن كوزدەمەگەنىن اتاپ وتسە، سوڭعى شەشىمدى پارتيا جاسايدى. جالپى العاندا، بۇل ماسەلەلەر پارتيانىڭ بەدەلىنە تىكەلەي اسەر ەتەدى. سايلاۋشىلار قارسى بولعانىمەن، پارتيا ءتيىستى شەشىمدەردى قابىلداماسا، وندا پارتيا ءوز رەيتينگىندە ۇتىلادى، - دەدى دەپۋتات.
بۇدان بۇرىن حابارلانعانداي، بۇگىن پارلامەنت پالاتالارىنىڭ بىرلەسكەن وتىرىسىندا «قازاقستان رەسپۋبليكاسىنداعى سايلاۋ تۋرالى» قازاقستان رەسپۋبليكاسىنىڭ كونستيتۋتسيالىق زاڭىنا وزگەرىستەر مەن تولىقتىرۋلار ەنگىزۋ تۋرالى» كونستيتۋتسيالىق زاڭ جوباسى ءبىرىنشى وقىلىمدا ماقۇلداندى.
مۇنىمەن قوسا، پارلامەنت پالاتالارىنىڭ بىرلەسكەن وتىرىسىندا «قازاقستان رەسپۋبليكاسىنىڭ قۇرىلتايى جانە ونىڭ دەپۋتاتتارىنىڭ مارتەبەسى تۋرالى» كونستيتۋتسيالىق زاڭ جوباسى ءبىرىنشى وقىلىمدا ماقۇلداندى.