قۇرىلتاي سايلاۋى: پارتيالار ناۋقاننىڭ سوڭعى كۇندەرىن قالاي وتكىزدى

كەشە جەتى پارتيا كوشباسشىسى تەلەدەباتقا قاتىسىپ، ەكونوميكا، الەۋمەتتىك ساياسات، اۋىل شارۋاشىلىعى جانە ەكولوگيانى تالقىلادى.
«ادىلەت» پارتياسى استانادا تۇرعىن ءۇي قورىن باسقارۋ ماسەلەلەرىن تالقىلادى. سونداي-اق پارتيا وكىلدەرى حالىقارالىق بايقاۋشىلارمەن كەزدەسىپ، پاۆلودار وبلىسىندا ونەركاسىپ كاسىپورىندارىنىڭ ۇجىمدارىمەن جۇزدەستى.
جالپىۇلتتىق سوتسيال-دەموكراتيالىق پارتيا ەڭبەك قۇقىقتارى، اگروونەركاسىپتىك كەشەن، ەكولوگيا، زەينەتاقى جانە ءبىلىم ماسەلەلەرىن تالقىلادى. پارتيا وكىلدەرى كوكپەكتى اۋىلىنىڭ تۇرعىندارىمەن جانە جاستارمەن كەزدەسىپ، الەۋمەتتىك ماسەلەلەردى كوتەردى.
«بايتاق» پارتياسى الماتى جانە اقتوبە وبلىستارىندا پەداگوگتەرمەن جانە مەديتسينا قىزمەتكەرلەرىمەن كەزدەسىپ، ەكولوگيا مەن دەنساۋلىق ساقتاۋ ماسەلەلەرىن تالقىلادى. پاۆلودار وبلىسىندا رادياتسيالىق مونيتورينگ ماسەلەسى كوتەرىلدى.
قازاقستان حالىق پارتياسى ارداگەرلەرمەن، داعدارىس ورتالىعىنىڭ قىزمەتكەرلەرى جانە تاۋەلدىلىگى بار ادامدارعا كومەك كورسەتۋ ورتالىعىنىڭ ماماندارىمەن كەزدەسىپ، وندا ءدارى-دارمەك، الەۋمەتتىك بەيىمدەلۋ جانە مەكتەپتەردەگى پسيحولوگيالىق قولداۋ ماسەلەلەرى تالقىلاندى.
«اۋىل» پارتياسى پاۆلودار وبلىسىندا عىلىم جانە ءبىلىم سالاسىنىڭ وكىلدەرىمەن، سونداي-اق نابەرەجنوە اۋىلىنداعى «AndasAgro» شارۋاشىلىعىنىڭ ەڭبەك ۇجىمىمەن كەزدەستى. وندا وسىمدىك جانە مال شارۋاشىلىعى ماسەلەلەرى تالقىلاندى.
«اق جول» پارتياسى جەتى وبلىستا سايلاۋالدى كەزدەسۋلەرىن جالعاستىردى. باتىس قازاقستان وبلىسىندا پارتيا وكىلدەرى ءبورىلى اۋدانىنىڭ جارسۋات اۋىلدىق وكرۋگى تۇرعىندارىمەن كەزدەسىپ، وڭىردەگى وزەكتى ماسەلەلەردى تالقىلادى.
«Respublica» پارتياسى اقمولا وبلىسىندا كونتسەرتتىك باعدارلاما مەن كورمە ۇيىمداستىرىلعان جاقتاستار فورۋمىن، سونداي-اق كانديداتتاردىڭ «Re Jastary» جاستار قوزعالىسىمەن كەزدەسۋىن وتكىزدى.
«باستى دەبات - 2026»
19-تامىزدا 24KZ تەلەارناسىندا «ەكونوميكالىق وسىمنەن ازاماتتاردىڭ ءال-اۋقاتىنا دەيىن» تاقىرىبىندا «باستى دەبات - 2026» ءوتتى. ەفيرگە جەتى پارتيانىڭ ءتوراعاسى قاتىستى: ايبەك دادەباي («ادىلەت»)، دانيا ەسپايەۆا («اق جول») نۇرسۇلتان شوقانوۆ (قازاقستان حالىق پارتياسى)، قايرات ايتۋعانوۆ («اۋىل»)، اسحات راحيمجانوۆ (ج س د پ)، ايداربەك قوجانازاروۆ (Respublica) جانە ازاماتحان امىرتايەۆ («بايتاق»).
ءسوز سويلەۋ ءتارتىبى ءبىر كۇن بۇرىن، 18-تامىزدا وتكەن اشىق جەرەبە ارقىلى انىقتالدى. دەبات فورماتى ءتورت راۋندتان تۇردى: باعدارلامالاردى تانىستىرۋ، قارسىلاستار مەن كورەرمەندەردىڭ سۇراقتارىنا جاۋاپ بەرۋ، پارتيالار اراسىنداعى تىكەلەي پىكىرتالاس جانە قورىتىندى ءسوز سويلەۋ. ەفير بارىسىندا بارلىق پارتيانىڭ شتابىنان تىكەلەي قوسىلىمدار ۇيىمداستىرىلىپ، ا ق ش، قىتاي جانە ب ا ءا- دەگى قازاقستاندىقتارمەن تەلەكوپىر ءوتتى. كورەرمەندەر QR- كود پەن بايلانىس ورتالىعى ارقىلى شامامەن 59 مىڭ سۇراق جولدادى. ولاردىڭ اراسىندا شەتەلدەن قويىلعان سۇراقتار دا بولدى.
جەرەبە بويىنشا ءبىرىنشى بولىپ ءسوز العان Respublica پارتياسىنىڭ ءتوراعاسى ايداربەك قوجانازاروۆ تابىس پەن باعانىڭ ءوسۋى، سيفرلاندىرۋدىڭ ەڭبەك نارىعىنا ىقپالى، كادرلاردى قايتا دايارلاۋ جانە ءبىلىم بەرۋ ماسەلەلەرىن كوتەردى. سونداي-اق فەرمەرلەردى قولداۋ مەن مەملەكەتتىك ساتىپ الۋعا توقتالدى.
«بايتاق» پارتياسىنىڭ ءتوراعاسى ازاماتحان امىرتايەۆ دەبات بارىسىندا ەكولوگيالىق تۋريزمدى دامىتۋ، قورشاعان ورتانى قورعاۋ جانە بيۋجەت قاراجاتىن پايدالانۋ ماسەلەلەرىنە توقتالدى. پارتيا باعدارلاماسى تۋرالى سۇراققا جاۋاپ بەرە وتىرىپ، ول قارجىلىق زاڭ بۇزۋشىلىقتار تۋرالى اۋديتورلىق تەكسەرۋ دەرەكتەرىنە سۇيەنىپ، قولدا بار رەسۋرستاردى تيىمدىرەك پايدالانۋ قاجەتتىگىن اتاپ ءوتتى.
«اق جول» پارتياسىنىڭ ءتوراعاسى دانيا ەسپايەۆا دەباتتا تابيعي رەسۋرستاردان تۇسەتىن تابىستى ءبولۋ، اگرارلىق سەكتور مەن جاس وتباسىلاردى قولداۋ ماسەلەلەرىن كوتەردى. ول اۋىل شارۋاشىلىعىن سۋبسيديالاۋ، سالىق شارالارى، تەحنيكا ليزينگى جانە جاس وتباسىلاردى يپوتەكالىق نەسيەلەۋ ۇسىنىستارىنا توقتالدى.
«ادىلەت» پارتياسىنىڭ ءتوراعاسى ايبەك دادەباي دەباتتا جۇمىسپەن قامتۋ، اۋىل تۇرعىندارىنىڭ تابىسى جانە جاساندى ينتەللەكت سالاسىنداعى داعدىلاردى دامىتۋ ماسەلەلەرىن كوتەردى. ول ەكونوميكانى كەڭەيتۋ، ورتا بيزنەستى دامىتۋ، قارجىلاندىرۋدى قولجەتىمدى ەتۋ، ەكسپورتتى ىنتالاندىرۋ جانە شيكىزاتتى تەرەڭ وڭدەۋ قاجەتتىگىن ايتتى.
«اۋىل» پارتياسىنىڭ ءتوراعاسى قايرات ايتۋعانوۆ دەباتتا اۋىل تۇرعىندارىنىڭ تابىسىن ارتتىرۋ، شاعىن بيزنەس پەن كووپەراتسيانى دامىتۋ ماسەلەلەرىن كوتەردى. ول استىقتى تەرەڭ وڭدەۋ، تۇقىم شارۋاشىلىعىن دامىتۋ، اگرارلىق سەكتوردى تسيفرلاندىرۋ جانە ەڭبەك ونىمدىلىگىن ارتتىرۋ قاجەتتىگىن ايتتى.
جالپىۇلتتىق سوتسيال- دەموكراتيالىق پارتيانىڭ ءتوراعاسى اسحات راحيمجانوۆ ەڭبەكاقى تولەۋ، مەملەكەتتىك باعدارلامالار مەن بيۋدجەت شىعىستارىن باقىلاۋ، سونداي-اق حالىق تابىسىنىڭ ىشكى سۇرانىسقا ىقپالى ماسەلەلەرىن قوزعادى. ول پارتيانىڭ ۇستانىمىنا نەگىزدەلگەن باستى قاعيداتتاردى اتاپ، سايلاۋالدى ۋادەلەردىڭ ورىندالۋىنا قوعامدىق باقىلاۋ جۇرگىزۋدىڭ ماڭىزىن ايتتى.
قازاقستان حالىق پارتياسىنىڭ ءتوراعاسى نۇرسۇلتان شوقانوۆ ازىق-تۇلىك، مەديتسينا مەن ءبىلىمنىڭ قولجەتىمدىلىگى، مونوپوليالاردى رەتتەۋ جانە شاعىن بيزنەستى قولداۋ ماسەلەلەرىن كوتەردى. سونداي-اق اليمەنت قورىن قايتارىلعان زاڭسىز اكتيۆتەر ەسەبىنەن قارجىلاندىرۋدى ۇسىندى.
ۇگىت-ناسيحاتتىڭ سوڭعى كۇنىنىڭ الدىنداعى كۇن پارتيالار باسىمدىقتارىنىڭ ءالى دە ءارتۇرلى ەكەنىن كورسەتتى. ولار اۋىل شارۋاشىلىعىن قولداۋ مەن حالىق تابىسىن ارتتىرۋدان باستاپ، ەكولوگيالىق كۇن تارتىبىنە، الەۋمەتتىك كەپىلدىكتەرگە جانە بيۋجەت شىعىستارىن باقىلاۋعا دەيىنگى ماسەلەلەردى قامتىدى. قورىتىندى دەباتتا جەتى پارتيانىڭ وكىلدەرى ەلدىڭ الەۋمەتتىك- ەكونوميكالىق دامۋىنىڭ نەگىزگى ماسەلەلەرىن تالقىلاپ، ولاردى شەشۋ جولدارىن ۇسىندى.
ايتا كەتەيىك، ۇگىت-ناسيحات كەزەڭى اياقتالعاننان كەيىن تىنىشتىق كۇنى وتەدى، ال 23-تامىزدا داۋىس بەرۋ بولادى.