قۇرعاق قىمىز بەن جىلقى ەتى شەتەلدىك ۆەتەريناريالىق تالاپتارعا سايكەستەندىرىلەدى

استانا. KAZINFORM - قۇرعاق بيە ءسۇتى مەن جىلقى ەتى شەت مەملەكەتتەردىڭ ۆەتەريناريالىق تالاپتارىنا سايكەستەندىرىلەدى. بۇل تۋرالى ءماجىلىس دەپۋتاتتارىنىڭ ساۋالىنا پرەمەر- مينيستر ولجاس بەكتەنوۆتىڭ جاۋابىندا ايتىلعان.

- جىلقى شارۋاشىلىعى اگروونەركاسىپتىك كەشەندى دامىتۋعا ارنالعان مەملەكەتتىك باعدارلامالارعا ەنگىزىلگەن. سوڭعى بەس جىل ىشىندە جىلقى شارۋاشىلىعىن دامىتۋعا بيۋدجەتتەن 9,4 ميلليارد تەڭگەدەن استام قاراجات ءبولىندى. ونىڭ ىشىندە وسى جىلعا شامامەن 900 ميلليون تەڭگە قاراستىرىلدى. قابىلدانعان شارالاردىڭ ناتيجەسىندە 2024 -جىلدىڭ قورىتىندىسى بويىنشا جىلقى سانى 4,4 ميلليون باسقا جەتتى. بۇل 1991 -جىلعى كورسەتكىشتەن 2,5 ەسە جوعارى، - دەدى ولجاس بەكتەنوۆ.

ۇكىمەت باسشىسىنىڭ دەرەگىنشە، جىلقى ەتىن جانە بيە ءسۇتىن ءوندىرۋ مەن وڭدەۋ باعىتتارىندا وڭ سەرپىن بايقالادى.

ماسەلەن، سوڭعى بەس جىلدا جىلقى ەتىنىڭ ءوندىرىسى 30 پايىزعا ارتىپ، 170,9 مىڭ توننانى قۇرادى. ال بيە ءسۇتىنىڭ ءوندىرىسى 21 پايىزعا ءوسىپ، 33,4 مىڭ تونناعا جەتتى.

اۋىل شارۋاشىلىعى ونىمدەرىن وڭدەۋدى، ونىڭ ىشىندە جىلقى ەتى مەن بيە ءسۇتىن قايتا وڭدەۋدى ىنتالاندىرۋ ماقساتىندا سولتۇستىك قازاقستان وبلىسىنىڭ تاجىريبەسى (2,5 پايىز مولشەرلەمەمەن جانە 10 جىلعا دەيىنگى مەرزىمگە) الەۋمەتتىك- كاسىپكەرلىك كورپوراتسيالار ارقىلى قارجىلاندىرىلاتىن جوبالار تىزبەسىنە ەنگىزىلدى. سونداي- اق «اگرارلىق نەسيە كورپوراتسياسى» ا ق ارقىلى وڭدەۋشى كاسىپورىندارعا اينالىم قاراجاتىن تولىقتىرۋ ماقساتىندا 5 پايىز مولشەرلەمەمەن جەڭىلدەتىلگەن نەسيە بەرۋ تەتىگى ىسكە اسىرىلىپ جاتىر.

- اۋىل شارۋاشىلىعى مينيسترلىگى ەكسپورتقا باعىتتالعان ونىمدەردى، ونىڭ ىشىندە قۇرعاق بيە ءسۇتى مەن جىلقى ەتىن شەت مەملەكەتتەردىڭ ۆەتەريناريالىق تالاپتارىنا سايكەستەندىرۋ بويىنشا جۇمىستار جۇرگىزۋدە. جىلقى شارۋاشىلىعى سۋبەكتىلەرىنە تەحنيكا مەن جابدىق ساتىپ الۋعا 25 پايىزعا دەيىنگى مولشەردە ينۆەستيتسيالىق سۋبسيديالار ۇسىنىلادى. سونداي-اق جىلقى جانە جابدىق ساتىپ الۋعا جەڭىلدەتىلگەن نەسيەلەر مەن ليزينگ مۇمكىندىگى قاراستىرىلعان، - دەدى پرەمەر- مينيستر.

بۇعان دەيىن «تۇلپار كۇنى» ارنايى ۇلتتىق مەرەكەسىن بەلگىلەۋ ماسەلەسى قوسىمشا پىسىقتالاتىنىن جازعان ەدىك.

اۆتور

مارلان جيەمباي