قۇربان ايتتىڭ رۋحاني ساتتەرى: ەلوردادان فوتورەپورتاج
استانا. KAZINFORM - بۇگىن قازاقستان مۇسىلماندارى ءۇشىن قاسيەتتى قۇربان ايت مەرەكەسى باستالدى. اتاۋلى كۇنگە وراي ەلىمىزدىڭ بارلىق وڭىرىندە ايت نامازى وقىلدى.
ەلورداداعى رەسپۋبليكالىق باس مەشىتتە قۇربان ايت نامازىن قازاقستان مۇسىلماندارى ءدىني باسقارماسىنىڭ ءتوراعاسى ناۋرىزباي قاجى تاعان ۇلى جۇرگىزدى. نامازعا جينالعان جاماعاتقا باس ءمۇفتي قۇربان ايتتىڭ رۋحاني ماڭىزى جايىندا ۋاعىز ايتىپ، حالىقتى ىزگىلىك پەن سابىرلىققا، مەيىرىم مەن بىرلىككە شاقىردى.
- اللا تاعالا پەندەلەرىنىڭ ىزگىلىك امال اتقارىپ، كوبىرەك ساۋاپ ىستەر جاساۋى ءۇشىن كەيبىر كۇندەر مەن تۇندەردى باسقالارىنان ارتىق ەتىپ قويدى. سونداي مۇسىلمان بالاسىنىڭ جاراتۋشىسىنىڭ كەشىرىمىنە بولەنۋگە تىرىسىپ، ىزگى امالدارعا ەرەكشە ىنتا تانىتۋى قاجەت ۋاقىتتىڭ ءبىرى - وسى قۇربان ايت مەرەكەسىنىڭ كەزەڭى. بۇل اي مۇسىلمان كۇنتىزبەسىندە زۇلحيججا ايى دەپ اتالادى، - دەدى ناۋرىزباي قاجى تاعان ۇلى.
سونداي-اق، باس ءمۇفتي زۇلحيججا ايىنىڭ العاشقى ون كۇنىنىڭ ماڭىزىن اتاپ ءوتتى.
- بۇل ايدىڭ العاشقى ون كۇنىندە جاسالاتىن عيباداتتاردىڭ ءقادىرى وتە جوعارى. اللا تاعالا قاسيەتتى قۇراننىڭ «ءفاجر» سۇرەسىندە: «تاڭ شاپاعىنا سەرت. جانە (مۇباراك) ون تۇنگە سەرت»، - دەپ ايتقان. ارداقتى پايعامبارىمىز (وعان اللانىڭ سالاۋاتى مەن سالەمى بولسىن) بۇل كۇندەر جايلى: «اللا تاعالاعا وسى (ون) كۇندە ىستەلگەن يگى ىستەن جاقسىراق امال جوق» (يمام بۇحاري)، - دەگەن، - دەدى باس ءمۇفتي ءوز سوزىندە.
ايت نامازىنان كەيىن ناۋرىزباي قاجى تاعان ۇلى ەل اماندىعى مەن بىرلىگى ءۇشىن ارنايى دۇعا جاساپ، اتا- بابالار رۋحىنا قۇران اياتتارىن باعىشتادى.
سونىمەن قاتار قاسيەتتى قۇربان ايت مەرەكەسى قارساڭىندا ەلورداداعى «ازىرەت سۇلتان» مەشىتىندە ايت نامازى وقىلىپ، جاماعاتقا ۋاعىز ناسيحات ايتىلدى.
نامازعا كەلگەن جاماعاتتى قازاقستان مۇسىلماندارى ءدىني باسقارماسىنىڭ وكىلى، ازىرەت سۇلتان مەشىتىنىڭ نايب يمامى سادىرحانوۆ جۇمانازار وسەرحان ۇلى قۇتتىقتاپ، مەرەكەنىڭ ءمان- ماڭىزىنا توقتالدى.
اۆتور
تاستان تويانوۆ