قۇنى 50 ميلليون تەڭگە تۇراتىن ساۋكەلە رەسەيدەگى مۋزەيدەن تابىلدى

استانا. قازاقپارات - بەلگىلى ونەر يەسى ايگۇل ەلشىبايەۆا حالقىمىزدىڭ مادەني مۇراسى سانالاتىن قۇندى ساۋكەلەنى كورسەتتى، دەپ حابارلايدى El.kz اقپارات اگەنتتىگى.

ونەر يەسى قازىرگى تاڭدا رەسەيدىڭ سانكت-پەتەربۋرگ قالاسىنداعى مۇراجايدا ساقتالعان ساۋكەلەگە بايلانىستى تىڭ دەرەكتەرمەن ءبولىستى.

بۇل ساۋكەلەنىڭ باعاسى 100 اتتىڭ قۇنىمەن تەڭ. قازىرگى باعامەن شامامەن 50 ميلليون تەڭگە تۇرادى. قازاقتىڭ بايلارى داۋلەتىن ءبىلدىرۋ ءۇشىن قىزدارىن ۇزاتقاندا ارنايى زەرگەرلەرگە سوقتىرىپ، التىن، اسىل تاستارمەن كومكەرىپ جاساعان. بۇل ساۋكەلەنى سىيعا تارتقان لايىكجان دەربىسالى ۇلى بەركىمبايەۆ. اقتوبە ۋەزىنەن شىققان كەردەرى ابۋباكىردىڭ جىرلارىنداعى ارناۋى بار. «جاعالبايلى جينالسا، دەربىسالىنى ماقتايدى» دەپ كەلەتىن ولەڭ جولدارىنداعى جاعالبايلى رۋىنان شىقققان باي دەربىسالى بايدىڭ بالاسى لايىقجان تاپسىرعان.

ول كەزدە 100 قويى بار ادام كەدەي سانالعان. باي دەپ 1000 قويى مەن جىلقىسى بار ادامدى ايتقان. سانكت-پەتەربۋرگ قالاسىنداعى كۋنستكامەرادا وسى ساۋكەلە ساقتاۋلى تۇر، - دەپ جازدى ايگۇل ەلشىبايەۆا.