قۇلىندى قۇتقارماق بولعان تۇركىستان وبلىسىنىڭ تۇرعىنى سۋدان شىعا الماي قالدى

تۇركىستان. KAZINFORM - پاترۋلدىك پوليتسيا باتالونىنىڭ ينسپەكتورلارى داۋلەت ساعىنبايەۆ پەن نۇرعالي ساپارحان جاس جىگىتتى اجالدان اراشالاپ قالدى.

رەسپۋبليكالىق ماڭىزى بار «سارىاعاش- جەتىساي- جىبەك جولى» تاسجولىنا كەزەكشىلىككە تۇسكەن پوليتسەيلەرگە جول بويىنداعى ادامدار سىرداريا وزەنىنەن ءبىر ادامنىڭ شىعا الماي جاتقانىن جەتكىزگەن.

ءتارتىپ ساقشىلارى ءمان-جايدى بىلىسىمەن بىردەن قۇتقارۋ جۇمىسىنا كىرىستى. داۋلەت سۋعا ءتۇسىپ، باتىپ بارا جاتقان ادامدى جاعاعا جاقىنداتتى. سودان ارىپتەسى نۇرعالي ەكەۋى ەر ادامدى سۇيرەپ، قاۋىپسىز جەرگە الىپ شىقتى.

«ماقتاارال اۋدانىنىڭ تۇرعىنى مال باعىپ ءجۇرىپ، قۇلىننىڭ وزەنگە ءتۇسىپ كەتكەنىن كورگەن. سودان قۇتقارماق بولىپ سۋعا ءتۇسىپ، شىعا الماي قالعان. قازىرگى تاڭدا پوليتسەيلەردىڭ جىلدام ارەكەتى ارقاسىندا امان قالعان تۇرعىننىڭ جاعدايى ءبىرقالىپتى» دەلىنگەن تۇركىستان وبلىسى پوليتسيا دەپارتامەنتىنىڭ باسپا ءسوز قىزمەتى ۇسىنعان اقپاراتتا.

اۆتور
قايرات زاينيشەۆ