قۇلپىناي قارتايۋدىڭ الدىن الادى

روستوك ۋنيۆەرسيتەتىنىڭ مەديتسينا ورتالىعىنىڭ عالىمدارى Biovis Diagnostik كومپانياسىمەن بىرلەسە زەرتتەۋ جۇرگىزىپ، قۇلپىنايدىڭ قارت ادامدارعا پايدالى قاسيەتتەرىن انىقتادى، دەپ جازادى turkystan.kz.

ەكسپەريمەنت اياسىندا ەگدە جاستاعى 69 قاتىسۋشى 10 اپتا بويى جاڭا پىسكەن جانە ليوفيليزاتسيالانعان (سۋبليميروۆاننايا) قۇلپىنايدى ءارتۇرلى مولشەردە قامتيتىن ارنايى ديەتانى ۇستاندى. عالىمدار قۇلپىنايدى ەڭ كوپ تۇتىنعان توپتاردا دەنساۋلىق كورسەتكىشتەرىنىڭ ايتارلىقتاي جاقسارعانىن اتاپ ءوتتى.

قۇلپىناي ىشەك ميكروبتارىنىڭ الۋان تۇرلىلىگىن ارتتىرىپ، قىسقا تىزبەكتى ماي قىشقىلدارىن وندىرۋگە جاۋاپ بەرەتىن باكتەريالاردىڭ كوبەيۋىنە ىقپال ەتتى. بۇل قوسىلىستاردىڭ قابىنۋعا قارسى جانە باسقا دا كوپتەگەن پايدالى قاسيەتتەرى بار، سونىڭ ىشىندە اس قورىتۋدى جانە زات الماسۋدى قالىپتى دەڭگەيدە ۇستاۋعا كومەكتەسەدى.

سونىمەن قاتار، زەرتتەۋشىلەر پاتوگەندى باكتەريالاردىڭ سانىنىڭ ازايعانىن جانە ىشەك جۇمىسى ءۇشىن ماڭىزدى بولىپ سانالاتىن Faecalibacterium جانە Prevotella سياقتى پايدالى باكتەريالار سانىنىڭ ارتقانىن بايقادى. سونداي-اق Firmicutes/Bacteroidetes اراقاتىناسىنىڭ تومەندەگەنى تىركەلدى، بۇل مەتابوليزمنىڭ جاقسارۋىمەن جانە سالماقتى باقىلاۋمەن بايلانىستى.

عالىمداردىڭ ايتۋىنشا، جاستىڭ ۇلعايۋىمەن ىشەك ميكروفلوراسىنىڭ بالانسى بۇزىلادى: پايدالى باكتەريالاردىڭ سانى ازايىپ، زياندىلارى كوبەيە باستايدى. بۇل قابىنۋ پروتسەستەرىنە، زات الماسۋ بۇزىلىستارىنا جانە يممۋندىق جۇيەنىڭ السىرەۋىنە اكەلۋى مۇمكىن. قۇلپىنايدى ۇنەمى تۇتىنۋ ىشەك ميكروفلوراسىنىڭ بالانسىن قالپىنا كەلتىرىپ، جاسقا بايلانىستى اۋرۋلاردىڭ الدىن الۋعا كومەكتەسەدى.

ەڭ جاقسى ناتيجەگە جەتۋ ءۇشىن عالىمدار كۇندەلىكتى جاڭا پىسكەن نەمەسە ليوفيليزاتسيالانعان قۇلپىناي تۇتىنۋدى ۇسىنادى. قۇلپىنايدى جاسۇنىققا جانە پايدالى ميكروەلەمەنتتەرگە باي تەڭگەرىمدى راتسيونعا قوسقاندا، ەڭ جوعارى اسەرگە قول جەتكىزۋگە بولادى.