قۇلىبايەۆتىڭ اينالاسىنداعىلار قازاقستان سپورتىنا زيانىن تيگىزىپ جاتىر - ەرلان سايىروۆ

استانا. KAZINFORM - قازاقستان سپورتىنان وليگارحتاردىڭ بارلىق بايلانىسىن الىپ تاستاۋىمىز كەرەك. بۇل تۋرالى ماجىلىستە دەپۋتات ەرلان سايىروۆ ايتتى.

«قازاقستان سپورتىنان وليگارحتاردىڭ بارلىق بايلانىسىن الىپ تاستاۋىمىز كەرەك. بۇگىنگى تاڭدا تيمۋر قۇلىبايەۆ، ونىڭ اينالاسىندا جۇرگەن ادامدار قازاقستان سپورتىنا كەرسىنشە زيانىن تيگىزىپ جاتىر. بۇل ماسەلەنى قالاي شەشە الامىز؟ قۇزىرلى مينيسترلىكتىڭ وليگارحتاردى سپورتتان قۋىپ جىبەرۋگە كۇش-جىگەرى بولا ما؟ وليگارحتار، ولاردىڭ اينالاسىنداعى تۋىستارى، دوستارى ەلىمىزدە ءارتۇرلى فەدەراتسيا اشىپ، قازاقستان بيۋدجەتىنىڭ قارجىسىن توز-توزىن شىعاردى»، - دەدى دەپۋتات.

ونىڭ دەرەگىنشە، سوڭعى 4 جىلدىڭ ىشىندە ەلىمىزدىڭ جوعارى جەتىستىك سپورتى كورشىلەس ەلدەردەن قالىپ بارادى.

«نەگە؟ قازاقستان سپورتقا جالپى 1 ميلليارد دوللار بولەدى. ال ورتا ازياداعى باسقا ەلدەر مۇنداي سومانى تۇسىندە دە كورمەگەن. ءبىراق، ولاردىڭ جەتىستىگى جوعارى. ياعني، 1 ميلليارد دوللار ەلىمىزدە تالان-تاراجعا ءتۇسىپ وتىر. سوندىقتان ەڭ الدىمەن سپورتتى دامىتقان كەزدە وليمپيادالىق سپورت تۇرلەرىنە عانا بيۋدەت قاراجاتىن ءبولۋ كەرەك. ەكىنشىدەن، ۇلتتىق سپورت تۇرلەرىنە بەرۋ قاجەت. باسقا فەدەراتسيالار جۇمىس ىستەگىسى كەلسە، وندا بيۋدجەتتەن تىس كوزدەردەن قارجى تارتىپ، جۇمىس ىستەي بەرسىن. ولارعا ەشكىم قوي دەمەيدى»، - دەدى ەرلان سايىروۆ.

ايتا كەتەيىك، ءماجىلىستىڭ الەۋمەتتىك-مادەني دامۋ كوميتەتىندە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە دەنە شىنىقتىرۋ جانە سپورت ماسەلەلەرى بويىنشا وزگەرىستەر مەن تولىقتىرۋلار ەنگىزۋ، سونداي- اق نورمالاردى شەكتەن تىس (شەكتەن تىس) زاڭنامالىق رەتتەۋدى الىپ تاستاۋ تۋرالى» زاڭ جوباسى تالقىلانىپ جاتىر.

اۆتور

مارلان جيەمباي